លើកកម្ពស់សក្ដានុពលរបស់ជនជាតិវៀតណាមនៅបរទេសដើម្បីសម្រេច បាននូវសេចក្តីប្រាថ្នាអភិវឌ្ឍន៍របស់ប្រទេសជាតិ

អញ្ជើញចូលរួមផងដែរ មានថ្នាក់ដឹកនាំបក្ស រដ្ឋ ក្រសួង ស្ថាប័ន មជ្ឈិម អង្គការនយោបាយសង្គម និងអ្នកជំនាញ បញ្ញវន្ត ធុរកិច្ចក្នុងស្រុក និងប្រតិភូវៀតណាមនៅក្រៅប្រទេសជាង ៤០០ នាក់ មកពីជាង ៤០ ប្រទេស និងដែនដីបានចូលរួម។

លោក Pham Minh Chinh មានអនុសាសន៍ក្នុងសន្និសីទ

“សន្និសីទ Dien Hong” របស់ប្រជាជនវៀតណាមនៅបរទេស

អញ្ជើញមានប្រសាសន៍ក្នុងពិធីបើកសន្និសីទ និងវេទិកា លោក Bui Thanh Son រដ្ឋមន្ត្រីក្រសួងការបរទេស បានសង្កត់ធ្ងន់ថា៖ តាមរយៈការរៀបចំចំនួន៣ លើកមក (២០០៩, ២០១២, ២០១៦) សន្និសីទបានបង្កើតវេទិកាផ្លាស់ប្តូរស៊ីជម្រៅលើបញ្ហាសំខាន់ៗមានលក្ខណៈយុទ្ធសាស្រ្តក្នុងការកសាង និងការពារមាតុភូមិ និងរាល់ខ្លឹមសារទាក់ទិននឹងសហគមន៍ជនវៀតណាមនៅបរទេស ក្លាយជា “សន្និសីទ Dien Hong” របស់ប្រជាជនវៀតណាមនៅបរទេស។

សន្និសីទឆ្នាំនេះមានប្រធានបទ “ប្រជាជនវៀតណាមនៅក្រៅប្រទេសរួមដៃគ្នាសម្រេចបាននូវសេចក្តីប្រាថ្នាអភិវឌ្ឍន៍ប្រទេសជាតិ” សំដៅផ្តោតនូវបញ្ញា បង្កើនឯកភាពជាតិ និងលើកកម្ពស់ធនធាន សក្តានុពល និងទស្សនៈពិភពលោកឱ្យរឹងមាំ ដើម្បីប្រជាជនក្នុង និងក្រៅប្រទេសអាចរួមដៃគ្នាសម្រេចបាននូវសេចក្តីប្រាថ្នានៃការអភិវឌ្ឍប្រទេសជាតិ ឱ្យរីកចម្រើន និងមានសុភមង្គល។

ដោយសង្កត់ធ្ងន់ថា សហគមន៍វៀតណាមនៅក្រៅប្រទេសនាពេលថ្មីៗនេះបានរីកចម្រើនយ៉ាងខ្លាំងទាំងបរិមាណ និងគុណភាព លោក Bui Thanh Son រដ្ឋមន្ត្រីបានមានប្រសាសន៍ថា៖ ការអនុវត្តបញ្ជាក់ថា ជនជាតិវៀតណាមនៅឯបរទេស បានក្លាយទៅជាធនធានដ៏សំខាន់ក្នុងដំណើរការកសាង និងអភិវឌ្ឍប្រទេសជាតិ។ ក្នុងរយៈពេល ៣០ ឆ្នាំកន្លងមកនេះ ចំនួនទឹកប្រាក់សរុបនៃការផ្ទេរប្រាក់ទៅប្រទេសវិញបានកើនឡើងដល់ជាង ២០០ ពាន់លានដុល្លារអាមេរិក។ ដល់ដំណាច់ឆ្នាំ ២០២៣ ប្រជាជនវៀតណាមនៅក្រៅប្រទេសបានបណ្តាក់ទុនក្នុងគម្រោងវិនិយោគផ្ទាល់ពីបរទេសចំនួន ៤២១ ដែលមានដើមទុនចុះបញ្ជីសរុបចំនួន ១.៧២ ពាន់លានដុល្លារ...។

