គណៈប្រតិភូគណៈកម្មាធិការបក្សខេត្ត An Giang ជូនពរឆ្នាំថ្មីដល់បញ្ជាការដ្ឋានយោធភូមិភាគទី៣ កងយោធពលខេមរភូមិន្ទ

លោកឧត្តមសេនីយ៍ទោ អ៊ុយ ហៀង មេបញ្ជាការយោធភូមិភាគទី៣ កងយោធពលខេមរភូមិន្ទ បានទទួលស្វាគមន៍គណៈប្រតិភូ។

តាងនាមគណៈកម្មាធិការបក្សខេត្ត ក្រុមប្រឹក្សាប្រជាជនខេត្ត គណៈកម្មាធិការប្រជាជនខេត្ត គណៈកម្មាធិការរណសិរ្សមាតុភូមិវៀតណាមខេត្ត និងប្រជាជនខេត្ត An Giang លោកស្រី Tran Thi Thanh Huong បានជូនពរលោកឧត្តមសេនីយ៍ទោ អ៊ុយ ហៀង និងឧត្តមសេនីយ៍ នាយទាហាន នាយទាហានរង និងពលទាហាននៃបញ្ជាការដ្ឋានយោធភូមិភាគទី៣ កងយោធពលខេមរភូមិន្ទ ឲ្យទទួលអំណរឆ្នាំថ្មីដ៏សប្បាយរីករាយ សុភមង្គល និងជោគជ័យគ្រប់ប្រការ។

ទិដ្ឋភាពនៃជំនួប (រូបថត៖ baoangiang.com.vn)

លោកស្រី Tran Thi Thanh Huong បានជម្រាបជូនអំពីការអនុវត្តភារកិច្ចនយោបាយ និងសមិទ្ធផលនៃការអភិវឌ្ឍសេដ្ឋកិច្ចសង្គមរបស់ខេត្ត An Giang ក្នុងឆ្នាំកន្លងមក។ លោកស្រី Tran Thi Thanh Huong សង្ឃឹមថា បញ្ជាការដ្ឋានយោធភូមិភាគទី៣ កងយោធពលខេមរភូមិន្ទ នឹងបន្តដឹកនាំអង្គនានានៅតាមខេត្តជាប់ព្រំដែន ពង្រឹងការផ្លាស់ប្ដូរ ការស្រាវជ្រាវ និងកិច្ចសហប្រតិបត្តិការជាមួយកងកម្លាំងប្រដាប់អាវុធនៃខេត្ត An Giang លើវិស័យសន្តិសុខ សណ្តាប់ធ្នាប់ និងសុវត្ថិភាពសង្គមតាមបណ្តោយព្រំដែនរវាងប្រទេសទាំងពីរ ស្របតាមតម្រូវការ និងផលប្រយោជន៍របស់ភាគីនីមួយៗ រួមចំណែកពង្រឹង និងពង្រីក «ទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងនិរន្តរភាពយូរអង្វែង» រវាងប្រទេសទាំងពីរ វៀតណាម-កម្ពុជា។

លោកស្រី Tran Thi Thanh Huong ផ្តល់អំណោយដល់បញ្ជាការដ្ឋានយោធភូមិភាគទី៣ កងយោធពលខេមរភូមិន្ទ (រូបថត៖ baoangiang.com.vn)

តាងនាមបញ្ជាការដ្ឋានយោធភូមិភាគទី៣ កងយោធពលខេមរភូមិន្ទ លោកឧត្តមសេនីយ៍ទោ អ៊ុយ ហៀង បានថ្លែងអំណរគុណយ៉ាងជ្រាលជ្រៅចំពោះលោកស្រី Tran Thi Thanh Huong និងគណៈកម្មាធិការបក្ស អាជ្ញាធរ និងប្រជាជនខេត្ត An Giang  ព្រមទាំងបញ្ជាក់ថា បញ្ជាការដ្ឋានយោធភូមិភាគទី៣ កងយោធពលខេមរភូមិន្ទ នឹងបន្តសហការយ៉ាងជិតស្និទ្ធជាមួយកងកម្លាំងខេត្ត An Giang ក្នុងការរក្សា ការពារសន្តិសុខ និងសណ្តាប់ធ្នាប់នៅតំបន់ព្រំដែន ពង្រឹងបន្ថែមទៀតនូវទំនាក់ទំនងសាមគ្គីភាព មិត្តភាពប្រពៃណី កិច្ចសហប្រតិបត្តិការ និងការអភិវឌ្ឍទៅវិញទៅមក៕

បកប្រែដោយ Huyen Trang