ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ឥណ្ឌា ត្រូវបានពង្រឹង និងពង្រីក

អ្នកការទូតឥណ្ឌារូបនេះបានសង្កត់ធ្ងន់លើតម្រូវការក្នុងការពង្រឹងសសរស្តម្ភប្រពៃណីនៃប្រទេសទាំងពីរដោយផ្អែកលើទំនុកចិត្តជាយុទ្ធសាស្ត្រ ទំនាក់ទំនងវប្បធម៌ និងប្រវត្តិសាស្ត្រយូរអង្វែង និងកិច្ចសហប្រតិបត្តិការកាន់តែកើនឡើងក្នុងវិស័យថ្មីៗ។

ឥណ្ឌាគឺជាប្រទេសមួយក្នុងចំណោមប្រទេសដំបូងដែលបានបង្កើតទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាមនៅឆ្នាំ ២០១៦ ដោយផ្អែកលើមិត្តភាពយូរអង្វែង និងទំនាក់ទំនងជិតស្និទ្ធរវាងប្រទេសទាំងពីរដែលត្រូវបានពូនជ្រំមុនពេលបង្កើតទំនាក់ទំនងការទូតជាផ្លូវការនៅឆ្នាំ១៩៧២។ លោក Sherpa បញ្ជាក់ថា បច្ចុប្បន្ន ទំនាក់ទំនងទ្វេភាគីត្រូវបានពង្រីក និងពង្រឹងកាន់តែខ្លាំងឡើង។ វៀតណាមគឺជាដៃគូសំខាន់មួយនៅក្នុង "គោលនយោបាយឆ្ពោះទៅទិសខាងកើត" របស់ឥណ្ឌា និងនៅក្នុងតំបន់ឥណ្ឌូ-ប៉ាស៊ីហ្វិក ដោយផ្អែកលើផលប្រយោជន៍រួមដើម្បីសន្តិភាព ស្ថិរភាព និងវិបុលភាពនៅក្នុងតំបន់។

នៅរសៀលថ្ងៃទី ១២ ខែធ្នូ ឆ្នាំ ២០២៥ លោក Luong Cuong ប្រធានរដ្ឋ ទទួលលោក Tshering Wangchuk Sherpa ឯកអគ្គរដ្ឋទូតឥណ្ឌា ដែលមកជូនសារតាំង (រូបថត៖ vnanet.vn)

ដោយរំលឹកឡើងវិញនូវសមិទ្ធផលដែលប្រទេសទាំងពីរសម្រេចបានក្នុងវិស័យជាច្រើន ចាប់ពីកិច្ចសហប្រតិបត្តិការនយោបាយ ដៃគូអភិវឌ្ឍន៍ ការពារជាតិ និងសន្តិសុខ ពាណិជ្ជកម្ម និងវិនិយោគ ដល់ជំនួបប្រាស្រ័យរវាងប្រជាជន និងប្រជាជន លោកឯកអគ្គរដ្ឋទូតបានសម្តែងទំនុកចិត្តថា ទំនាក់ទំនងទ្វេភាគីនឹងបន្តត្រូវបានពូនជ្រំ និងអភិវឌ្ឍបន្ថែមទៀតនាពេលអនាគត។

លោកចាត់ទុកថា នវានុវត្តន៍ បច្ចេកវិទ្យាសំខាន់ៗ បច្ចេកវិទ្យាថ្មីៗ ថាមពលកកើតឡើងវិញ និងសុខាភិបាល គឺជាវិស័យដែលមានសក្តានុពលសម្រាប់កិច្ចសហប្រតិបត្តិការរវាងប្រទេសទាំងពីរ។ ក្នុងនោះ បញ្ញាសិប្បនិម្មិត (AI) ផលិតកម្មទំនើប បច្ចេកវិទ្យាអវកាស ដំណោះស្រាយឌីជីថលសម្រាប់អភិបាលកិច្ចល្អ ទិន្នន័យ និងសន្តិសុខតាមអ៊ីនធឺណិត... ត្រូវបានចាត់ទុកថាជាវិស័យសហប្រតិបត្តិការដែលមានឱកាសអភិវឌ្ឍជាច្រើន។

