សម្រេចបានគោលដៅ និងភារកិច្ចយោធា ការពារជាតិដោយលទ្ធផលខ្ពស់ជាងឆ្នាំ ២០២១

អញ្ជើញចូលរួមមានលោកនាយឧត្តមសេនីយ៍ Luong Cuong សមាជិកការិយាល័យនយោបាយ សមាជិកអចិន្ត្រៃយ៍នៃគណៈកម្មាធិការបក្សយោធាមជ្ឈិម ប្រធានអគ្គស្នងការនយោបាយនៃកងទ័ពប្រជាជនវៀតណាម; លោក Le Minh Hung លេខាគណៈកម្មាធិការមជ្ឈិមបក្ស ប្រធានខុទ្ទកាល័យមជ្ឈិមបក្ស រួមទាំងថ្នាក់ដឹកនាំមកពីស្ថាប័ន និងអង្គភាពនានាក្នុងជួរកងទ័ព​ផង​ដែរ។

អគ្គលេខាបក្ស Nguyen Phu Trong និងថ្នាក់ដឹកនាំក្រសួងការពារប្រទេស និងប្រតិភូបានចូលរួមសន្និសីទ

ថ្លែងរបាយការណ៍បូកសរុបការងារយោធា និងការពារជាតិ លោកឧត្តមសេនីយ៍ឯក Nguyen Tan Cuong សមាជិកអចិន្ត្រៃយ៍នៃគណៈកម្មាធិការបក្សយោធាមជ្ឈិម ប្រធានអគ្គសេនាធិការនៃកងទ័ពប្រជាជនវៀតណាមបានអះអាងថា៖ ក្នុងឆ្នាំ២០២២ គណៈកម្មាធិការបក្សយោធាមជ្ឈិម និងក្រសួងការពារប្រទេស បានដឹកនាំកងទ័ពទាំងមូលលើកកម្ពស់ស្មារតី សាមគ្គីភាព ឯកភាព ខិតខំអស់ពីសមត្ថភាពដើម្បីសម្រេចបានគោលដៅ និងភារកិច្ចយោធា និងការពារជាតិដោយលទ្ធផលខ្ពស់ជាងឆ្នាំ ២០២១។

ក្រសួងការពារប្រទេសបានក្ដាប់ជាប់ និងព្យាករណ៍ស្ថានការណ៍បានត្រឹមត្រូវ និងផ្ដល់ប្រឹក្សាជូនបក្ស រដ្ឋ បានទាន់ពេលដើម្បីដោះស្រាយស្ថានការណ៍ដោយភាពបត់បែន និងប្រកបដោយប្រសិទ្ធភាព មិនទុកឲ្យមានភាពអសកម្ម ឬ ជាយថាហេតុកើតឡើងដោយមិនក្តាប់បានទេ។ ព្រមទាំងសហការយ៉ាងជិតស្និទ្ធជាមួយស្ថាប័ន ក្រសួង និងមូលដ្ឋាននានាដើម្បីអនុវត្តយុទ្ធសាស្រ្ត គម្រោង និងប្រព័ន្ធច្បាប់លើយោធា-ការពារជាតិប្រកបដោយប្រសិទ្ធភាព; កងទ័ពទាំងមូលរក្សាយ៉ាងតឹងរ៉ឹងនូវរបៀបរៀបរយ និងការត្រៀមខ្លួនប្រយុទ្ធ គ្រប់គ្រងយ៉ាងតឹងរ៉ឹងលើដែនអាកាស សមុទ្រ ព្រំដែន និងតាមប្រព័ន្ធអុីនធឺណិត។ ម្ចាស់ការត្រៀមផែនការ ប្រមូលផ្ដុំកងកម្លាំង និងមធ្យោបាយបានទាន់ពេលដើម្បីជួយឲ្យមូលដ្ឋានទប់ទល់នឹងគ្រោះធម្មជាតិ ការស្វែងរក និងជួយសង្គ្រោះ។

លោកនាយឧត្តមសេនីយ៍ Phan Van Giang និងលោកនាយឧត្តមសេនីយ៍ Luong Cuong ប្រគល់ទង់ប្រឡងប្រណាំងរបស់ក្រសួងការពារប្រទេសជូនចំពោះអង្គភាពដែលមានស្នាដៃល្អក្នុងចលនាប្រឡងប្រណាំងប្តេជ្ញាឈ្នះឆ្នាំ២០២២

ថ្លែងមតិនៅសន្និសីទ តាងនាមគណៈកម្មាធិការបក្សយោធាមជ្ឈិម និងក្រសួងការពារប្រទេស លោកនាយឧត្តមសេនីយ៍ Phan Van Giang បានថ្លែងអំណរគុណចំពោះការដឹកនាំរបស់បក្ស រដ្ឋ និងលោកអគ្គលេខាបក្សផ្ទាល់ចំពោះការរីកធំធាត់នៃកងទ័ព ដោយធានាឲ្យកងទ័ពទទួលបានជោគជ័យជានិច្ច និងសម្រេចបានគ្រប់ភារកិច្ចដែលបានប្រគល់ឱ្យ។ ដើម្បីសម្រេចបានជោគជ័យនូវភារកិច្ចក្នុងឆ្នាំ ២០២៣ និងឆ្នាំបន្តបន្ទាប់ ជាពិសេសខ្លឹមសារដែលដឹកនាំបញ្ជាដោយលោកអគ្គលេខាបក្ស Nguyen Phu Trong នោះ លោករដ្ឋមន្ត្រី Phan Van Giang បានស្នើឱ្យគណៈកម្មាធិការបក្ស មេបញ្ជាការនៃស្ថាប័ន អង្គភាពកងទ័ពគ្រប់កំរិតត្រូវតែសិក្សាស្រាវជ្រាវ ព្យាករណ៍ និងផ្តល់ប្រឹក្សាជូនបក្ស និងរដ្ឋលើគោលការណ៍ និងវិធានការឱ្យបានទាន់ពេលវេលា ដោះស្រាយដោយជោគជ័យនូវរាល់ស្ថានភាពយោធា ការពារជាតិ មិនទុកឲ្យមានភាពអសកម្ម ឬ ស្ថានភាពជាយថាហេតុកើតមានឡើងដោយក្តាប់មិនបានឡើយ។ ទន្ទឹមនឹងនោះ ផ្តោតលើការអនុវត្តប្រកបដោយប្រសិទ្ធភាពនូវសេចក្ដីសម្រេចចិត្ដ ការសន្និដ្ឋាន យុទ្ធសាស្រ្ត គម្រោង និងប្រព័ន្ធច្បាប់ស្តីពីយោធា-ការពារជាតិ។ ទន្ទឹមនឹងនោះ ផ្តោតលើការលើកកម្ពស់គុណភាពរួម និងកម្លាំងប្រយុទ្ធរបស់កងទ័ព; រក្សារបបត្រៀមខ្លួនប្រយុទ្ធ គ្រប់គ្រងយ៉ាងតឹងរ៉ឹងលើដែនអាកាស សមុទ្រ ព្រំដែន ការពារយ៉ាងរឹងមាំនូវអធិបតេយ្យភាព បូរណភាពទឹកដី សកម្មភាពអភិវឌ្ឍសេដ្ឋកិច្ចសង្គម សហការយ៉ាងជិតស្និទ្ធជាមួយនគរបាល និងស្ថាប័នមានសមត្ថកិច្ចដើម្បីរក្សាសន្តិសុខនយោបាយ សណ្តាប់ធ្នាប់សង្គមនៅទូទាំងប្រទេស៕

បកប្រែដោយ Pham Diep