លោក Le Thanh Long ឧបនាយករដ្ឋមន្ត្រីវៀតណាម អញ្ជើញចូលរួមសន្និសីទប្រចាំឆ្នាំ LawAsia លើកទី៣៨

នេះគឺជាសកម្មភាពប្រចាំឆ្នាំដ៏សំខាន់បំផុតរបស់ LawAsia។ សន្និសីទ LawAsia លើកទី៣៨ មានប្រធានបទ “ប្រតិបត្តិការនៅអាស៊ីប៉ាស៊ីហ្វិក៖ បញ្ហាប្រឈមផ្នែកច្បាប់ វប្បធម៌ និងបរិស្ថាន”។ សន្និសីទនេះក៏ជាកន្លែងភ្ជាប់មេធាវី និងសមាគម សម្រាប់គោលដៅដ៏ថ្លៃថ្នូនៃវិជ្ជាជីវៈច្បាប់ក្នុងការបម្រើសហគមន៍។

លោក Le Thanh Long ឧបនាយករដ្ឋមន្ត្រី អញ្ជើញ​ចូលរួម និងថ្លែងសុន្ទរកថាក្នុងពិធីបើក

មានប្រសាសន៍​ក្នុងសន្និសីទនេះ លោក Le Thanh Long បានសង្កត់ធ្ងន់ថា សន្និសីទ LawAsia លើកទី៣៨ គឺជាព្រឹត្តិការណ៍សំខាន់ ជាឱកាសសម្រាប់សហគមន៍មេធាវី មេធាវី និងអ្នកជំនាញច្បាប់ក្នុងតំបន់អាស៊ីប៉ាស៊ីហ្វិក ដើម្បីចែករំលែកបទពិសោធន៍ និងរួមដៃគ្នាកសាងបរិយាកាសច្បាប់ប្រកបដោយតម្លាភាព  និងស្ថិរភាព ដែលលើកកម្ពស់វិបុលភាពរួម។

ក្នុងសន្និសីទឆ្នាំនេះ វៀតណាមបានលើកឡើង​ប្រធានបទចំនួនពីរគឺ “ពង្រឹងមូលដ្ឋានគ្រឹះនៃសន្តិភាព កិច្ចសហប្រតិបត្តិការ និងការអភិវឌ្ឍន៍នៅតំបន់សមុទ្រខាងកើត ដោយឈរលើមូលដ្ឋានច្បាប់អន្តរជាតិ” និង “តួនាទីនៃច្បាប់ក្នុងការរក្សាភាពចម្រុះ និងភាពវិសេសវិសាល​នៃវប្បធម៌ដើមក្នុងបរិបទសកលភាវូបនីយកម្ម”។

វៀតណាមបានអះអាងនូវការប្តេជ្ញាចិត្ត និងការតស៊ូការពារអធិបតេយ្យភាព និងផលប្រយោជន៍ស្របច្បាប់នៅសមុទ្រ។ ដោះស្រាយយ៉ាងសកម្មរាល់​វិវាទ និងការខ្វែងគំនិតគ្នានៅសមុទ្រដោយមធ្យោបាយសន្តិវិធី ឈរលើមូលដ្ឋានច្បាប់អន្តរជាតិ ជាពិសេស UNCLOS 1982។ ទន្ទឹមនឹងនោះ វៀតណាមផ្តោតសំខាន់លើការរក្សា អភិរក្ស និងលើកតម្កើងអត្តសញ្ញាណវប្បធម៌ចម្រុះរបស់ប្រទេស​ជាតិ​ក្នុងដំណើរការសមាហរណកម្មអន្តរជាតិយ៉ាងស៊ីជម្រៅ៕

បកប្រែដោយ Duy Hoan