ពង្រឹងទំនុកចិត្តខាងនយោបាយ និងបង្កើនការតភ្ជាប់យុទ្ធសាស្ត្ររវាងវៀតណាម និងចិន

លោក To Lam អគ្គលេខាបក្ស បានបញ្ជាក់ថា ការអភិវឌ្ឍទំនាក់ទំនងជាមួយចិនគឺជាអាទិភាពចម្បង និងជាជម្រើសយុទ្ធសាស្ត្រនៅក្នុងគោលនយោបាយកិច្ចការបរទេសរបស់វៀតណាម។ ទាក់ទងនឹងទិសដៅនាពេលខាងមុខ លោក To Lam អគ្គលេខាបក្ស បានសង្កត់ធ្ងន់ថា ភារកិច្ចចម្បងរបស់ភាគីទាំងពីរគឺបន្តលើកកម្ពស់ការតភ្ជាប់យុទ្ធសាស្ត្រ ដើម្បីឱ្យកិច្ចសហប្រតិបត្តិការវៀតណាម-ចិន សម្រេចបានលទ្ធផលជាក់ស្តែងបន្ថែមទៀត និងនាំមកនូវអត្ថប្រយោជន៍ពិតប្រាកដដល់ប្រជាជាតិទាំងពីរ។ លោក To Lam អគ្គលេខាបក្ស បានអះអាងនូវការត្រៀមខ្លួនជាស្រេចរក្សាផ្លាស់ប្តូរយ៉ាងជិតស្និទ្ធជាមួយលោក Xi Jinging អគ្គលេខាបក្ស ប្រធានរដ្ឋចិន បន្តដឹកនាំគ្រប់វិស័យ គ្រប់កម្រិតឲ្យកំណត់ទិសដៅសម្រាប់ការអភិវឌ្ឍវិជ្ជមាននៃទំនាក់ទំនង វៀតណាម-ចិន តាំងពីដើមអាណត្តិថ្មី។

លោក To Lam អគ្គលេខាបក្ស មានប្រសាសន៍នៅក្នុងជំនួប (រូបថត៖ vnanet.vn)

លោក To Lam អគ្គលេខាបក្ស បានស្នើឱ្យភាគីទាំងពីរគ្រប់គ្រង និងដោះស្រាយឲ្យបានល្អនូវការខ្វែងគំនិតគ្នានៅសមុទ្រ ស្របតាមទស្សនៈកម្រិតខ្ពស់ ប្រកាន់ខ្ជាប់នូវការដោះស្រាយការខ្វែងគំនិតគ្នាដោយសន្តិវិធី ស្របតាមច្បាប់អន្តរជាតិ និងអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២ រួមចំណែកដល់ការពង្រឹងទំនុកចិត្ត ការរក្សាសន្តិភាព និងស្ថិរភាពនៅក្នុងតំបន់។

ទិដ្ឋភាពនៃជំនួប (រូបថត៖ vnanet.vn)

រដ្ឋមន្ត្រីការបរទេស រដ្ឋមន្ត្រីការពារជាតិ និងរដ្ឋមន្ត្រីនគរបាលចិន បានអះអាងថា ចិនតែងតែចាត់ទុកវៀតណាមជាទិសដៅអាទិភាពជានិច្ចនៅក្នុងគោលនយោបាយការទូតអ្នកជិតខាង និងជាទិសដៅសំខាន់មួយនៅក្នុងគោលនយោបាយកិច្ចការបរទេសរួមរបស់ចិន។ រដ្ឋមន្ត្រីទាំង ៣ រូប បានបញ្ជាក់ថានឹងសម្របសម្រួលយ៉ាងជិតស្និទ្ធជាមួយស្ថាប័ននានារបស់វៀតណាម ប្រកាន់ខ្ជាប់នូវទស្សនៈកម្រិតខ្ពស់ ពង្រឹងការចែករំលែកទ្រឹស្តី និងការអនុវត្តនូវការកសាងបក្ស និងការគ្រប់គ្រងប្រទេសជាតិ។ល។

លោក To Lam អគ្គលេខាបក្ស រួមជាមួយប្រតិភូនានា (រូបថត៖ vnanet.vn)

នារសៀលថ្ងៃដដែល នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួបរដ្ឋមន្ត្រីការបរទេស រដ្ឋមន្ត្រីការពារជាតិ និងរដ្ឋមន្ត្រីនគរបាលចិន។

នៅក្នុងជំនួប លោក Pham Minh Chinh នាយករដ្ឋមន្ត្រី បានបញ្ជាក់ថា វៀតណាមតែងតែចាត់ទុកការពង្រឹង និងអភិវឌ្ឍទំនាក់ទំនងមិត្តភាពប្រពៃណី និងកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយជាមួយចិន ជាគោលនយោបាយឥតងាករេ និងជាអាទិភាពចម្បងនៅក្នុងគោលនយោបាយការបរទេសឯករាជ្យ ម្ចាស់ការ ខ្លួនទីពឹងខ្លួន ពហុភាវូបនីយកម្ម ការធ្វើពិពិធកម្មរបស់ខ្លួន។

