ភាពក្លាហាន និងសកម្មភាពដើម្បីប្រទេសវៀតណាមមួយដ៏រុងរឿង សុខសាន្ត និងសុភមង្គល

អ្នកយកព័ត៌មាន៖ សូមគោរពលោកអគ្គលេខាបក្ស និងជាលេខានៃគណៈកម្មាធិការបក្សយោធាមជ្ឈិមជាទីគោរព នៅពេលដែលឆ្នាំ២០២៥ បានបញ្ចប់ ដោយក្រឡេកមើលទៅឆ្នាំកន្លងមកនេះ តើលោកវាយតម្លៃពីសមិទ្ធផលសំខាន់ៗដែលប្រទេសវៀតណាមសម្រេចបានយ៉ាងដូចម្តេច?

លោក To Lam អគ្គលេខាបក្ស៖ ឆ្នាំ២០២៥ គឺជាឆ្នាំដែលមានបញ្ហាប្រឈមជាច្រើន ប៉ុន្តែក៏ជាឆ្នាំគួរឱ្យចងចាំ និងគួរឱ្យមានក្តីមោទនយ៉ាងខ្លាំងផងដែរ។ ពិភពលោកនៅតែបន្តមើលឃើញការផ្លាស់ប្តូរយ៉ាងឆាប់រហ័ស ស្មុគស្មាញ និងមិនអាចទាយទុកជាមុនបាន។ ការប្រកួតប្រជែងជាយុទ្ធសាស្ត្ររវាងមហាអំណាចកំពុងកាន់តែខ្លាំងឡើង។ បញ្ហាប្រឈមសន្តិសុខប្រពៃណី និងមិនមែនប្រពៃណីត្រូវបានប្រទាក់ក្រឡាគ្នា ដែលជះឥទ្ធិពលយ៉ាងទូលំទូលាយដល់ភារកិច្ចការពារមាតុភូមិ។ ឧបសគ្គ និងបញ្ហាប្រឈមទាំងនេះប៉ះពាល់ដោយផ្ទាល់ដល់ប្រទេសវៀតណាម ដែលបង្កការលំបាកយ៉ាងច្រើនសម្រាប់ភាពជាអ្នកដឹកនាំ ការណែនាំ និងការគ្រប់គ្រង ការអភិវឌ្ឍប្រទេសជាតិ។ នៅក្នុងបរិបទនេះ វាជាការសរសើរយ៉ាងខ្លាំងដែលយើងបានរក្សាស្ថិរភាពនយោបាយ និងសង្គម ការអភិវឌ្ឍសេដ្ឋកិច្ចប្រកបដោយចីរភាព ពង្រឹងទំនុកចិត្តរបស់ប្រជាជន និងបន្តកសាងមូលដ្ឋានគ្រឹះសំខាន់ៗសម្រាប់ដំណាក់កាលបន្ទាប់នៃការអភិវឌ្ឍ។ អាចបញ្ជាក់បានថា ប្រទេសរបស់យើងបានឆ្លងកាត់ឆ្នាំ ២០២៥ ដោយភាពធន់ ឯកភាព និងស្មារតីសកម្មក្នុងការយកឈ្នះលើការលំបាក។

ទោះបីជាប្រឈមមុខនឹងផលប៉ះពាល់អវិជ្ជមានពីខាងក្រៅជាច្រើនក៏ដោយ យើងបានរក្សាស្ថិរភាពម៉ាក្រូសេដ្ឋកិច្ច គ្រប់គ្រងអតិផរណា និងធានាបាននូវតុល្យភាពសំខាន់ៗនៃសេដ្ឋកិច្ច។ គោលនយោបាយសំខាន់ៗជាច្រើនត្រូវបានអនុវត្តជាក់ស្តែង ឧបសគ្គជាច្រើនត្រូវបានដោះស្រាយ ហើយការសម្រេចចិត្តសំខាន់ៗជាច្រើនត្រូវបានដាក់ចេញ និងអនុវត្ត ដោយមានចំណុចលេចធ្លោគឺបដិវត្តន៍ក្នុងការរៀបចំរចនាសម្ព័ន្ធក្បាលម៉ាស៊ីននៃប្រព័ន្ធនយោបាយឡើងវិញឱ្យមានភាពប្រសើរ ប្រសិទ្ធភាព ដោយអនុវត្តគំរូអាជ្ញាធរមូលដ្ឋានពីរជាន់ថ្នាក់ និងរបកគំហើញថ្មីៗក្នុងវិទ្យាសាស្ត្រ បច្ចេកវិទ្យា នវានុវត្តន៍ និងការផ្លាស់ប្តូរឌីជីថល...នេះគឺជាលទ្ធផលនៃដំណើរការដ៏វែងឆ្ងាយនៃការប្រមូលផ្តុំកម្លាំងផ្ទៃក្នុង និងការកែទម្រង់ និងការច្នៃប្រឌិតជាបន្តបន្ទាប់អស់រយៈពេលជាច្រើនឆ្នាំ។

