លោកនាយឧត្តមសេនីយ៍ Phan Van Giang អញ្ជើញចូលរួមពិធីបូកសរុបលទ្ធផលពានរង្វាន់យុវជនច្នៃប្រឌិតក្នុងជួរកងទ័ព

ក្នុងប៉ុន្មានឆ្នាំកន្លងមក ចលនា "វ័យក្មេងច្នៃប្រឌិត" និងពានរង្វាន់យុវជនច្នៃប្រឌិតក្នុងជួរកងទ័ពត្រូវបានរៀបចំ និងអនុវត្តយ៉ាងតឹងរឹង និងមានប្រសិទ្ធភាព។ កងទ័ពទាំងមូលមានគម្រោង និងគំនិតផ្តួចផ្តើមកម្រិតមូលដ្ឋានចំនួនរាប់ម៉ឺន។ ក្នុងដំណាក់កាល ២០២០-២០២៥ មានគម្រោងចំនួន ៣,៤៧៦ (កើនឡើង ២៧.៥% បើធៀបនឹងដំណាក់កាល ២០១៥-២០២០) របស់បុគ្គល និងអង្គភាពជាង ១០,០០០ ដែលចូលរួមប្រកួតប្រជែងក្នុងកងទ័ពទាំងមូល។

ពានរង្វាន់លើកទី ២៥ នេះ កងទ័ពទាំងមូលមានគម្រោងចំនួន ៨២០ របស់បុគ្គលចំនួន ២,១៨៨ នាក់ ដែលបានចូលរួម ហើយកើនឡើងចំនួន ៣៥ គម្រោង និង ២ អង្គភាព បើធៀបនឹងពានរង្វាន់លើកទី ២៤ ក្នុងជំនាញចំនួន ១២។ ក្រុមប្រឹក្សាឯកទេសបានធ្វើការត្រួតពិនិត្យ និងវាយតម្លៃយ៉ាងតឹងរ៉ឹង។

លោកនាយឧត្តមសេនីយ៍ Phan Van Giang ថ្លែងក្នុងពិធីបូកសរុបលទ្ធផលពានរង្វាន់យុវជនច្នៃប្រឌិតក្នុងជួរកងទ័ព

តាងនាមគណៈកម្មាធិការបក្សយោធាមជ្ឈិម និងថ្នាក់ដឹកនាំក្រសួងការពារប្រទេស លោកនាយឧត្តមសេនីយ៍ Phan Van Giang បានអបអរសាទរ និងកោតសរសើរចំពោះការខិតខំប្រឹងប្រែង និងស្នាដៃឆ្នើមរបស់យុវជនក្នុងជួរកងទ័ព និងវាយតម្លៃខ្ពស់ចំពោះការដឹកនាំ ការរៀបចំ និងការគ្រប់គ្រងរបស់អង្គភាពនានារបស់ក្រសួងការពារប្រទេស និងការសម្របសម្រួលនិងការគាំទ្រពីក្រសួង ស្ថាប័ន និងអង្គភាពមជ្ឈិមនានាសម្រាប់រាល់សកម្មភាពរបស់យុវជនក្នុងកងទ័ពទាំងមូល ក៏ដូចជាពានរង្វាន់នាពេលកន្លងមក។

លោកនាយឧត្តមសេនីយ៍ Phan Van Giang និងលោកឧត្តមសេនីយ៍ឯក Trinh Van Quyet ប្រធានអគ្គស្នងការនយោបាយនៃកងទ័ពប្រជាជនវៀតណាម ប្រគល់ប័ណ្ណសរសើរពីនាយករដ្ឋមន្ត្រី និងរដ្ឋមន្ត្រីក្រសួងការពារប្រទេសជូនចំពោះអង្គភាព និងបុគ្គលដែលមានស្នាដៃល្អ

លោករដ្ឋមន្ត្រី Phan Van Giang បានស្នើឱ្យគណៈកម្មាធិការបក្ស និងមេបញ្ជាការគ្រប់លំដាប់ថ្នាក់គួរតែបង្កើនការដឹកនាំ និងជំរុញចលនា "វ័យក្មេងច្នៃប្រឌិត" និងពានរង្វាន់យុវជនច្នៃប្រឌិតក្នុងជួរកងទ័ព ព្រមទាំង ផ្តោតលើការឃោសនា អប់រំ លើកទឹកចិត្ត បំផុសគំនិត បង្កើតលក្ខខណ្ឌអំណោយផលសម្រាប់យុវជននៃកងទ័ពទាំងមូលលើកកម្ពស់ឆន្ទៈខ្លួនឯង ជឿជាក់លើខ្លួនឯង និងសកម្មក្នុងការស្រាវជ្រាវ ច្នៃប្រឌិត និងប្រើប្រាស់លទ្ធផលស្រាវជ្រាវចូលក្នុងការងារនយោបាយរបស់អង្គភាពនិងកងទ័ពទាំងមូល។​ ព្រមទាំងបន្តកសាង និងពង្រីកការស្រាវជ្រាវវិទ្យាសាស្ត្រសម្រាប់យុវជន បង្កើនការស្រាវជ្រាវវិទ្យាសាស្ត្ររវាងស្ថាប័ននិងអង្គភាព បង្កើតក្រុមស្រាវជ្រាវវ័យក្មេងដែលមានសមត្ថភាពខ្ពស់ និងធ្វើសមាហរណកម្មជាមួយតំបន់និងពិភពលោក។ ក្រៅពីនេះ លើកសរសើរនិងផ្ដល់រង្វាន់ដល់បុគ្គលនិងអង្គភាពដែលមានស្នាដៃឆ្នើម រួមចំណែកដល់ការអភិវឌ្ឍវិទ្យាសាស្ត្រ និងបច្ចេកវិទ្យា នវានុវត្ដន៍ និងការធ្វើបរិវត្ដកម្មឌីជីថលក្នុងកងទ័ព។

លោកនាយឧត្តមសេនីយ៍ Phan Van Giang បន្ថែមថា បុគ្គលនិងអង្គភាពដែលទទួលរង្វាន់ថ្ងៃនេះ គួរតែបន្ដខិតខំប្រឹងប្រែងស្រាវជ្រាវវិទ្យាសាស្ត្រ ចែករំលែកបទពិសោធន៍ និងរីកសាយភាយពានរង្វាន់ឲ្យកាន់តែទូលំទូលាយ និងមានប្រសិទ្ធភាពក្នុងជួរកងទ័ពទាំងមូល និងទូទាំងប្រទេស។

ថ្នាក់ដឹកនាំក្រសួងការពារប្រទេសអញ្ជើញទស្សនាស្តង់តាំងពិព័រណ៌គម្រោង ដែលចូលរួមពានរង្វាន់យុវជនច្នៃប្រឌិតក្នុងជួរកងទ័ព

នៅចុងបញ្ចប់ ថ្នាក់ដឹកនាំក្រសួងការពារប្រទេសបានប្រគល់រង្វាន់ដល់បុគ្គលនិងអង្គភាពដែលមានស្នាដៃល្អក្នុងការចូលរួមពាន​រង្វាន់លើកទី ២៥ ដំណាក់កាល ២០២០-២០២៥៕

បកប្រែដោយ Pham Diep