លោក Luong Cuong ប្រធានរដ្ឋ អញ្ជើញទៅសួរសុខទុក្ខ និងជូនពរឆ្នាំថ្មីនៅយោធភូមិភាគទី ២ និងខេត្ត Phu Tho

រាយការណ៍ជូនលោក Luong Cuong ប្រធានរដ្ឋ និងក្រុមបេសកកម្មមជ្ឈិម លោកឧត្តមសេនីយ៍ត្រី Tran Van Bac សមាជិកមជ្ឈិមបក្ស មេបញ្ជាការយោធភូមិភាគទី ២ ឲ្យដឹងថា នៅឆ្នាំ ២០២៥ គណៈកម្មាធិការបក្ស និងបញ្ជាការដ្ឋានយោធភូមិភាគទី ២ បានដឹកនាំ និងអនុវត្តព្រមៗគ្នា និងគ្រប់ជ្រុងជ្រោយនូវភារកិច្ចដែលបានប្រគល់ឲ្យ។

ថ្លែងក្នុងឱកាសនេះ លោក Luong Cuong ប្រធានរដ្ឋ បានអះអាងថា ក្នុងឆ្នាំកន្លងមក កងកម្លាំងប្រដាប់អាវុធនៃយោធភូមិភាគទី ២ បន្តលើកកម្ពស់ប្រពៃណីដ៏ត្រចេះត្រចង់ និងអនុវត្ដល្អនូវភារកិច្ចក្នុងនាមជាកម្លាំងប្រយុទ្ធ កម្លាំងការងារ និងកម្លាំងផលិតកម្ម ហើយជាកម្លាំងស្នូលក្នុងការកសាងខឿនការពារជាតិដោយប្រជាជនទាំងមូល ប្រៀបការពារជាតិដោយប្រជាជនទាំងមូលដ៏រឹងមាំ។

លោក Luong Cuong ប្រធានរដ្ឋ អញ្ជើញទៅសួរសុខទុក្ខ និងជូនពរឆ្នាំថ្មីដល់កងពលធំលេខ ៣១៦ (យោធភូមិភាគទី ២)

ដោយសង្កត់ធ្ងន់លើស្ថានភាពដែលទាក់ទងនឹងការអនុវត្តភារកិច្ចយោធា ការពារជាតិ និងសន្តិសុខ លោក Luong Cuong ប្រធានរដ្ឋ បានស្នើឱ្យគណៈអចិន្ត្រៃយ៍នៃគណៈកម្មាធិការបក្ស និងបញ្ជាការដ្ឋានយោធភូមិភាគទី ២ ពង្រឹងភាពជាអ្នកដឹកនាំ ការណែនាំ និងក្ដាប់ឱ្យបានជាប់នូវស្ថានភាព ព្រមទាំងសម្របសម្រួលយ៉ាងសកម្មជាមួយបណ្ដាកងកម្លាំងដើម្បីលើកកម្ពស់សមត្ថភាពស្រាវជ្រាវ និងព្យាករណ៍ស្ថានភាពឲ្យបានត្រឹមត្រូវ ដើម្បីផ្តល់យោបល់ជូនគណៈកម្មាធិការបក្សយោធាមជ្ឈិម និងក្រសួងការពារប្រទេសលើដំណោះស្រាយសម្រាប់ភារកិច្ចយោធា និងការពារជាតិ និងការពារមាតុភូមិ។

ទន្ទឹមនឹងនោះ ពង្រឹងសាមគ្គីភាព គោរពវិន័យ នវានុវត្ដន៍ ធ្វើល្អនូវការអប់រំនយោបាយ និងសតិអារម្មណ៍ និងយកចិត្តទុកដាក់កសាងកងកម្លាំងប្រដាប់អាវុធដ៏រឹងមាំ លើកកម្ពស់សមត្ថភាពប្រយុទ្ធរបស់កងកម្លាំងប្រដាប់អាវុធយោធភូមិភាគ យកចិត្តទុកដាក់ដល់ជីវិតទាំងសម្ភារៈ និងស្មារតីរបស់កម្មាភិបាលនិងយុទ្ធជន ជាពិសេសគឺរៀបចំឲ្យកងទ័ពទទួលអំណរបុណ្យចូលឆ្នាំថ្មី បានសប្បាយរីករាយ សុវត្ថិភាព និងសន្សំសំចៃ ត្រៀមខ្លួនប្រយុទ្ធខ្ពស់។

លោក Luong Cuong ប្រធានរដ្ឋ​ និងក្រុមបេសកកម្ម រួមជាមួយកម្មាភិបាល និងមេបញ្ជាការយោធាភូមិភាគទី ២