ក្នុងគ្រាលំបាក ស្មារតីសាមគ្គីភាព ភាតរភាព និងការទទួលខុសត្រូវរបស់សហគមន៍នៅតែបន្តត្រូវបានលើកកម្ពស់យ៉ាងខ្លាំង។ រាល់គោលនយោបាយសុខុមាលភាពសង្គម ការថែទាំអតីតយុទ្ធជននិងក្រុមអ្នកងាយរងគ្រោះ និងតំបន់ដែលមានការលំបាកត្រូវបានអនុវត្តកាន់តែរហ័ស និងមានប្រសិទ្ធភាព។

ខឿនការពារជាតិ និងសន្តិសុខត្រូវបានរក្សា; អធិបតេយ្យភាព និងផលប្រយោជន៍ជាតិត្រូវបានធានា សណ្តាប់ធ្នាប់ និងសុវត្ថិភាពសង្គមត្រូវបានរក្សា។ ទំនាក់ទំនងកិច្ចការបរទេសនៅតែជាចំណុចភ្លឺស្វាង ដែលរួមចំណែកដល់ការរក្សាបរិយាកាសសន្តិភាព និងស្ថិរភាពសម្រាប់ការអភិវឌ្ឍជាតិ។ វៀតណាមបន្តអះអាងពីជំហររបស់ខ្លួនជាមិត្ត ជាដៃគូដែលគួរឱ្យទុកចិត្ត និងជាសមាជិកដែលមានទំនួលខុសត្រូវនៃសហគមន៍អន្តរជាតិ។

បទពិសោធន៍ជាក់ស្តែងនៃឆ្នាំ២០២៥ បង្ហាញថា នៅពេលដែលឆន្ទៈរបស់បក្សស្របនឹងសេចក្តីប្រាថ្នារបស់ប្រជាជន ហើយនៅពេលដែលប្រព័ន្ធនយោបាយទាំងមូលធ្វើសកម្មភាពស្របគ្នា និងប្តេជ្ញាចិត្តដើម្បីផលប្រយោជន៍រួម កប៉ាល់របស់ប្រទេសជាតិនឹងតែងតែធ្វើដំណើរក្នុងទិសដៅត្រឹមត្រូវ។ ដូចដែលខ្ញុំបានបញ្ជាក់ម្តងហើយម្តងទៀត ការរក្សាទិសដៅយុទ្ធសាស្ត្រ មិនរង្គោះរង្គើនៅពេលប្រឈមមុខនឹងការលំបាក និងឯកភាពគឺជាកត្តាសំខាន់ៗដែលជួយឱ្យប្រទេសជាតិឈរជើងយ៉ាងរឹងមាំ និងឆ្ពោះទៅមុខ។ សមិទ្ធផលនៃឆ្នាំ២០២៥ គឺជាមូលដ្ឋានគ្រឹះដ៏សំខាន់សម្រាប់យើងដើម្បីចូលទៅក្នុងឆ្នាំថ្មី ២០២៦ ជាមួយនឹងទំនុកចិត្តកាន់តែខ្លាំង ស្មារតីថ្មី និងការតាំងចិត្តថ្មី ត្រៀមខ្លួនរួចជាស្រេចដើម្បីសម្រេចបានគោលដៅដ៏អស្ចារ្យដែលបានកំណត់ដោយមហាសន្និបាតលើកទី១៤ របស់បក្ស។

លោក To Lam អគ្គលេខាបក្ស និងជាលេខាគណៈកម្មាធិការបក្សយោធាមជ្ឈិម

អ្នកយកព័ត៌មាន៖ លទ្ធផលដែលសម្រេចបានក្នុងឆ្នាំ២០២៥ គឺគួរឱ្យមោទនភាពណាស់។ លោកអគ្គលេខាបក្ស តើតួនាទីភាពជាអ្នកដឹកនាំរបស់បក្សត្រូវបានបង្ហាញយ៉ាងដូចម្តេច ដោយក្នុងនាមជាកត្តាកំណត់នៃជ័យជម្នះទាំងអស់នៃបដិវត្តន៍វៀតណាម?