លោក Pham Minh Chinh ចាប់ដៃជាមួយគណៈប្រតិភូវៀតណាមនៅឯបរទេសក្នុងសន្និសីទ

ស្តាប់ដោយយកចិត្តទុកដាក់ ឃើញច្បាស់ និងយល់ជ្រាបពីក្តីប្រាថ្នារបស់អាណិកជនវៀតណាម

មានអនុសាសន៍ក្នុងសន្និសីទនេះ លោក Pham Minh Chinh នាយករដ្ឋមន្ត្រីវៀតណាម បានចែករំលែកសារចំនួន៣ ដល់ប្រជាជន រួមជាមួយនឹងទិសដៅ ៣ និងការផ្តោតសំខាន់ ៣ ក្នុងការងារអាណិកជនវៀតណាមនៅក្រៅប្រទេស។ “ស្តាប់ឲ្យច្បាស់ ឃើញច្បាស់ យល់ជ្រាបពីក្តីប្រាថ្នា និងការរួមចំណែករបស់សហគមន៍វៀតណាមនៅក្រៅប្រទេសចំពោះមាតុភូមិជាតិ” នោះគឺជាបាវចនារបស់រដ្ឋាភិបាល។ បក្ស រដ្ឋ រដ្ឋាភិបាល តែងតែបង្កើតលក្ខខណ្ឌ និងធានាសិទ្ធិស្របច្បាប់របស់ប្រជាជនលើបញ្ហាដីធ្លី លំនៅដ្ឋាន សញ្ជាតិ ការស្នាក់នៅ ការវិនិយោគ និងបរិយាកាសធុរកិច្ច ...

ឈរលើមូលដ្ឋាននោះ លោកនាយករដ្ឋមន្ត្រីបានប្រគល់ភារកិច្ចជូនគ្រប់ថ្នាក់ គ្រប់ស្ថាប័ន និងមូលដ្ឋាន។ “ការទទួលខុសត្រូវការពារសិទ្ធិ និងផលប្រយោជន៍ស្របច្បាប់ របស់សហគមន៍វៀតណាមនៅក្រៅប្រទេស គឺជាការទទួលខុសត្រូវរបស់បក្ស រដ្ឋ ក្រសួង ស្ថាប័ន មូលដ្ឋាន និងប្រព័ន្ធនយោបាយទាំងមូល និងប្រជាជនទាំងមូលក្រោមការដឹកនាំរបស់បក្ស។ បង្កើនកម្លាំងរបស់សហគមន៍វៀតណាមនៅបរទេសក្នុងបុព្វហេតុកសាង និងការពារមាតុភូមិវៀតណាមសង្គមនិយម ក្នុងស្ថានភាពថ្មី។ ការកសាង និងអភិវឌ្ឍសហគមន៍ជនវៀតណាមនៅក្រៅប្រទេស គឺជាស្ពានដ៏សំខាន់មួយ ជាធនធាន និងជាកម្លាំងចលករដើម្បីជំរុញដំណើរការសមាហរណកម្មដ៏ស៊ីជម្រៅ ជាក់ស្តែង និងមានប្រសិទ្ធភាព ជំរុញកម្លាំងនៃផែនមហាសាមគ្គីជាតិ” នេះជាការបញ្ជាក់របស់លោក Pham Minh Chinh។

លោកនាយករដ្ឋមន្ត្រីបានស្នើឱ្យក្រសួងការបរទេស និងគណៈកម្មាធិការរដ្ឋទទួលបន្ទុកជនវៀតណាមនៅក្រៅប្រទេស បន្តលើកកម្ពស់បន្ថែមទៀតនូវតួនាទីរបស់ខ្លួនជាដំបូលរួម អាសយដ្ឋានដែលអាចជឿទុកចិត្តបានសម្រាប់ប្រជាជន និងជាស្ពាននាំប្រជាជនឱ្យកាន់តែជិតស្និទ្ធមាតុភូមិ... លោកនាយករដ្ឋមន្ត្រីសង្ឃឹមថា សហគមន៍វៀតណាមនៅក្រៅប្រទេសមានជីវភាពរស់នៅកាន់តែមានភាពលំនឹងមានឋានៈខាងច្បាប់ អភិវឌ្ឍ និងធ្វើសមាហរណកម្មយ៉ាងស៊ីជម្រៅ និងទូលំទូលាយ ព្រមទាំងលើកកំពស់ឋានៈខាងនយោបាយនៅក្នុងប្រទេសសាម៉ី។ លោកនាយករដ្ឋមន្រ្តីបានអះអាងថា “បងប្អូនគួរតែបន្តធ្វើជាបេសកជនវៀតណាម លើកតម្កើងប្រទេសជាតិវៀតណាម និងផ្សព្វផ្សាយវប្បធម៌វៀតណាម និងតម្លៃវៀតណាម។ ប្រទេសជាតិក៏តែងតែឈរប្រកៀកស្មាដោយប្តេជ្ញាការពារសិទ្ធិ និងផលប្រយោជន៍ស្របច្បាប់របស់ប្រជាជនយើង”។

