លើកកម្ពស់សក្តានុភាព និងភាពច្នៃប្រឌិតរបស់នារីក្នុងជួរកងទ័ពលើគ្រប់វិស័យការងារ

នៅក្នុងជំនួបនេះ លោកស្រីវរសេនីយ៍ឯក Nguyen Thi Thu Hien ប្រធានគណៈកម្មាធិការនារីកងទ័ព បានរាយការណ៍ជូនលោកអគ្គលេខាបក្សអំពីសមិទ្ធផលគួរឱ្យចាប់អារម្មណ៍សំខាន់ៗក្នុងការងាររបស់សមាគម និងចលនានារីក្នុងជួរកងទ័ពក្នុងអំឡុងឆ្នាំ ២០២១-២០២៥។ ប្រតិភូនារីៗមកពីអង្គភាពផ្សេងៗគ្នាបានរាយការណ៍ជូនលោកអគ្គលេខាបក្សអំពីរាល់សមិទ្ធផលលេចធ្លោផ្ទាល់ខ្លួន ក៏ដូចជាអង្គភាពរៀងៗខ្លួន។ ទន្ទឹមនឹងនោះបានសម្តែងគោលបំណង សេចក្តីប្រាថ្នានិងលើកសំណូមពរជូនទៅបក្ស និងរដ្ឋលើបញ្ហាជាច្រើនដែលទាក់ទងនឹងនារីក្នុងជួរកងទ័ព។

លោក To Lam អគ្គលេខាបក្ស និងជាលេខាគណៈកម្មាធិការបក្សយោធាមជ្ឈិម ជួបសំណេះសំណាលជាមួយគណៈប្រតិភូឆ្នើមចំនួន ៨០ រូប ដែលតំណាងឱ្យគណៈប្រតិភូចំនួន ៣៩៨ រូប ដែលត្រូវបានចូលរួមក្នុងមហាសន្និបាតនារីកងទ័ពលើកទី៨

មានអនុសាសន៍នៅក្នុងជំនួបសំណេះសំណាលនេះ ក្នុងនាមថ្នាក់ដឹកនាំបក្ស និងរដ្ឋ លោកអគ្គលេខាបក្ស បានសរសើរដល់សមូហភាព និងសមាជិកសមាគមនារីក្នុងជួរកងទ័ពចំពោះការរួមចំណែកដ៏សំខាន់ និងមានអត្ថន័យរបស់នារីកងទ័ពចំពោះភារកិច្ចកសាងកងទ័ព ពង្រឹងខឿនការពារជាតិ កសាង និងការពារមាតុភូមិសង្គមនិយមវៀតណាមយ៉ាងរឹងមាំ។

លោកអគ្គលេខាបក្សបានសង្កត់ធ្ងន់ថា៖ អស់រយៈពេលជិត ៨១ ឆ្នាំមកហើយ ក្រោមការដឹកនាំរបស់បក្សកុម្មុយនិស្តវៀតណាម និងលោកប្រធានហូជីមិញ កងទ័ពប្រជាជនវៀតណាម បានមានការរីកចម្រើនឥតឈប់ឈរដោយសម្រេចបានជ័យជម្នះជាច្រើន រួមចំណែកយ៉ាងសំខាន់ៗដល់បុព្វហេតុរំដោះជាតិ កសាង និងការពារមាតុភូមិសង្គមនិយមវៀតណាមយ៉ាងរឹងមាំ។ នៅក្នុងជ័យជម្នះទាំងនេះ មិនអាចកាត់ផ្តាច់ពីការរួមចំណែករបស់នារីៗនៃកងទ័ពបានទេ។

ទិដ្ឋភាពនៃជំនួបសំណេះសំណាល

ការអនុវត្តសមភាពយេនឌ័រ និងការលើកកម្ពស់តួនាទីរបស់នារីៗក្នុងការកសាង និងការពារមាតុភូមិ គឺជាគោលការណ៍ឥតងាករេ និងស៊ីសង្វាក់គ្នារបស់បក្ស និងរដ្ឋ។ លោកអគ្គលេខាបក្ស បានស្នើឱ្យគណៈកម្មាធិការបក្សយោធាមជ្ឈិម ក្រសួងការពារប្រទេស អគ្គស្នងការដ្ឋាននយោបាយ និងគណៈកម្មាធិការបក្ស និងមេបញ្ជាការនៃស្ថាប័ន និងអង្គភាពគ្រប់កម្រិតជួរកងទ័ព បន្តយកចិត្តទុកដាក់លើការដឹកនាំ និងបង្កើតលក្ខណងាយស្រួលដល់នារីមានឱកាសបានសិក្សា ទទួលការបណ្តុះបណ្តាលលត់ដំខណៈពេលដែលបំពេញភារកិច្ចនយោបាយរបស់អង្គភាពដោយជោគជ័យផង និងបំពេញបានល្អតួនាទីជាស្ត្រីនៅក្នុងគ្រួសារផ្ទាល់ខ្លួនផង។

លោកអគ្គលេខាបក្ស បានសម្តែងទំនុកចិត្តថា នារីៗក្នុងជួរកងទ័ពនឹងបន្តរក្សាប្រពៃណី “ស្នេហាជាតិ សាមគ្គីភាព ភាពច្នៃប្រឌិត ភាពស្មោះត្រង់ និងការឧស្សាហ៍ព្យាយាម” សម្រេចបាននូវសមិទ្ធផលលេចធ្លោជាច្រើន និងរួមចំណែកកាន់តែច្រើនដល់បុព្វហេតុនៃការកសាងកងទ័ព ការពង្រឹងខឿនការពារជាតិ និងការការពារមាតុភូមិ ដែលសក្តិសមនឹងលក្ខណៈដ៏ថ្លៃថ្នូរបស់កងទ័ពប្រជាជនវៀតណាមដ៏អង់អាច៕

បកប្រែដោយ Minh Trung