ផ្តល់អំណោយដល់កងទ័ព និងប្រជាជននៅឃុំ Truong Ha ខេត្ត Cao Bang

ក្នុងឱកាសនេះ លោក Nguyen Trong Nghia បានវាយតំលៃខ្ពស់ចំពោះស្មារតីសាមគ្គីភាព កិច្ចខិតខំប្រឹងប្រែង និងលទ្ធផលដ៏លេចធ្លោដែលគណៈកម្មាធិការបក្ស អាជ្ញាធរ កងកម្លាំងប្រដាប់អាវុធ និងប្រជាជនខេត្ត Cao Bang សម្រេចបានក្នុងការអភិវឌ្ឍសេដ្ឋកិច្ចសង្គម ពង្រឹងការពារជាតិ និងសន្តិសុខព្រំដែនក្នុងរយៈពេលកន្លងមក។

លោក Nguyen Trong Nghia មានប្រសាសន៍នៅក្នុងជំនួប

លោក Nguyen Trong Nghia បានស្នើថា នាពេលខាងមុខ ខេត្ត Cao Bang ចាំបាច់អនុវត្តឲ្យបានឆាប់រហ័សនូវគោលនយោបាយ និងសេចក្តីសម្រេចលើកកំពស់តួនាទីរបស់អង្គការ នីមួយៗ និងបុគ្គលម្នាក់ៗក្នុងការដឹកនាំ។

សម្រាប់កងទ័ពការពារព្រំដែនខេត្ត Cao Bang លោក Nguyen Trong Nghia បានស្នើឱ្យបន្តប្រកាន់ខ្ជាប់នូវទស្សនៈរបស់បក្សចំពោះភារកិច្ចការពារជាតិ និងសន្តិសុខ ការពារយ៉ាងម៉ឺងម៉ាត់នូវអធិបតេយ្យភាពទឹកដី និងសន្តិសុខព្រំដែនជាតិ សហការយ៉ាងជិតស្និទ្ធជាមួយគណៈកម្មាធិការបក្ស អាជ្ញាធរ អង្គភាព និងប្រជាជនក្នុងតំបន់ កសាងប្រៀបការពារព្រំដែនដោយប្រជាជនទាំងមូល រួមជាមួយនឹងប្រៀបការពារជាតិដោយប្រជាជនទាំងមូល និងប្រៀបសន្តិសុខដោយប្រជាជនយ៉ាងរឹងមាំ។

គណៈប្រតិភូ រួមជាមួយកម្មាភិបាល និងយុទ្ធជននៃប៉ុស្តិ៍ការពារព្រំដែន Soc Giang

តាងនាមថ្នាក់ដឹកនាំបក្ស និងរដ្ឋ លោក Nguyen Trong Nghia បានសួរសុខទុក្ខ និងជូនពរសុខភាពល្អដល់កម្មាភិបាល យុទ្ធជន និងប្រជាជនខេត្ត Cao Bang ព្រមទាំងសង្ឃឹមថា សិស្សានុសិស្សនៅតាមតំបន់ព្រំដែននឹងបន្តខិតខំសិក្សារៀនសូត្រ សក្តិសមជាអនាគតដ៏ភ្លឺស្វាងនៃមាតុភូមិ និងប្រទេសជាតិ។

ក្នុងឱកាសនេះ គណៈប្រតិភូបានផ្តល់អំណោយចំនួន ១៧ ជូនស្ថាប័ន អង្គភាពនានានៅឃុំ Truong Ha។ គណៈកម្មាធិការបក្សយោធាមជ្ឈិម ក្រសួងការពារប្រទេស ក៏បានផ្តល់អំណោយចំនួន ៥០ ដល់ប្រជាជនចំនួន ៥០ គ្រួសារដែលជួបការលំបាក និងរងការខូចខាតដោយខ្យល់ព្យុះលេខ ១០ នាពេលថ្មីៗនេះ ព្រមទាំងផ្តល់អំណោយចំនួន ១០០ ដល់កុមារជំទង់ និងកុមារដែលជួបការលំបាក។ បញ្ជាការដ្ឋានកងទ័ពការពារព្រំដែន និងគណៈកម្មាធិការប្រជាជនខេត្ត Cao Bang បានផ្តល់អំណោយជាច្រើនដល់កងកម្លាំង និងប្រជាជនឃុំ Truong Ha៕

បកប្រែដោយ Huyen Trang