អញ្ជើញថ្លែងមតិនៅក្នុងពិធី លោកឧត្តមសេនីយ៍ឯក Hoang Xuan Chien បានអះអាងថា គម្រោងសម្អាតសារធាតុគីមីពុល dioxin នៅតំបន់អាកាសយានដ្ឋាន Bien Hoa គឺជាគម្រោងមួយក្នុងចំណោមគម្រោងសំខាន់ ដែលបង្ហាញពីកិច្ចសហប្រតិបត្តិការប្រកបដោយប្រសិទ្ធភាពរវាងវៀតណាមនិងសហរដ្ឋអាមេរិក ក្នុងការជំនះផលវិបាកនៃសារធាតុគីមីពុល dioxin ក្រោយសង្គ្រាម រួមចំណែកដល់ការសម្រេចបាននូវការប្តេជ្ញាចិត្តរបស់ថ្នាក់ដឹកនាំជាន់ខ្ពស់នៃប្រទេសទាំងពីរ។ លោកឧត្តមសេនីយ៍ឯក Hoang Xuan Chien សង្ឃឹមថា ស្ថានទូតអាមេរិកប្រចាំនៅវៀតណាមនឹងបន្តយកចិត្តទុកដាក់ និងជំរុញរដ្ឋាភិបាល និងសភាអាមេរិក ដើម្បីធានាបាននូវដើមទុន ODA ឥតសំណង ព្រមទាំងបណ្តាប្រទេស អង្គការអន្តរជាតិ និងដៃគូនានានឹងចែករំលែក សហការ និងជួយគាំទ្រធនធានសម្រាប់ក្រសួងការពារប្រទេសវៀតណាម សម្អាតផ្ទៃដីទាំងមូលដែលបំពុលដោយសារធាតុគីមីពុល dioxin នៅវៀតណាម ព្រមទាំងពង្រីកការគាំទ្រ និងថែទាំជនរងគ្រោះដោយសារធាតុសារធាតុគីមីពុល dioxin នៅតាមមូលដ្ឋាន។

leftcenterrightdel
លោក Marc Knapper ឯកអគ្គរដ្ធទូត និងលោកឧត្តមសេនីយ៍ត្រី Nguyen Dinh Hien ចុះហត្ថលេខាលើកិច្ចព្រមព្រៀង

លោក Marc Knapper ឯកអគ្គរដ្ឋទូតអាមេរិកប្រចាំវៀតណាម បានឲ្យដឹងថា លទ្ធផលក្នុងកិច្ចសហប្រតិបត្តិការសម្អាតសារធាតុគីមីពុល dioxin មិនត្រឹមតែជួយសម្អាតបរិស្ថាន និងលើកកម្ពស់គុណភាពនៃជីវភាពរស់នៅរបស់ប្រជាជនវៀតណាមប៉ុណ្ណោះទេ ថែមទាំងរួមចំណែកពង្រឹងទំនុកចិត្តជាយុទ្ធសាស្ត្ររវាងប្រទេសទាំងពីរផងដែរ។ នេះជាសក្ខីភាពមួយចំពោះការប្តេជ្ញាចិត្តដ៏រឹងមាំ និងយូរអង្វែងរបស់សហរដ្ឋអាមេរិក ចំពោះការយកឈ្នះលើផលវិបាកនៃសង្គ្រាមនៅវៀតណាម ហើយជាជំហានដ៏សំខាន់មួយដើម្បីជម្រុញឲ្យទំនាក់ទំនងទ្វេភាគីឡើងដល់កម្រិតថ្មីមួយ ជាពិសេសក្នុងឱកាសរំលឹកខួបលើកទី៣០ នៃការធ្វើប្រក្រតីភាពឡើងវិញនូវទំនាក់ទំនងការទូត។

ក្នុងពិធីនេះ តំណាងស្ថានទូតអាមេរិកប្រចាំនៅវៀតណាមបានប្រគល់វិញ្ញាបនបត្រប្រគល់ដីដែលបានសម្អាតសារធាតុគីមីពុល dioxin ចំនួន ៦ ហិកតានៅអាកាសយានដ្ឋាន Bien Hoa។

លោក Marc Knapper ឯកអគ្គរដ្ធទូត និងលោកឧត្តមសេនីយ៍ត្រី Nguyen Dinh Hien មេបញ្ជាការនៃកងឯកភាពទ័ពជំនាញគីមីសាស្រ្ត និងជាអគ្គនាយកនៃមជ្ឈមណ្ឌលសកម្មភាពជាតិសម្រាប់ជំនះផលវិបាកសារធាតុគីមីពុល និងបរិស្ថាន (NACCET) បានចុះហត្ថលេខាលើកិច្ចព្រមព្រៀងស្ដីពីផ្តល់បន្ថែមដើមទុន ODA ចំនួន ៣២ លានដុល្លារ ដើម្បីបន្តពង្រីកគម្រោងគាំទ្រការលើកកម្ពស់គុណភាពនៃជីវភាពរស់នៅរបស់ជនពិការក្នុងខេត្តរងផលប៉ះពាល់ដោយសារការបាញ់សារធាតុគីមីពុល dioxin។

ក្នុងក្របខ័ណ្ឌនៃព្រឹត្តិការណ៍នេះ ប្រតិភូទាំងឡាយបានចូលរួមពិធីបើកការដ្ឋានសាងសង់ និងដំឡើងប្រព័ន្ធបច្ចេកវិជ្ជាកម្ដៅដើម្បីសម្អាតសារធាតុគីមីពុល dioxin៕

បកប្រែដោយ Thuy Anh