វៀតណាមមានគោលបំណងសហប្រតិបត្តិការជាមួយអាជីវកម្មអាមេរិកក្នុងវិស័យបច្ចេកវិទ្យា ការគ្រប់គ្រង និងនវានុវត្តន៍

នៅក្នុងជំនួប លោក Nguyen Thanh Nghi បានសង្កត់ធ្ងន់ថា វៀតណាមស្វាគមន៍ និងចង់ឲ្យ​អង្គភាពអាជីវកម្មអាមេរិក ដែលមានឧត្តមភាព​ក្នុងវិស័យបច្ចេកវិទ្យា ការគ្រប់គ្រង និងនវានុវត្តន៍ នឹងបន្តពង្រីកការវិនិយោគរបស់ខ្លួននៅវៀតណាម។ លោក Nguyen Thanh Nghi បានមានប្រសាសន៍ថា គណៈគោលនយោបាយ និងយុទ្ធសាស្ត្រមជ្ឈិមចង់បន្តទទួលបានកិច្ចសហប្រតិបត្តិការ ការចែករំលែកបទពិសោធន៍ និងការផ្តល់មតិពីដៃគូអន្តរជាតិក្នុងការជួយគាំទ្រវៀតណាម​ក្នុង​ការ​បំពេញ​គោលនយោបាយសំខាន់ៗ  ដើម្បីកសាងបរិយាកាសវិនិយោគ និងធ្វើ​អាជីវកម្មដែលអំណោយផល និងគួរឲ្យទាក់ទាញកាន់តែខ្លាំងឡើងនៅក្នុងតំបន់។

លោក Nguyen Thanh Nghi ប្រធានគណៈគោលនយោបាយ និងយុទ្ធសាស្ត្រមជ្ឈិមបក្ស​ ទទួលជួបលោក Daniel J. Kritenbrink អតីតឯកអគ្គរដ្ឋទូតអាមេរិកប្រចាំនៅវៀតណាម និងជាសមាជិកក្រុមប្រឹក្សាភិបាលនៃសាជីវកម្ម TAG (រូបថត៖ vnanet.vn)

រីឯលោក Daniel J. Kritenbrink បានអះអាងថា TAG ដឹងយ៉ាងច្បាស់អំពីតួនាទីរបស់ខ្លួនជាស្ពានតភ្ជាប់អង្កភាព​អាជីវកម្មអាមេរិកក្នុងដំណើរការវិនិយោគនៅវៀតណាម។ លោក Daniel J. Kritenbrink បញ្ជាក់ថា វៀតណាមគឺជាបរិយាកាសវិនិយោគដ៏ទាក់ទាញមួយដែលមានកម្លាំងពលកម្មច្រើន និងស្ថិរភាពនយោបាយ ដូច្នេះលោករំពឹងថាអង្គភាពអាជីវកម្មអាមេរិកជាច្រើនថែម​ទៀត​នឹងចូល​មក​វិនិយោគនៅវៀតណាម៕

បកប្រែដោយ Huyen Trang