លោក To Lam អគ្គលេខាបក្ស៖ ក្រឡេកមើលទៅក្រោយនូវរាល់សមិទ្ធផលដែលប្រទេសជាតិសម្រេចបាននៅឆ្នាំ ២០២៥ អាចបញ្ជាក់បានថា ទាំងនេះគឺជាចំណុចកំពូលនៃភាពជាអ្នកដឹកនាំដ៏រឹងមាំ ការអនុវត្តដ៏ម៉ឺងម៉ាត់ និងសាមគ្គីភាពរបស់បក្សទាំងមូល ប្រជាជន និងកងទ័ពទាំងមូល។

នៅក្នុងបរិបទនៃគុណសម្បត្តិ ការលំបាក និងបញ្ហាប្រឈមដែលជាប់ទាក់ទងគ្នា រឿងសំខាន់បំផុតនោះគឺថា យើងបានរក្សាតួនាទីជាអ្នកដឹកនាំរបស់បក្ស លើកកម្ពស់វិន័យ ទិសដៅ និងការជឿទុកចិត្តគ្នាក្នុងសង្គម។ នេះគឺជាមូលដ្ឋានគ្រឹះសម្រាប់ជំនះបញ្ហាប្រឈម និងជាកត្តាកំណត់ក្នុងការសម្រេចបាននូវជ័យជម្នះទាំងអស់។ បក្សរបស់យើងបានខិតខំប្រឹងប្រែងឥតឈប់ឈរដើម្បីសម្រេចគោលដៅឯករាជ្យជាតិដែលប្រកាន់ភ្ជាប់ជាមួយការតម្រង់ទិសសង្គមនិយម។

លើសពីនេះ ភាពជាអ្នកដឹកនាំ និងសមត្ថភាពគ្រប់គ្រងរបស់បក្សនៅតែបន្តត្រូវបានបញ្ជាក់តាមរយៈការចេញ និងអនុវត្តគោលនយោបាយ និងការសម្រេចចិត្តសំខាន់ៗទាន់ពេលវេលា និងបំពេញតាមតម្រូវការអភិវឌ្ឍន៍របស់ប្រទេស។ នៅឆ្នាំ ២០២៥ យើងនឹងមិនត្រឹមតែផ្តោតលើការដោះស្រាយបញ្ហាបន្ទាន់ប៉ុណ្ណោះទេ ប៉ុន្តែថែមទាំងផ្តល់អាទិភាពដល់ការលុបបំបាត់ឧបសគ្គរចនាសម្ព័ន្ធរយៈពេលវែងផងដែរ។ នេះបង្ហាញយ៉ាងច្បាស់អំពីចរិតលក្ខណៈ និងចក្ខុវិស័យរបស់បក្សកាន់អំណាចដែលមានបទពិសោធន៍ ដែលតែងតែដាក់ផលប្រយោជន៍ជាតិ និងប្រជាជនធំជាងអ្វីៗទាំងអស់។

កត្តាសំខាន់មួយគឺការបន្តពង្រឹង ការងារកសាង និងការកែតម្រូវបក្ស ដែលបន្តត្រូវបានអនុវត្តយ៉ាងសកម្មរួមចំណែកដល់ការពង្រឹងទំនុកចិត្តរបស់ប្រជាជនលើ បក្ស និងរបប។ ខ្ញុំធ្លាប់បានសង្កត់ធ្ងន់ថា វិន័យរបស់បក្សគឺសម្រាប់រក្សាបក្សឱ្យតឹងរ៉ឹង ការពារអ្វីដែលត្រឹមត្រូវ ត្រូវតែការពារអ្នកដែលហ៊ានគិត ហ៊ានធ្វើសកម្មភាព និងហ៊ានទទួលខុសត្រូវចំពោះផលប្រយោជន៍រួម។ នៅពេលដែលវិន័យត្រូវបានរក្សារឹងមាំ ក្បាលម៉ាស៊ីនត្រូវបានធ្វើឱ្យដំណើរការកាន់តែមានប្រសិទ្ធភាពជាង ធនធានសង្គមនឹងត្រូវបានដោះសោ ហើយកម្លាំងរបស់ប្រជាជននឹងត្រូវបានបញ្ចេញជាមិនខាន។

អ្នកយកព័ត៌មាន៖ សូមគោរពលោកអគ្គលេខាបក្ស នៅឆ្នាំ២០២៦ តើយើងគួរផ្តោតលើកិច្ចការ និងដំណោះស្រាយសំខាន់ៗអ្វីខ្លះ ចាប់ពីឆ្នាំដំបូងនៃអាណត្តិថ្មី?

