គណៈកម្មាធិការបក្សយោធាមជ្ឈិម ក្រសួងការពារប្រទេសវៀតណាមជួបសំណេះសំណាលជាមួយទីភ្នាក់ងារសារព័ត៌មាន

បន្ទាប់ពីបានស្តាប់ការចែករំលែកពីតំណាងទីភ្នាក់ងារសារព័ត៌មាន លោកនាយឧត្តមសេនីយ៍ Phan Van Giang អបអរសាទរចំពោះថ្នាក់ដឹកនាំទីភ្នាក់ងារសារព័ត៌មាន និងអ្នកសារព័ត៌មានក្នុងឱកាសរំលឹកខួបលើកទី ១០០ នៃទិវាសារព័ត៌មានបដិវត្តន៍វៀតណាម និងថ្លែងអំណរគុណយ៉ាងជ្រាលជ្រៅចំពោះអ្នកសារព័ត៌មានបដិវត្តន៍គ្រប់ជំនាន់  ជាពិសេសអ្នកកាសែតជាយុទ្ធជនដែលបានលះបង់ដើម្បីឯករាជ្យជាតិ និងបុព្វហេតុសារព័ត៌មានបដិវត្តន៍វៀតណាម។

លោកនាយឧត្តមសេនីយ៍ Phan Van Giang ថ្លែងក្នុងជំនួប

លោកនាយឧត្តមសេនីយ៍ Phan Van Giang បានអះអាងថា សារព័ត៌មានគឺជា “កម្លាំងពិសេស” លើវិស័យសតិអារម្មណ៍ និងវប្បធម៌របស់បក្ស ព្រមទាំងសង្កត់ធ្ងន់លើតួនាទីរបស់សារព័ត៌មានក្នុងការឃោសនា លើកទឹកចិត្ត និងឆ្លុះបញ្ចាំងគ្រប់ទិដ្ឋភាពនៃសកម្មភាពរបស់កងទ័ព តាំងពីសម័យសង្គ្រាម រហូតដល់សម័យសន្តិភាពនៃការកសាងប្រទេសជាតិ។ សារព័ត៌មានបានឆ្លុះបញ្ចាំងទាន់ពេល និងជូនព័ត៌មានដល់ប្រជាជន និងមិត្តភក្តិអន្តរជាតិអំពីកងទ័ពប្រជាជនវៀតណាមបដិវត្តន៍ ចំណាន របៀបរៀបរយ ទំនើប ការពារយ៉ាងរឹងមាំនូវឯករាជ្យ អធិបតេយ្យភាព បូរណភាពទឹកដីនិងសុខសន្តិភាពរបស់ប្រជាជន។

ឈានចូលដំណាក់កាលអភិវឌ្ឍន៍ថ្មីរបស់ប្រទេសជាតិ លោកនាយឧត្តមសេនីយ៍ Phan Van Giang សង្ឃឹមថា សារព័ត៌មានបដិវត្តន៍វៀតណាមនឹងបន្តលើកកំពស់ប្រពៃណី ១០០ ឆ្នាំដ៏ត្រចេះត្រចង់ រួមដំណើរជាមួយបក្ស ប្រជាជនទាំងមូល និងកងទ័ពទាំងមូលសម្រេចបានជោគជ័យនូវគោលដៅយុទ្ធសាស្ត្រ កសាងប្រទេសអភិវឌ្ឍន៍យ៉ាងឆាប់រហ័ស និងនិរន្តរភាព និងការពារយ៉ាងរឹងមាំនូវមាតុភូមិវៀតណាមសង្គមនិយម។

លោកនាយឧត្តមសេនីយ៍ Phan Van Giang ប្រគល់ប័ណ្ណសរសើរជូនអង្គភាពនិងបុគ្គលដែលមានស្នាដៃល្អក្នុងការងារឃោសនា

លោកឧត្តមសេនីយ៍ឯក Trinh Van Quyet ប្រធានអគ្គស្នងការនយោបាយនៃកងទ័ពប្រជាជនវៀតណាម ប្រគល់ប័ណ្ណសរសើរជូនអង្គភាពនិងបុគ្គលដែលមានស្នាដៃល្អ

លោកនាយឧត្តមសេនីយ៍ Phan Van Giang និងប្រតិភូទាំងឡាយថតរូបជុំគ្នា

ក្នុងឱកាសនេះ គណៈកម្មាធិការបក្សយោធាមជ្ឈិម ក្រសួងការពារប្រទេស បានប្រគល់ប័ណ្ណសរសើរជូនអង្គភាពចំនួន ២៤ និងបុគ្គលចំនួន ៣៣ នាក់ ដែលមានស្នាដៃល្អក្នុងការងារឃោសនាអំពីភារកិច្ចយោធា ការពារជាតិ និងការកសាងកងទ័ពប្រជាជនវៀតណាម ដំណាក់កាល ២០២០-២០២៥៕

បកប្រែដោយ Pham Diep