នៅព្រឹកថ្ងៃដដែលលោក Luong Cuong ប្រធានរដ្ឋ និងក្រុមបេសកកម្មបានអញ្ជើញទៅសួរសុខទុក្ខ និងជូនពរឆ្នាំថ្មីដល់គ្រួសារក្រីក្រ គ្រួសារទទួលរបបឧបត្ថម្ភគោលនយោបាយ កម្មករ ពលករដែលមានស្ថានភាពលំបាក និងកងកម្លាំងប្រដាប់អាវុធនៅខេត្ត Phu Tho។

ថ្លែងនៅចំពោះមុខកម្មាភិបាល ប្រជាជន និងកងកម្លាំងប្រដាប់អាវុធ លោក Luong Cuong ប្រធានរដ្ឋ បានសង្កត់ធ្ងន់ថាឆ្នាំ២០២៥ គឺជាឆ្នាំដំបូងនៃការអនុវត្តគំរូអាជ្ញាធរមូលដ្ឋានពីរកម្រិត ទោះបីជានៅមានការលំបាកជាច្រើនក៏ដោយ ប៉ុន្ដែក្នុងស្មារតីសាមគ្គីភាព ការប្ដេជ្ញាចិត្ដខ្ពស់ ម្ចាស់ការ និងច្នៃប្រឌិត គណៈកម្មាធិការបក្ស អាជ្ញាធរ ប្រជាជន និងកងកម្លាំងប្រដាប់អាវុធខេត្ត Phu Tho បានខិតខំប្រឹងប្រែង និងសម្រេចបានលទ្ធផលគួរឱ្យចាប់អារម្មណ៍។

ដោយនៅសល់តែប៉ុន្មានថ្ងៃទៀតដល់បុណ្យចូលឆ្នាំថ្មីប្រពៃណីជាតិ លោក Luong Cuong ប្រធានរដ្ឋ បានស្នើឱ្យខេត្ត Phu Tho យកចិត្តទុកដាក់ដល់គ្រួសារទទួលរបបឧបត្ថម្ភគោលនយោបាយ អ្នកមានគុណបំណាចចំពោះបដិវត្តន៍ កម្មករ ពលករដែលមានជីវភាពរស់នៅជួបការលំបាកនិងជនក្រីក្រ។ អនុវត្ដល្អនូវគោលនយោបាយសម្រាប់កងកម្លាំងប្រដាប់អាវុធ និងរៀបចំសួរសុខទុក្ខកងកម្លាំងប្រចាំការក្នុងអំឡុងពេលបុណ្យចូលឆ្នាំថ្មីប្រពៃណីជាតិៗល។

លោក Luong Cuong ប្រធានរដ្ឋ  ប្រគល់អំណោយដល់គ្រួសារក្រីក្រ និងគ្រួសារទទួលរបបឧបត្ថម្ភគោលនយោបាយនៅខេត្ត Phu Tho

អញ្ជើញទៅសួរសុខទុក្ខ និងជូនពរបុណ្យចូលឆ្នាំថ្មីដល់កម្មាភិបាលនិងយុទ្ធជននៃបញ្ជាការដ្ឋានយោធាខេត្ត Phu Tho និងកងពលធំលេខ ៣១៦ (យោធភូមិភាគទី  ២) លោក Luong Cuong ប្រធានរដ្ឋ   បានស្នើឱ្យអង្គភាពនានារៀបចំការប្រចាំការ ត្រៀមរៀបចំបុណ្យចូលឆ្នាំថ្មីយ៉ាងម៉ឺងម៉ាត់ ព្រមទាំងត្រៀមរៀបចំការប្រគល់និងទទួលទាហានឆ្នាំ ២០២៦ ក៏ដូចជារៀបចំពិធីបុណ្យតេតដាំដើមឈើ និងការហ្វឹកហ្វឺនៗល។

ក្នុងឱកាសត្រៀមទទួលអំណរឆ្នាំថ្មីប្រពៃណីជាតិ ២០២៦ លោក Luong Cuong ប្រធានរដ្ឋ បានប្រគល់អំណោយដល់គណៈកម្មាធិការបក្ស និងអាជ្ញាធរខេត្ត Phu Tho គ្រួសារក្រីក្រ គ្រួសារទទួលរបបឧបត្ថម្ភគោលនយោបាយ កម្មករ ពលករដែលមានស្ថានភាពលំបាក និងកងកម្លាំងប្រដាប់អាវុធនៅក្នុងតំបន់។ សម្ព័ន្ធក្រុមហ៊ុនឧស្សាហកម្មនិងទូរគមនាគមន៍កងទ័ព និងធនាគារភាគហ៊ុនពាណិជ្ជកម្មកងទ័ពបានប្រគល់ផ្ទះមេត្ដាធម៌ចំនួន ១០០ ខ្នង រួមជាមួយនឹងអំណោយរាប់រយកញ្ចប់ដល់កម្មាភិបាល និងយុទ្ធជននៃកងកម្លាំងប្រដាប់អាវុធនៃយោធភូមិភាគទី ២៕

បកប្រែដោយ Pham Diep