លោក To Lam អគ្គលេខាបក្ស៖ ឆ្នាំ២០២៦ មានសារៈសំខាន់ជាពិសេស ព្រោះត្រូវបានសម្គាល់ជាឆ្នាំចាប់ផ្តើមនៃការអនុវត្តសេចក្តីសម្រេចនៃមហាសន្និបាតលើកទី១៤ របស់បក្ស។ នៅក្នុងបរិបទនេះ តម្រូវការគឺត្រូវធ្វើសកម្មភាពយ៉ាងម៉ឺងម៉ាត់ ធ្វើការដោយផ្តោតអារម្មណ៍ និងអាទិភាព និងបង្កើតការផ្លាស់ប្តូរច្បាស់លាស់។ បទពិសោធន៍បង្ហាញថា សេចក្តីប្រាថ្នាអាចក្លាយជាការពិតបានលុះត្រាតែវាត្រូវបានបញ្ជាក់តាមរយៈវិន័យ ការទទួលខុសត្រូវ និងប្រសិទ្ធភាពក្នុងការអនុវត្ត។

ដោយស្មារតីនោះ ជាដំបូងសំខាន់បំផុតយើងត្រូវបង្កើតរបកគំហើញដ៏រឹងមាំមួយ ដោះសោ រំដោះ និងប្រើប្រាស់ធនធានទាំងអស់ប្រកបដោយប្រសិទ្ធភាព ជាពិសេសធនធានមនុស្ស វិទ្យាសាស្ត្រ បច្ចេកវិទ្យា នវានុវត្តន៍ និងការផ្លាស់ប្តូរឌីជីថល។ ការអភិវឌ្ឍនៅក្នុងយុគសម័យថ្មីតម្រូវឱ្យមានការពឹងផ្អែកលើបញ្ញា ភាពច្នៃប្រឌិត និងតម្លៃបន្ថែមខ្ពស់ ដោយភ្ជាប់កំណើនសេដ្ឋកិច្ចជាមួយនឹងការកែលម្អគុណភាពជីវិតសម្រាប់ប្រជាជន។ ការអភិវឌ្ឍយ៉ាងឆាប់រហ័សត្រូវតែមាននិរន្តរភាព កំណើនត្រូវតែភ្ជាប់ទៅនឹងសុភមង្គលរបស់ប្រជាជន។

ភារកិច្ចដ៏សំខាន់មួយគឺបន្តកសាង និងកែតម្រូវបក្ស និងប្រព័ន្ធនយោបាយឱ្យស្អាតស្អំ រឹងមាំ និងមានសមត្ថភាពដឹកនាំ និងរៀបចំការអនុវត្តសេចក្តីសម្រេចនៃមហាសន្និបាតលើកទី១៤ ពង្រឹងការត្រួតពិនិត្យ ព្រមទាំងរក្សាការទទួលខុសត្រូវដ៏ល្អប្រសើររបស់កម្មាភិបាល ជាពិសេសអ្នកដែលកាន់តំណែងជាថ្នាក់ដឹកនាំ។ យុគសម័យថ្មីទាមទារឱ្យមានការគិតថ្មី និងវិធីសាស្រ្តថ្មីៗ ប៉ុន្តែជាដំបូង យើងត្រូវតែមានក្រុមកម្មាភិបាលដែលមានការលះបង់ ចក្ខុវិស័យ និងការទទួលខុសត្រូវគ្រប់គ្រាន់។ ក្នុងពេលជាមួយគ្នានេះ យើងត្រូវតែបន្តលើកកម្ពស់កម្លាំងនៃឯកភាពជាតិ និងដាស់តឿនសេចក្តីប្រាថ្នាឈានទៅមុខចំពោះពលរដ្ឋវៀតណាមគ្រប់រូប។

អ្នកយកព័ត៌មាន៖ ក្នុងឱកាសឆ្នាំថ្មី ២០២៦ និងបុណ្យចូលឆ្នាំថ្មីប្រពៃណី តើលោកអគ្គលេខាបក្ស និងជាលេខាគណៈកម្មាធិការយោធាមជ្ឈិមមានសារអ្វីផ្តាំផ្ញើដល់នាយទាហាន និងពលទាហាននៃកងទ័ពប្រជាជនវៀតណាមបានទេ?

