វៀតណាមបន្តបញ្ជូននាយទាហានទៅបំពេញបេសកកម្មរក្សាសន្តិភាព

លោកវរសេនីយ៍ត្រី Tran Viet Cuong កងឯកភាពទ័ពរថក្រោះ រថពាសដែក ត្រូវបានបញ្ជូនទៅបំពេញបេសកកម្មរក្សាសន្តិភាពរបស់អង្គការសហប្រជាជាតិ ដើម្បីជំនួសលោកអនុសេនីយ៍ឯក Nguyen Tien Long ជាអ្នកសង្កេតការណ៍យោធា នៃស្ថានបេសកកម្មរក្សាសន្តិភាពអង្គការសហប្រជាជាតិនៅស៊ូដង់ខាងត្បូង (UNMISS)។

លោកឧត្តមសេនីយ៍ឯក Hoang Xuan Chien ប្រគល់សេចក្តីសម្រេចចិត្តរបស់ប្រធានរដ្ឋដល់លោកវរសេនីយ៍ត្រី Tran Viet Cuong

លោកឧត្តមសេនីយ៍ឯក Hoang Xuan Chien បានស្នើឲ្យលោក Tran Viet Cuong ពង្រីកប្រពៃណីរបស់កងទ័ពប្រជាជនវៀតណាម និងកងកម្លាំងរបស់វៀតណាមដែលចូលរួមក្នុងសកម្មភាពរក្សាសន្តិភាពរបស់អង្គការសហប្រជាជាតិ ប្តេជ្ញាបំពេញល្អភារកិច្ច រួមចំណែកបញ្ជាក់ពីភាពអង់អាចក្លាហាន និងបញ្ញារបស់កងទ័ពលោកអ៊ំ ហូ។ នៅស្ថានបេសកកម្ម លោក Tran Viet Cuong ត្រូវជំរុញស្មារតីសាមគ្គីភាពអន្តរជាតិ សាមគ្គីភាពផ្ទៃក្នុង សហការយ៉ាងជិតស្និទ្ធក្នុងការបំពេញភារកិច្ច និងធានាបាននូវសុវត្ថិភាពយ៉ាងដាច់ខាត។

តាងនាមគណៈកម្មាធិការបក្សយោធាមជ្ឈិម ក្រសួងការពារប្រទេស ក្រុមការងារអន្តរវិស័យ លោកឧត្តមសេនីយ៍ឯក Hoang Xuan Chien  បានទទួលស្គាល់ និងកោតសរសើរនាយកដ្ឋានរក្សាសន្តិភាពវៀតណាម និងអង្គភាពពាក់ព័ន្ធដែលបំពេញល្អនូវភារកិច្ចត្រៀមរៀបចំ បង្វឹកបង្ហាត់ និងបណ្តុះបណ្តាលធនធានមនុស្សសម្រាប់ភារកិច្ចសំខាន់ ហើយជឿជាក់ថា វៀតណាមនឹងមានបុគ្គល និងកងកម្លាំងឆ្នើមបន្ថែមទៀត ដើម្បីរួមចំណែកក្នុងបេសកកម្មរក្សាសន្តិភាពរបស់អង្គការសហប្រជាជាតិ លើកកម្ពស់តួនាទី និងរូបភាពរបស់វៀតណាមក្នុងក្រសែភ្នែកមិត្តអន្តរជាតិ៕

បកប្រែដោយ Thuy Anh