លោកឧត្តមសេនីយ៍ឯក Hoang Xuan Chien ចូលរួមកិច្ចប្រជុំឧត្តមមន្ត្រីការពារជាតិអាស៊ាន

អង្គប្រជុំបានផ្តល់យោបល់លើការត្រៀមរៀបចំសម្រាប់កិច្ចប្រជុំឧត្តមមន្ត្រីការពារជាតិអាស៊ានបូក (ADSOM+) និងកិច្ចប្រជុំ ADMM លើកទី ១៩ និង ADMM បូក លើកទី ១២។

លោកឧត្តមសេនីយ៍ឯក Hoang Xuan Chien នៅកិច្ចប្រជុំ

លោកឧត្តមសេនីយ៍ឯក Hoang Xuan Chien ប្រធានគណៈប្រតិភូវៀតណាម បានសម្តែងនូវការជឿជាក់ថា ក្រសួងការពារជាតិម៉ាឡេស៊ីនឹងទទួលតួនាទីជាប្រធាន ADMM និង ADMM បូក ប្រកបដោយជោគជ័យ បន្តពង្រឹងសាមគ្គីភាព និងកម្លាំងរួមរបស់អាស៊ានដើម្បីឆ្លើយតបប្រកបដោយភាពបត់បែន និងសកម្មចំពោះបញ្ហាប្រឈមសន្តិសុខក្នុងតំបន់ដើម្បីតំបន់មួយប្រកបដោយសន្តិភាព សន្តិសុខ និងខ្លួនទីពឹងខ្លួន។

ទិដ្ឋភាពនៃកិច្ចប្រជុំ

ទាក់ទិននឹងកិច្ចប្រជុំកំពូលអាស៊ាននៅខែតុលាខាងមុខ ដែលនឹងបញ្ជូលប្រទេសទីម័រឡេស្តេចូលជាសមាជិកអាស៊ាន លោកឧត្តមសេនីយ៍ឯក Hoang Xuan Chien បានសម្តែងនូវសេចក្តីរីករាយចំពោះព្រឹត្តិការណ៍ប្រវត្តិសាស្ត្រនេះរបស់អាស៊ាន។ ព្រមទាំងអះអាងនូវគោលជំហរឥតងាករេ និងការគាំទ្ររបស់វៀតណាមចំពោះការបញ្ចូលទីម័រឡេស្តេជាសមាជិកអាស៊ានពេញសិទ្ធិ។ វៀតណាមជឿជាក់យ៉ាងមុតមាំថា ការចូលរួមរបស់ទីម័រឡេស្តេនឹងរួមចំណែកជាវិជ្ជមានក្នុងការរក្សាសន្តិភាព សន្តិសុខ និងស្ថិរភាពក្នុងតំបន់ ក៏ដូចជាវិបុលភាពរួមរបស់សមាគមផងដែរ។

ប្រតិភូចូលរួមកិច្ចប្រជុំថតរូបជុំគ្នា

* នៅខាងក្រៅកិច្ចប្រជុំ លោកឧត្តមសេនីយ៍ឯក Hoang Xuan Chien បានជួបទ្វេភាគីជាមួយលោក Datuk Lokman Hakim bin Ali អគ្គលេខាធិការនៃក្រសួងការពារជាតិម៉ាឡេស៊ី និងជួបជាមួយលោក Chan Heng Kee លេខាធិការអចិន្ត្រៃយ៍នៃក្រសួងការពារជាតិសិង្ហបុរី។