លោក To Lam អគ្គលេខាបក្ស៖ ខ្ញុំទទួលស្គាល់ និងកោតសរសើរយ៉ាងខ្លាំងចំពោះកិច្ចខិតខំប្រឹងប្រែងឥតឈប់ឈរ ស្មារតីទទួលខុសត្រូវខ្ពស់ និងសមិទ្ធផលសំខាន់ៗដែលគណៈកម្មាធិការបក្សកងទ័ព និងកងទ័ពទាំងមូលសម្រេចបានក្នុងឆ្នាំកន្លងមក។ កងទ័ពប្រជាជនវៀតណាមតែងតែរក្សាបាននូវភាពរឹងមាំខាងនយោបាយ ឯកភាព និងសាមគ្គីភាព ដោយបំពេញភារកិច្ចដែលបានកំណត់ទាំងអស់ដោយជោគជ័យ ដោយបញ្ជាក់ពីតួនាទីរបស់ខ្លួនជាកម្លាំងស្នូល និងសសរស្តម្ភរឹងមាំក្នុងបុព្វហេតុកសាង និងការពារមាតុភូមិ ត្រៀមខ្លួនប្រយុទ្ធ និងយកឈ្នះលើសត្រូវឈ្លានពានទាំងអស់។ នៅឆ្នាំ ២០២៥ កងទ័ពបានបំពេញភារកិច្ចទាំងអស់ដោយជោគជ័យ បានកសាងកងទ័ពរឹងមាំ រៀបរយ ចំណាន និងទំនើបៗ ការពារបូរណភាពទឹកដី និងឯករាជ្យជាតិ រក្សាការពារជាតិជាប្រចាំ និងកសាងបរិយាកាសសន្តិភាព។

ឈានចូលដល់ឆ្នាំ២០២៦ ដែលជាឆ្នាំដំបូងនៃការអនុវត្តសេចក្តីសម្រេចនៃមហាសន្និបាតលើកទី១២ របស់គណៈកម្មាធិការបក្សកងទ័ព និងសេចក្តីសម្រេចនៃមហាសន្និបាតលើកទី១៤ របស់បក្ស ខ្ញុំសង្ឃឹមថា គណៈកម្មាធិការបក្សកងទ័ព និងកងទ័ពទាំងមូលនឹងបន្តលើកកម្ពស់ប្រពៃណីដ៏រុងរឿង ភាពវៃឆ្លាតខាងនយោបាយ និងស្មារតីទទួលខុសត្រូវចំពោះបក្ស មាតុភូមិ និងប្រជាជន។ នៅក្នុងបរិបទថ្មី តម្រូវការដែលដាក់លើកងទ័ពកាន់តែខ្ពស់ឡើងៗ ហើយភារកិច្ចកាន់តែលំបាកទៅ។ ខ្ញុំរំពឹងថា គណៈកម្មាធិការបក្សកងទ័ពនឹងបន្តជាស្នូលនៃភាពជាអ្នកដឹកនាំឈានមុខគេ ជាគំរូនៃសាមគ្គីភាព និងឯកភាព។

ក្នុងឱកាសអបអរសាទរឆ្នាំថ្មីឆ្នាំ ២០២៦ ក្នុងនាមថ្នាក់ដឹកនាំបក្ស និងរដ្ឋ ខ្ញុំសូមប្រសិទ្ធិពរជូនគ្រប់គ្រួសារវៀតណាមនៅទូទាំងប្រទេស និងជនរួមជាតិនៅក្រៅប្រទេសទទួលឆ្នាំថ្មីរុងរឿងមានសុខភាពល្អ បរិបូរ ចម្រុងចម្រើន និងសូមជូនពរឆ្នាំថ្មីជូននាយទាហាន និងពលទាហាននៃកងទ័ពប្រជាជនវៀតណាមទាំងមូលឱ្យមានសុខភាពល្អ សុភមង្គល និង បំពេញភារកិច្ចដែលបានកំណត់ទាំងអស់ប្រកបដោយជោគជ័យ។ ខ្ញុំជឿជាក់ថា ជាមួយនឹងប្រពៃណីវីរភាព ឆន្ទៈដ៏រឹងមាំ និងសេចក្តីប្រាថ្នារួមចំណែកកសាងមាតុភូមិ កងទ័ពទាំងមូលនឹងបន្តសរសេរទំព័រដ៏រុងរឿងថ្មីនៅក្នុងប្រវត្តិសាស្ត្រកងទ័ពរបស់យើងនៅក្នុងយុគសម័យថ្មីនៃប្រទេសជាតិ។

សូមជូនពរឱ្យកាសែតកងទ័ពប្រជាជនបន្តរីកចម្រើនរួមជាមួយនឹងការរីកចម្រើន និងធំធាត់របស់កងទ័ពប្រជាជនវៀតណាមដ៏អង់អាចក្លាហាន!

អ្នកយកព័ត៌មាន៖ សូមគោរពអរគុណ លោកអគ្គលេខាបក្ស!

បកប្រែដោយ Minh Trung