លោកឯកអគ្គរដ្ឋទូតក៏បង្ហាញផងដែរថា កិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងឥណ្ឌា និងវៀតណាម មានការអភិវឌ្ឍមិនទាន់សមស្របនឹងទំនាក់ទំនងការទូតទ្វេភាគីនោះទេ។ ដូច្នេះ ការជម្រុញកិច្ចសហប្រតិបត្តិការ និងការតភ្ជាប់រវាងសហគមន៍ធុរកិច្ចនៃប្រទេសទាំងពីរគួរតែក្លាយជាអាទិភាពកំពូល។ ទន្ទឹមនឹងនោះ វឌ្ឍនភាពគួរឲ្យកត់សម្គាល់ក្នុងកិច្ចសហប្រតិបត្តិការលើវិស័យហេដ្ឋារចនាសម្ព័ន្ធឌីជីថល បច្ចេកវិទ្យាហិរញ្ញវត្ថុ ឧស្សាហកម្មយានយន្តអគ្គិសនី ការផលិតរថយន្ត ឱសថ និងអេឡិចត្រូនិច វិស័យហិរញ្ញវត្ថុ និងការទូទាត់ឌីជីថល ក៏ជាវិស័យសហប្រតិបត្តិការមានសក្តានុពលសម្រាប់កិច្ចសហប្រតិបត្តិការផងដែរ ដែលនាំមកនូវអត្ថប្រយោជន៍ប្រកបដោយចីរភាពដល់ភាគីទាំងពីរ។

លោកបានឲ្យដឹងថា ឥណ្ឌាកំពុងសហការជាមួយវៀតណាម និងប្រទេសសមាជិកអាស៊ានផ្សេងទៀត ពិនិត្យ និងធ្វើបច្ចុប្បន្នភាពកិច្ចព្រមព្រៀងពាណិជ្ជកម្មទំនិញអាស៊ាន-ឥណ្ឌា (AITIGA) ឆ្នាំ២០០៩ ដើម្បីស្របនឹងបរិបទបច្ចុប្បន្ន។ ការពិនិត្យឡើងវិញនេះមានគោលបំណងបង្កើនភាពធន់នៃពាណិជ្ជកម្ម និងអាជីវកម្មក្នុងបរិបទដែលស្ថានភាពពិភពលោកកំពុងប្រែប្រួល ព្រមទាំង ធានាបាននូវស្ថិរភាពនៃខ្សែសង្វាក់ផ្គត់ផ្គង់។ អ្នកការទូតបានសម្តែងក្តីសង្ឃឹមថា វៀតណាមនឹងបន្តគាំទ្រយ៉ាងសកម្មដល់ដំណើរការនេះ។

យោងតាមលោកឯកអគ្គរដ្ឋទូត ប្រទេសទាំងពីរគប្បីពង្រឹងកិច្ចសហប្រតិបត្តិការបន្ថែមទៀតនៅក្នុងវិស័យថ្មីៗ រួមទាំងថាមពលកកើតឡើងវិញ ថាមពលកាបូនទាប វិទ្យាសាស្ត្រ និងបច្ចេកវិទ្យា ព្រមទាំង ការជម្រុញនវានុវត្តន៍ ដោយកំណត់ថា ទាំងនេះជាវិស័យអាទិភាពកំពូលសម្រាប់កិច្ចសហប្រតិបត្តិការនាពេលអនាគត។

ទាក់ទងនឹងកិច្ចសហប្រតិបត្តិការវប្បធម៌ និងអប់រំ លោក Sherpa ឯកអគ្គរដ្ឋទូត បានបញ្ជាក់ពីការប្តេជ្ញាចិត្តរបស់ឥណ្ឌាក្នុងការពិចារណាបង្កើនអាហារូបករណ៍សម្រាប់វៀតណាម ក្នុងក្របខ័ណ្ឌនៃកម្មវិធីសហប្រតិបត្តិការបច្ចេកទេស និងសេដ្ឋកិច្ចរបស់ឥណ្ឌា (ITEC)៕

បកប្រែដោយ Thuy Anh