លោក Pham Minh Chinh នាយករដ្ឋមន្ត្រីវៀតណាម រួមជាមួយរដ្ឋមន្ត្រីការបរទេស រដ្ឋមន្ត្រីការពារជាតិ និងរដ្ឋមន្ត្រីនគរបាលរបស់វៀតណាម និងចិន (រូបថត៖ vnanet.vn)

លោក Pham Minh Chinh នាយករដ្ឋមន្ត្រី បានស្នើឱ្យក្រសួងការបរទេស ក្រសួងការពារជាតិ និងក្រសួងនគរបាលនៃប្រទេសទាំងពីរ អនុវត្តយន្តការផ្លាស់ប្តូរ និងកិច្ចសហប្រតិបត្តិការដែលមានស្រាប់ប្រកបដោយប្រសិទ្ធភាព និងជាក់ស្តែង ជាពិសេសយន្តការកិច្ចសន្ទនាយុទ្ធសាស្ត្រ។ លោក Pham Minh Chinh នាយករដ្ឋមន្ត្រីក៏បានស្នើឱ្យក្រសួងការបរទេសនៃប្រទេសទាំងពីរសម្របសម្រួលគ្នាដើម្បីរៀបចំផែនការ និងរៀបចំការផ្លាស់ប្តូរកម្រិតខ្ពស់ និងគ្រប់លំដាប់ថ្នាក់។ លោក Pham Minh Chinh នាយករដ្ឋមន្ត្រី បានស្នើឱ្យក្រសួងការពារជាតិទាំងពីរពង្រឹងបន្ថែមទៀតនូវការជួបប្រាស្រ័យមិត្តភាព និងកិច្ចសហប្រតិបត្តិការជាក់ស្តែងលើវិស័យឧស្សាហកម្មការពារជាតិ និងការថែរក្សាសន្តិភាពរបស់អង្គការសហប្រជាជាតិ ព្រមទាំងស្នើឱ្យក្រសួងនគរបាលនៃប្រទេសទាំងពីរបន្តបង្កើនប្រសិទ្ធភាពនៃកិច្ចសហប្រតិបត្តិការលើវិស័យសន្តិសុខ ការអនុវត្តច្បាប់ ការបង្ការ និងប្រយុទ្ធប្រឆាំងនឹងឧក្រិដ្ឋកម្ម។

ទិដ្ឋភាពនៃជំនួប (រូបថត៖ vnanet.vn)

លោក Pham Minh Chinh នាយករដ្ឋមន្ត្រី ក៏បានស្នើឱ្យក្រសួងទាំងបីខិតខំប្រឹងប្រែងដើម្បីបង្កើតលក្ខខណ្ឌអំណោយផលសម្រាប់ក្រសួង ស្ថាប័ន និងមូលដ្ឋាននានារបស់ប្រទេសទាំងពីរ ជំរុញកិច្ចសហប្រតិបត្តិការជាក់ស្តែងលើវិស័យសេដ្ឋកិច្ច ពាណិជ្ជកម្ម វិនិយោគ វិទ្យាសាស្ត្រ និងបច្ចេកវិទ្យា វប្បធម៌ ទេសចរណ៍ ការតភ្ជាប់ផ្លូវដែក កិច្ចសហប្រតិបត្តិការរវាងមូលដ្ឋាននានា ការជួបប្រាស្រ័យរវាងប្រជាជននិងប្រជាជន សហប្រតិបត្តិការក្នុងការគ្រប់គ្រងព្រំដែនគោក ការគ្រប់គ្រង និងដោះស្រាយការខ្វែងគំនិតគ្នាឲ្យបានសមស្រប និងរក្សាសន្តិភាព និងស្ថិរភាពនៅសមុទ្រ។

រដ្ឋមន្ត្រីការបរទេស រដ្ឋមន្ត្រីការពារជាតិ និងរដ្ឋមន្ត្រីនគរបាលចិន បានបញ្ជាក់ថា នឹងពង្រឹងការផ្លាស់ប្តូរយុទ្ធសាស្ត្រ ពង្រឹងទំនុកចិត្តខាងនយោបាយ អនុវត្តទស្សនៈកម្រិតខ្ពស់យ៉ាងម៉ឺងម៉ាត់ និងប្រកបដោយប្រសិទ្ធភាព និងជំរុញកិច្ចសហប្រតិបត្តិការឯកទេសបន្ថែមទៀតលើវិស័យការទូត ការពារជាតិ សន្តិសុខ និងការអនុវត្តច្បាប់៕

បកប្រែដោយ Huyen Trang