៣០ឆ្នាំនៃទំនាក់ទំនងវៀតណាម-ប៉ារ៉ាហ្គាយ៖ អគ្គលេខាបក្សកុម្មុយនិស្តប៉ារ៉ាហ្គាយចាត់ទុកវៀតណាមជាគំរូដ៏អស្ចារ្យ

នៅក្នុងបទសម្ភាសន៍ជាមួយអ្នកយកព័ត៌មាននៃទីភ្នាក់ងារព័ត៌មាននៅអាមេរិកខាងត្បូង ក្នុងឱកាសរំលឹកខួបលើកទី៣០ នៃការបង្កើតទំនាក់ទំនងការទូត វៀតណាម-ប៉ារ៉ាហ្គាយ លោក Najeeb Amado បានសង្កត់ធ្ងន់ថា ក្នុងរយៈពេលបីទសវត្សរ៍កន្លងមក ទំនាក់ទំនងរវាងវៀតណាម និងប៉ារ៉ាហ្គាយត្រូវបានបង្កើតឡើងដោយឈរលើមូលដ្ឋាននៃចំណងមិត្តភាព សាមគ្គីភាព និងកិច្ចសហប្រតិបត្តិការ ដែលមានអត្ថន័យខាងនយោបាយ។ បក្សកុម្មុយនិស្តប៉ារ៉ាហ្គាយតែងតែលើកសរសើរ និងគោរពយ៉ាងជ្រាលជ្រៅចំពោះបក្សកុម្មុយនិស្តវៀតណាម និងការតស៊ូដ៏អង់អាចរបស់ប្រជាជនវៀតណាម ដើម្បីឯករាជ្យភាព សេរីភាព និងអធិបតេយ្យភាពជាតិ។

លោក Najeeb Amado អគ្គលេខាបក្សកុម្មុយនិស្តប៉ារ៉ាហ្គាយ (រូបថត៖ vnanet.vn)

លោក Najeeb Amado បានមានប្រសាសន៍ថា៖ "ដំណើរការបដិវត្តន៍វៀតណាម ចាប់ពីការតស៊ូរំដោះជាតិ រហូតដល់ការកសាង និងអភិវឌ្ឍន៍ប្រទេសជាតិ បានក្លាយជាគំរូដ៏មានតម្លៃ មិនត្រឹមតែសម្រាប់ប្រទេសប៉ារ៉ាហ្គាយប៉ុណ្ណោះទេ ថែមទាំងសម្រាប់ប្រទេសជាច្រើន និងចលនាជឿនលឿននៅអាមេរិកឡាទីន រួមទាំងប្រទេសគុយបា និងប្រទេសដទៃទៀតនៅក្នុងតំបន់ទៀតផង"។

លោកអគ្គលេខាបក្សកុម្មុយនិស្តប៉ារ៉ាហ្គាយជឿជាក់ថា សក្តានុពលសម្រាប់កិច្ចសហប្រតិបត្តិការទ្វេភាគីនៅមានច្រើន ចាប់ពីការផ្លាស់ប្តូរវិទ្យាសាស្ត្រ និងបច្ចេកវិទ្យា កិច្ចសហប្រតិបត្តិការលើការអប់រំ និងបណ្តុះបណ្តាលសាកលវិទ្យាល័យ រហូតដល់ពាណិជ្ជកម្ម ការផ្ទេរបច្ចេកវិទ្យា និងការអភិវឌ្ឍប្រកបដោយចីរភាព។ លើសពីនេះ ការតភ្ជាប់អំពីវប្បធម៌ ភាពចម្រុះនៃប្រពៃណី ម្ហូបអាហារ សិល្បៈ និងតន្ត្រីរបស់ប្រជាជាតិទាំងពីរនឹងពង្រឹងទំនាក់ទំនងមិត្តភាពរវាងវៀតណាម និងប៉ារ៉ាហ្គាយបន្ថែមទៀត។

ដោយក្រឡេកមើលទៅប៉ុន្មានឆ្នាំដែលវៀតណាមបានប្រយុទ្ធប្រឆាំងនឹងការឈ្លានពានពីបរទេស លោក Najeeb Amado អគ្គលេខាបក្ស បានបញ្ជាក់ថា ចលនាសាមគ្គីភាពជាមួយប្រជាជនវៀតណាមធ្លាប់បានរីករាលដាលយ៉ាងខ្លាំងនៅក្នុងប្រទេសប៉ារ៉ាហ្គាយ ក៏ដូចជានៅទូទាំងទ្វីបអាមេរិក។ ចលនានិស្សិត និងអង្គការមហាជនជឿនលឿន និងការតស៊ូដ៏អង់អាចរបស់ប្រជាជនវៀតណាមដែលប្រឆាំងនឹងកងកម្លាំងឈ្លានពាន ជាពិសេសអាណានិគមបារាំង និងក្រោយមកគឺចក្រពត្តិអាមេរិក បានបង្កើតប្រភពនៃការបំផុសគំនិតដ៏អស្ចារ្យ ដោយលើកកម្ពស់ស្មារតីនៃការតស៊ូ និងសាមគ្គីភាពអន្តរជាតិ។ ជ័យជម្នះរបស់វៀតណាមមិនត្រឹមតែមានសារៈសំខាន់ខាងយោធា និងនយោបាយប៉ុណ្ណោះទេ ថែមទាំងបានជះឥទ្ធិពលយ៉ាងខ្លាំងទៅលើជីវិតមនោគមវិជ្ជា និងវប្បធម៌របស់ចលនាឆ្វេងនិយមនៅអាមេរិកឡាទីន រួមទាំងប៉ារ៉ាហ្គាយផងដែរ។

ស្តីពីកិច្ចសហប្រតិបត្តិការរវាងបក្សកុម្មុយនិស្តវៀតណាម និងបក្សកុម្មុយនិស្តប៉ារ៉ាហ្គាយ លោក Najeeb Amado បានវាយតម្លៃខ្ពស់ចំពោះវឌ្ឍនភាពវិជ្ជមានក្នុងការផ្លាស់ប្តូរ និងការជួបជុំរវាងបក្សទាំងពីរក្នុងរយៈពេលកន្លងមក និងសម្តែងសុទិដ្ឋិនិយមអំពីលទ្ធភាពនៃការពង្រីកកិច្ចសហប្រតិបត្តិការនាពេលខាងមុខ។ បទពិសោធន៍ក្នុងការដឹកនាំប្រទេស ការគ្រប់គ្រងសង្គម និងការអភិវឌ្ឍសេដ្ឋកិច្ចដែលប្រមូលបានដោយបក្សកុម្មុយនិស្តវៀតណាមក្នុងរយៈពេលជាច្រើនទសវត្សរ៍មកហើយ គឺដ៏មានអត្ថន័យសម្រាប់បក្សកុម្មុយនិស្តប៉ារ៉ាហ្គាយ។ ការសិក្សា ការផ្លាស់ប្តូរ និងការរៀនសូត្រពីបទពិសោធន៍ទាំងនោះ គឺមានសារៈសំខាន់សម្រាប់បក្សទាំងពីរ យល់កាន់តែច្បាស់អំពីមាគ៌ាអភិវឌ្ឍន៍សមស្របនៅក្នុងបរិបទពិភពលោកបច្ចុប្បន្ន៕

បកប្រែដោយ Huyen Trang