ក្នុងជំនួបទ្វេភាគីជាមួយលោក Hakim bin Ali អគ្គលេខាធិការនៃក្រសួងការពារជាតិម៉ាឡេស៊ី លោកឧត្តមសេនីយ៍ឯក Hoang Xuan Chien សង្ឃឹមថា នាពេលខាងមុខ ភាគីទាំងពីរបន្តបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសគណៈប្រតិភូជាន់ខ្ពស់ និងឆាប់រៀបចំកិច្ចសន្ទនាគោលនយោបាយការពារជាតិវៀតណាម-ម៉ាឡេស៊ីលើកទីមួយ; រក្សាកិច្ចសហប្រតិបត្តិការបណ្តុះបណ្តាល; សហប្រតិបត្តិការលើវិស័យដែលមានសក្តានុពលដូចជា ឧស្សាហកម្មការពារជាតិ ភស្តុភារ ពេទ្យយោធា ជំនួយមនុស្សធម៌ ជំនួយសង្គ្រោះគ្រោះមហន្តរាយ  ផ្លាស់ប្តូរព័ត៌មាន ការអនុវត្តច្បាប់ ការស្វែងរកនិងជួយសង្គ្រោះនៅសមុទ្រ ជួយនាវានេសាទនិងប្រជានេសាទរបស់គ្នាដែលជួបគ្រោះថ្នាក់នៅសមុទ្រ និងគាំទ្រគ្នាទៅវិញទៅមកនៅវេទិកា និងយន្តការពហុភាគី...។

លោកឧត្តមសេនីយ៍ឯក Hoang Xuan Chien ជួបទ្វេភាគីជាមួយលោក Datuk Lokman Hakim bin Ali អគ្គលេខាធិការនៃក្រសួងការពារជាតិម៉ាឡេស៊ី

លោក Hakim bin Ali មានបំណងចង់សហការយ៉ាងជិតស្និទ្ធនិងកាន់តែស៊ីជម្រៅថែមទៀតជាមួយវៀតណាម ដើម្បីជំរុញកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ រួមចំណែកយ៉ាងសំខាន់សម្រាប់ម៉ាឡេស៊ីសម្រេចបាននូវគោលដៅក្នុងឆ្នាំប្រធានអាស៊ាន ២០២៥; ព្រមទាំងឯកភាពជំរុញការរៀបចំកិច្ចសន្ទនាគោលនយោបាយការពារជាតិវៀតណាម-ម៉ាឡេស៊ី និងជំរុញកិច្ចសហប្រតិបត្តិការលើវិស័យដែលភាគីទាំងពីរមានតម្រូវការនិងប្រៀបខ្លាំង រួមមានឧស្សាហកម្មការពារជាតិផង​ដែរ។

ក្នុងជំនួបជាមួយលោក Chan Heng Kee លេខាធិការអចិន្ត្រៃយ៍នៃក្រសួងការពារជាតិសិង្ហបុរី ភាគីទាំងពីរបានសម្តែងការពេញចិត្តចំពោះលទ្ធផលនៃកិច្ចសហប្រតិបត្តិការលើវិស័យការពារជាតិទ្វេភាគីនាពេលថ្មីៗនេះ។ ព្រមទាំងបានឯកភាពបន្តជំរុញកិច្ចសហប្រតិបត្តិការលើវិស័យការពារជាតិទ្វេភាគី ដោយផ្តោតលើវិស័យមួយចំនួនដូចជា បង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសគណៈប្រតិភូជាន់ខ្ពស់ រក្សាប្រកបដោយប្រសិទ្ធភាពនូវយន្តការសហប្រតិបត្តិការដែលមានស្រាប់ ជាពិសេសយន្តការសន្ទនាគោលនយោបាយការពារជាតិ ការបណ្តុះបណ្តាល កិច្ចសហប្រតិបត្តិការរវាងអង្គភាពនានា សន្តិសុខតាមប្រព័ន្ធអ៊ីនធឺណិត ពេទ្យយោធា ការស្វែងរកនិងការជួយសង្គ្រោះ កិច្ចសហប្រតិបត្តិការរវាងស្ថាប័នស្រាវជ្រាវ បន្តពិគ្រោះយោបល់និងគាំទ្រគ្នាទៅវិញទៅមកនៅវេទិកាព យន្ដការហុភាគី និងយន្តការដឹកនាំដោយអាស៊ាន​។

ប្រធានគណៈប្រតិភូទាំងពីរក៏បានពិភាក្សាអំពីការត្រៀមរៀបចំកិច្ចសន្ទនាគោលនយោបាយការពារជាតិវៀតណាម-សិង្ហបុរីលើកទី១៦ នៅប្រទេសវៀតណាមនាពេលខាងមុខ៕

បកប្រែដោយ Pham Diep