ទីក្រុងហូជីមិញត្រូវក្លាយជាមជ្ឈមណ្ឌលនៃបញ្ញា សាមគ្គីភាព និងច្នៃប្រឌិត

ថ្លែងសុន្ទរកថាដឹកនាំមហាសន្និបាត លោកអគ្គលេខាបក្ស To Lam បានសង្កត់ធ្ងន់ថា មហាសន្និបាតលើកទី ១ នៃគណៈកម្មាធិការបក្សទីក្រុងហូជីមិញ មិនត្រឹមតែជាជំហានដំបូងនៃទំព័រថ្មីរបស់ទីក្រុងបន្ទាប់ពីបញ្ចូលគ្នាខេត្ដ Binh Duong និងខេត្ដ Ba Ria-Vung Tau ប៉ុណ្ណោះទេ ប៉ុន្ដែថែមទាំងជាព្រឹត្តិការណ៍សំខាន់បើកចក្ខុវិស័យដ៏អស្ចារ្យរបស់ប្រទេសជាតិក្នុងយុគសម័យថ្មី គឺយុគសម័យនៃការរីកចម្រើន វិបុលភាព អរិយធម៌ និងសុភមង្គល។ ឯកសារនៃមហាសន្និបាតបានវាយតំលៃត្រឹមត្រូវការពិត  ធ្វើតាមការតំរង់ទិសនៃឯកសារដែលបានដាក់ជូនមហាសន្និបាតលើកទី១៤ របស់បក្ស ដោយកំណត់យ៉ាងច្បាស់លាស់នូវគោលដៅ ភារកិច្ច និងដំណោះស្រាយសម្រាប់ដំណាក់កាល ២០២៥-២០៣០ ដែលមានលក្ខណៈយុទ្ធសាស្ត្រ។

ប្រតិភូចូលរួមមហាសន្និបាតលើកទី ១ នៃគណៈកម្មាធិការបក្សទីក្រុងហូជីមិញអាណត្ដិ ២០២៥ -​២០៣០

លោកអគ្គលេខាបក្ស To Lam បានសន្និដ្ឋានថា របកគំហើញយុទ្ធសាស្ត្រក្នុងវិស័យហេដ្ឋារចនាសម្ព័ន្ធ ការធ្វើបរិវត្ដកម្មឌីជីថល វិទ្យាសាស្ត្រ បច្ចេកវិទ្យា និងធនធានមនុស្សមានគុណភាពខ្ពស់ត្រូវបានជំរុញយ៉ាងខ្លាំង និងសម្រេចបាននូវលទ្ធផលសំខាន់ៗជាច្រើន ជាពិសេសការអភិវឌ្ឍគមនាគមន៍ បច្ចេកទេស ទីក្រុង និងជនបទកាន់តែស៊ីសង្វាកគ្នា។ ប្រព័ន្ធអេកូឡូស៊ីនៃភស្តុភារ ហិរញ្ញវត្ថុ ពាណិជ្ជកម្ម សេវាកម្ម ទេសចរណ៍ ត្រូវបានបង្កើតឡើងជាបណ្តើរៗ ដោយតភ្ជាប់ជាមួយកំពង់ផែសមុទ្រអន្តរជាតិ Cai Mep-Thi Vai និងអាកាសយានដ្ឋានអន្តរជាតិ Long Thanh និងមជ្ឈមណ្ឌលហិរញ្ញវត្ថុអន្តរជាតិ Thu Thiem ... ធ្វើឱ្យទីក្រុងក្លាយជាច្រកទ្វារសម្រាប់ការធ្វើសមាហរណកម្មអន្តរជាតិ និងជាមជ្ឈមណ្ឌលតភ្ជាប់ខ្សែសង្វាក់តម្លៃនៃតំបន់។

