កិច្ចប្រជុំរវាងការិយាល័យនយោបាយនៃបក្សកុម្មុយនិស្តវៀតណាម និងគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា

ក្នុងបរិយាកាសមិត្តភាព និងការយោគយល់គ្នាទៅវិញទៅមក ភាគីទាំងពីរបានជម្រាបជូន និងផ្លាស់ប្តូរយ៉ាងស៊ីជម្រៅអំពីស្ថានភាពរបស់បក្សនីមួយៗ និងប្រទេសនីមួយៗ បន្ទាប់ពីព្រឹត្តិការណ៍នយោបាយសំខាន់ៗ ព្រមទាំងវាយតម្លៃខ្ពស់ចំពោះការអភិវឌ្ឍដ៏ល្អនៃទំនាក់ទំនងរវាងបក្សទាំងពីរ និងប្រទេសទាំងពីរក្នុងរយៈពេលកន្លងមក។ ភាគីទាំងពីរបានសង្កត់ធ្ងន់ថា ទំនាក់ទំនងរវាងបក្សទាំងពីរគឺជាមូលដ្ឋានគ្រឹះនៃទំនាក់ទំនងវៀតណាម-កម្ពុជា ព្រមទាំងបញ្ជាក់ថា កិច្ចប្រជុំរវាងបក្សទាំងពីរមានអត្ថន័យដ៏សំខាន់ ដោយបង្កើតមូលដ្ឋានគ្រឹះនយោបាយរឹងមាំមួយ ដើម្បីតម្រង់ទិសសម្រាប់ទំនាក់ទំនង និងដោះស្រាយបញ្ហាជាក់លាក់មួយចំនួនរវាងប្រទេសទាំងពីរ។

លោក To Lam អគ្គលេខាបក្ស និងសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា (រូបថត៖ vnanet.vn)

ភាគីទាំងពីរបានឯកភាពគ្នាពង្រឹងទំនុកចិត្តខាងនយោបាយ រក្សាដំណើរទស្សនកិច្ច ការជួបជុំ និងការផ្លាស់ប្តូរគណៈប្រតិភូជាប្រចាំ ប្រកបដោយប្រសិទ្ធភាព និងជាក់ស្តែងនៅគ្រប់កម្រិត ជាពិសេសនៅកម្រិតខ្ពស់ និងតាមរយៈបណ្តាញបក្ស និងរដ្ឋ ពង្រឹងកិច្ចសហប្រតិបត្តិការការពារជាតិ និងសន្តិសុខ បង្កើនការផ្លាស់ប្តូរព័ត៌មាន និងសម្របសម្រួលយ៉ាងជិតស្និទ្ធក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសឧក្រិដ្ឋកម្មតាមអ៊ីនធឺណិត។

ទិដ្ឋភាពនៃកិច្ចប្រជុំ (រូបថត៖ vnanet.vn)

ភាគីទាំងពីរបានសន្យាតភ្ជាប់កាន់តែជិតស្និទ្ធរវាងខឿនសេដ្ឋកិច្ចទាំងពីរ ជាពិសេសលើហេដ្ឋារចនាសម្ព័ន្ធគមនាគមន៍ ថាមពល ការធ្វើបរិវត្តកម្មឌីជីថល និងខ្សែសង្វាក់ផ្គត់ផ្គង់កែច្នៃឧស្សាហកម្ម និងកសិកម្ម ពង្រឹងសកម្មភាពជំរុញការវិនិយោគ ពាណិជ្ជកម្ម និងទេសចរណ៍ ដោយខិតខំបង្កើនពាណិជ្ជកម្មទ្វេភាគីឱ្យសម្រេចបាន ២០ ពាន់លានដុល្លារអាមេរិកក្នុងពេលឆាប់ៗនេះ ជំរុញការតភ្ជាប់វិស័យអប់រំ បណ្តុះបណ្តាល និងធនធានមនុស្ស អនុវត្តកិច្ចព្រមព្រៀងសហប្រតិបត្តិការទ្វេភាគី ដែលបានចុះហត្ថលេខាប្រកបដោយប្រសិទ្ធភាព។ល។

ភាគីទាំងពីរបានបញ្ជាក់ថា បន្តគោរព និងអនុវត្តយ៉ាងពេញលេញនូវសន្ធិសញ្ញាស្តីពីការកំណត់ព្រំដែនគោក និងកិច្ចព្រមព្រៀងព្រំដែនផ្សេងទៀតរវាងប្រទេសទាំងពីរ ខិតខំស្វែងរកដំណោះស្រាយដែលអាចទទួលយកបានទៅវិញទៅមកសម្រាប់ព្រំដែននៅសល់ប្រមាណ ១៦% ដើម្បីកសាងបន្ទាត់ព្រំដែនប្រកបដោយសន្តិភាព ស្ថិរភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។ លោក To Lam អគ្គលេខាបក្ស បានស្នើឱ្យកម្ពុជាបន្តបង្កើតលក្ខខណ្ឌអំណោយផលសម្រាប់អាណិកជនវៀតណាមដែលរស់នៅ ធ្វើការ និងសិក្សានៅកម្ពុជា។

លោក To Lam អគ្គលេខាបក្ស និងសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា រួមជាមួយគណៈប្រតិភូរបស់បក្សទាំងពីរ (រូបថត៖ vnanet.vn)

ភាគីទាំងពីរបានឯកភាពគ្នាពង្រឹងទំនាក់ទំនងសហប្រតិបត្តិការរវាងស្ថាប័នរបស់បក្ស និងរដ្ឋសភា ក្រសួង និងស្ថាប័នរបស់រដ្ឋាភិបាល រណសិរ្សមាតុភូមិ ការជួបប្រាស្រ័យរវាងប្រជាជននិងប្រជាជន និងមូលដ្ឋាននានានៃប្រទេសទាំងពីរ។ ភាគីទាំងពីរក៏បានឯកភាពគ្នាសម្របសម្រួល និងគាំទ្រគ្នាទៅវិញទៅមកយ៉ាងជិតស្និទ្ធនៅក្នុងវេទិកាតំបន់ និងអន្តរជាតិ ជាពិសេសនៅក្នុងក្របខ័ណ្ឌនៃសមាគមប្រជាជាតិអាស៊ីអាគ្នេយ៍ (អាស៊ាន) និងមហាអនុតំបន់ទន្លមគង្គ៕

បកប្រែដោយ Huyen Trang