អង្គភាពអាជីវកម្មជប៉ុនមានបំណងចង់ពង្រីកការវិនិយោគ និងធ្វើអាជីវកម្មនៅវៀតណាម

លោក Nguyen Minh Vu អនុរដ្ឋមន្ត្រី បានវាយតម្លៃខ្ពស់ចំពោះតួនាទី និងការរួមចំណែកជាក់ស្តែងរបស់ JICA ចំពោះការអភិវឌ្ឍរបស់វៀតណាមក្នុងរយៈពេលបីទសវត្សរ៍កន្លងមក។ លោកបានស្នើឱ្យភាគីទាំងពីរបន្តសម្របសម្រួលយ៉ាងជិតស្និទ្ធ ដើម្បីលើកកម្ពស់វឌ្ឍនភាពនៃគម្រោងសហប្រតិបត្តិការ ដែលបានព្រមព្រៀងគ្នាដោយថ្នាក់ដឹកនាំជាន់ខ្ពស់ ដោយធានាឱ្យមានការចាប់ផ្តើមទាន់ពេលវេលា ដែលភាគីទាំងពីរបានសន្តា។ លោក Nguyen Minh Vu សង្ឃឹមថា JICA នឹងបន្តយកចិត្តទុកដាក់ និងជំរុញរដ្ឋាភិបាលជប៉ុនឱ្យពិចារណាផ្តល់ប្រាក់កម្ចី ODA ជំនាន់ថ្មីដល់វៀតណាម ដើម្បីអនុវត្តគម្រោងសំខាន់ៗ និងទ្រង់ទ្រាយធំនៅវៀតណាម។

លោក Nguyen Minh Vu អនុរដ្ឋមន្ត្រីអចិន្ត្រៃយ៍ក្រសួងការបរទេស ទទួលជួបលោក Yoneda Gen អគ្គនាយកនៃនាយកដ្ឋានអាស៊ីអាគ្នេយ៍-ប៉ាស៊ីហ្វិក នៃទីភ្នាក់ងារសហប្រតិបត្តិការអន្តរជាតិជប៉ុន (JICA) (រូបថត៖ baoquocte.vn)

លោក Yoneda Gen បានថ្លែងអំណរគុណចំពោះកិច្ចសហប្រតិបត្តិការយ៉ាងសកម្ម និងមានប្រសិទ្ធភាពរបស់ក្រសួងការបរទេសវៀតណាម ក្នុងការជំរុញការអនុវត្តគម្រោង ODA របស់ជប៉ុននៅវៀតណាម។ លោកបានអះអាងថា JICA តែងតែឱ្យតម្លៃចំពោះទំនាក់ទំនងជប៉ុន-វៀតណាម ព្រមទាំងបញ្ជាក់ថា អង្គភាពអាជីវកម្មជប៉ុនពេញចិត្តយ៉ាងខ្លាំងចំពោះសមិទ្ធផលអភិវឌ្ឍន៍សេដ្ឋកិច្ចសង្គមរបស់វៀតណាម និងចង់ពង្រីកការវិនិយោគ និងធ្វើអាជីវកម្មនៅវៀតណាមនាពេលខាងមុខ។ លោក Yoneda Gen បានបញ្ជាក់ថា JICA នឹងបន្តខិតខំប្រឹងប្រែងគាំទ្រដល់ការអភិវឌ្ឍរបស់វៀតណាម និងសម្របសម្រួលយ៉ាងជិតស្និទ្ធជាមួយក្រសួង ស្ថាប័ន និងអង្គការពាក់ព័ន្ធរបស់ប្រទេសវៀតណាម ដើម្បីពន្លឿនវឌ្ឍនភាពនៃគម្រោងសហប្រតិបត្តិការ ODA សំខាន់ៗ។ល៕

បកប្រែដោយ Huyen Trang