លោកអគ្គលេខាបក្ស To Lam បានវាយតម្លៃថា ទីក្រុងបានផ្តោតលើការអភិវឌ្ឍសង្គមប្រកបដោយចីរភាព ធានានូវវឌ្ឍនភាព យុត្តិធម៌សង្គម សន្តិសុខសង្គម សន្តិសុខមនុស្ស ថែទាំសុខភាព លើកកម្ពស់គុណភាពរស់នៅរបស់ប្រជាពលរដ្ឋ។ ការអប់រំនិងបណ្តុះបណ្តាលត្រូវបានអភិវឌ្ឍយ៉ាងទូលំទូលាយ ហើយកម្លាំងការពារជាតិនិងសន្ដិសុខ តំបន់ការពារទប់ទល់របស់ខេត្ដ និងក្រុងកាន់តែខ្លាំងឡើង ការពារយ៉ាងរឹងមាំលើដែនអាកាស ដែនសមុទ្រ កោះ ដីគោក គោលដៅ សំណងសំខាន់ៗ និងឆ្លើយតបប្រកបដោយប្រសិទ្ធភាពចំពោះបញ្ហាប្រឈមសន្តិសុខបែបប្រពៃណី និងមិនប្រពៃណី ជាពិសេសសន្តិសុខតាមអ៊ីនធឺណិត សន្តិសុខសេដ្ឋកិច្ច សន្តិសុខថាមពល និងសន្តិសុខមនុស្ស...

លោកអគ្គលេខាបក្ស To Lam ថ្លែងសុន្ទរកថាដឹកនាំមហាសន្និបាត

លោកអគ្គលេខាបក្ស To Lam បានឯកភាពខ្ពស់ចំពោះទិសដៅ ភារកិច្ច និងដំណោះស្រាយសម្រាប់ដំណាក់កាល ២០២៥ -២០៣០ របស់មហាសន្និបាត ហើយបានសង្កត់ធ្ងន់លើបញ្ហាមួយចំនួនក្នុងដំណើរការដឹកនាំនិងការអនុវត្ត។ ទន្ទឹមនឹងនោះ លោកអគ្គលេខាបក្ស To Lam សង្ឃឹមថា គណៈកម្មាធិការប្រតិបត្តិទីក្រុងថ្មីត្រូវបំពេញជាបន្ទាន់នូវឯកសារ សេចក្ដីសម្រេចចិត្ដ បង្កើតបទប្បញ្ញត្តិ និងកម្មវិធីការងាររបស់អាណត្តិ ព្រមទាំងរៀបចំការឃោសនាឱ្យបានទូលំទូលាយដល់កម្មាភិបាល សមាជិកបក្ស និងប្រជាជន ប្រែសេចក្ដីសម្រេចចិត្ដរបស់មហាសន្និបាតទៅជាសកម្មភាពជាក់ស្តែង បង្កើតទំនុកចិត្ដ កម្លាំងចលករថ្មីសម្រាប់ការអភិវឌ្ឍរបស់ទីក្រុងហូជីមិញក្នុងដំណាក់កាលថ្មី។

ទិដ្ឋភាពនៃមហាសន្និបាតលើកទី ១ នៃគណៈកម្មាធិការបក្សទីក្រុងហូជីមិញអាណត្ដិ ២០២៥ -​២០៣០

មហាសន្និបាតបានធ្វើការពិនិត្យ និងវាយតម្លៃយ៉ាងទូលំទូលាយលើការអនុវត្តសេចក្តីសម្រេចចិត្តរបស់មហាសន្និបាតសម្រាប់អាណត្តិ ២០២០- ២០២៥ និងកំណត់ទិសដៅ គោលដៅ និងភារកិច្ចនៃការកសាងបក្ស និងការអភិវឌ្ឍន៍សេដ្ឋកិច្ចសង្គមរបស់ទីក្រុងក្នុងដំណាក់កាល ២០២៥-២០៣០ និងអាណត្ដិបន្ដបន្ទាប់។ 

ក្នុងអាណត្តិ ២០២០-២០២៥ គណៈកម្មាធិការបក្ស អាជ្ញាធរ និងប្រជាជនទីក្រុងហូជីមិញ និងខេត្ដ Binh Duong និងខេត្ដ Ba Ria-Vung Tau បានរួបរួមគ្នា និងខិតខំពុះពារជំនះរាល់បញ្ហាប្រឈមនានា និងសម្រេចបានលទ្ធផលសំខាន់ៗជាច្រើន និងទូលំទូលាយលើគ្រប់វិស័យ។

នៅមហាសន្និបាត លោក Tran Luu Quang ត្រូវបានជ្រើសតាំងឱ្យកាន់តំណែងជាលេខាគណៈកម្មាធិការបក្សទីក្រុងហូជីមិញសម្រាប់អាណត្តិ ២០២៥-២០៣០។

បកប្រែដោយ Pham Diep