យោបល់ផ្តើមពីដួងចិត្ត

ដោយមានប្រធានបទចំនួន ៤ នៃសន្និសីទរួមមាន៖ “ជនវៀតណាមនៅបរទេសជាមួយការអភិវឌ្ឍបច្ចេកវិទ្យាខ្ពស់របស់វៀតណាម” “ធុរកិច្ច និងសហគ្រិនវៀតណាមនៅក្រៅប្រទេសរួមដំណើរជាមួយប្រទេស” “ផែនមហាសាមគ្គីភាពជាតិ កិច្ចការសមាគម និងតួនាទីរបស់យុវជនវៀតណាមនៅក្រៅប្រទេស” និង “អាណិកជនវៀតណាម - ឯកអគ្គរដ្ឋទូតវប្បធម៍ និងភាសាវៀតណាម”។

លោក Hoang Dinh Thang សមាជិកគណៈប្រធានគណៈកម្មាធិការមជ្ឈិមរណសិរ្សមាតុភូមិវៀតណាម និងជាប្រធានសហភាពសមាគមវៀតណាមនៅអឺរ៉ុប បានស្នើថា រដ្ឋគប្បីតែបន្តធ្វើឱ្យជាក់ស្តែងនូវទស្សនៈ និងគោលនយោបាយរបស់បក្សអំពីការងារប្រជាជនវៀតណាមនៅបរទេស; ចាំបាច់ត្រូវមានការសម្រេចចិត្តដ៏មុតស្រួច ដើម្បីបង្កើតលក្ខខណ្ឌអំណោយផលសម្រាប់ជនជាតិវៀតណាមនៅបរទេសរបស់យើង ទទួលបានសញ្ជាតិវៀតណាមវិញ ទន្ទឹមនឹងការរក្សាសញ្ជាតិបរទេសរបស់ពួកគេ... ក្រៅពីនេះ គឺការកសាងយន្តការប្រកបដោយប្រសិទ្ធភាព ក្នុងការទទួល ការចាត់ការ និងការឆ្លើយតបទៅនឹងមតិរបស់ប្រជាជនវៀតណាម នៅបរទេស ការកែទម្រង់បែបបទរដ្ឋបាលតាមរបៀបបើកចំហ រហ័ស និងមានតម្លាភាព។ ពង្រឹងអង្គការចាត់តាំងដើម្បីតភ្ជាប់អ្នកជំនាញ និងបញ្ញវន្តនៅបរទេស។ យកចិត្តទុកដាក់ និងគាំទ្រការអភិរក្សវប្បធម៌ និងភាសាវៀតណាម; រៀបចំព្រឹត្តិការណ៍វប្បធម៌ និងសិល្បៈនៅបរទេសបន្ថែមទៀត ដើម្បីលើកតម្កើងរូបភាពរបស់ប្រទេស និងប្រជាជនវៀតណាម...

ចំណែកលោក Johnathan Hanh Nguyen អាណិកជនវៀតណាមនៅប្រទេសហ្វីលីពីន ប្រធានសម្ព័ន្ធក្រុមហ៊ុន Pan Pacific បានសង្កត់ធ្ងន់លើការទាក់ទាញទេពកោសល្យ ចំណេះដឹង ជាពិសេសយុវជនជំនាន់ក្រោយមកពីសហគមន៍វៀតណាមនៅក្រៅប្រទេស។ យោងតាមសំណើរបស់លោក Johnathan Hanh Nguyen រដ្ឋាភិបាលគួរតែមានយុទ្ធសាស្ត្រទាក់ទាញនិស្សិត និងយុវជនវៀតណាមនៅឯបរទេសមកចាប់ផ្តើមអាជីវកម្ម និងចូលរួមក្នុងគម្រោងសហគមន៍នៅវៀតណាម ដើម្បីជួយពួកគេតភ្ជាប់ជាមួយឫសគល់របស់ពួកគេ និងនាំមកនូវគំនិតផ្តួចផ្តើមថ្មីៗ រួមចំណែកដល់ការអភិវឌ្ឍប្រទេស៕

បកប្រែដោយ Minh Trung