នៅក្នុងកិច្ចពិភាក្សា លោក Bui Thanh Son ឧបនាយករដ្ឋមន្ត្រី បានស្នើឱ្យ EU ជំរុញប្រទេសជាសមាជិកឆាប់បញ្ចប់ដំណើរការផ្តល់សច្ចាប័នលើកិច្ចព្រមព្រៀងគាំពារការវិនិយោគវៀតណាម - EU (EVIPA) ដោយហេតុនោះ ការពារសិទ្ធិ និងលើកទឹកចិត្តសហគ្រាសអឺរ៉ុបវិនិយោគក្នុងគម្រោងសំខាន់ៗនៅវៀតណាម។ លោក Bui Thanh Son បានស្នើឱ្យ EU ជួយឧបត្ថម្ភវៀតណាមក្នុងការអភិវឌ្ឍសេដ្ឋកិច្ចសមុទ្រ លើកកំពស់សមត្ថភាពរបស់អ្នកនេសាទ និងអង្គភាពអាជីវកម្មក្នុងការបន្ស៊ាំខ្លួនទៅនឹងការកេងប្រវ័ញ្ចប្រកបដោយការទទួលខុសត្រូវ ការពារជីវៈចម្រុះ និងធនធានសមុទ្រ។ លោកឧបនាយករដ្ឋមន្ត្រីបានចែករំលែកអំពីលទ្ធផល និងការខិតខំប្រឹងប្រែងយ៉ាងម៉ឺងម៉ាត់របស់វៀតណាម ក្នុងការប្រយុទ្ធប្រឆាំងនឹងការនេសាទខុសច្បាប់ ការនេសាទមិនរាយការណ៍ និងមិនអនុវត្តតាមសេចក្តីកំណត់ (IUU) ព្រមទាំងសម្តែងនូវក្តីសង្ឃឹមថា EU នឹងដកកាតលឿង IUU ក្នុងពេលឆាប់ៗនេះ បង្កើតលក្ខខណ្ឌជំរុញកិច្ចសហប្រតិបត្តិការ វៀតណាម-EU ក្នុងវិស័យសេដ្ឋកិច្ចសមុទ្រ ជាពិសេសការអភិវឌ្ឍការធ្វើនេសាទប្រកបដោយនិរន្តរភាព។

leftcenterrightdel
លោក Bui Thanh Son ឧបនាយករដ្ឋមន្ត្រី និងលោកស្រី Kaja Kallas អនុប្រធានគណៈកម្មការអឺរ៉ុប (រូបថត៖ ក្រសួងការបរទេស)

លោកស្រី Kaja Kallas អនុប្រធាន EC បានទទួលស្គាល់ការបោះជំហានសំខាន់ៗរបស់វៀតណាមក្នុងការបង្ការ និងប្រយុទ្ធប្រឆាំងនឹង IUU ព្រមទាំងឲ្យដឹងថា EC គ្រោងនឹងបញ្ជូនគណៈប្រតិភូ មកធ្វើការនៅវៀតណាមក្នុងខែវិច្ឆិកា ឆ្នាំ ២០២៥។ ភាគី EU ក៏មានបំណងចង់ពង្រីកកិច្ចសហប្រតិបត្តិការលើវិស័យបម្រើការអភិវឌ្ឍសេដ្ឋកិច្ចក្នុងបរិបទដែលភាគីទាំងពីរកំពុងឆ្ពោះទៅការតម្លើងទំនាក់ទំនងទៅជាភាពជាដៃគូគ្រប់ជ្រុងជ្រោយ។

ភាគីទាំងពីរក៏បានពិភាក្សាអំពីបញ្ហាក្នុងតំបន់ និងអន្តរជាតិដែលភាគីទាំងពីរមានការយកចិត្តទុកដាក់ដូចគ្នា បន្តបញ្ជាក់ពីតួនាទី និងសារៈសំខាន់នៃធម្មនុញ្ញអង្គការសហប្រជាជាតិ និងច្បាប់អន្តរជាតិ ព្រមទាំងឯកភាពថា ជម្លោះគួរតែត្រូវបានដោះស្រាយដោយសន្តិវិធី តាមរយៈការពិគ្រោះ និងការពិភាក្សា។ ក្នុងឱកាសនេះ លោក Bui Thanh Son ឧបនាយករដ្ឋមន្ត្រី បានអញ្ជើញលោកស្រី Kaja Kallas អនុប្រធាន EC មកបំពេញទស្សនកិច្ចនៅវៀតណាម ព្រមទាំងអញ្ជើញ EU បញ្ជូនតំណាងជាន់ខ្ពស់ទៅចូលរួមពិធីចុះហត្ថលេខាលើអនុសញ្ញារបស់អង្គការសហប្រជាជាតិស្តីពីការប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិតដែលនឹងប្រព្រឹត្តទៅនៅថ្ងៃទី ២៥ និង ២៦ ខែតុលាខាងមុខនេះ នៅទីក្រុងហាណូយ។ លោកស្រីអនុប្រធាន EC បានទទួលយកការអញ្ជើញ ហើយសង្ឃឹមថានឹងទៅបំពេញទស្សនកិច្ចនៅវៀតណាមក្នុងពេលឆាប់ៗនេះ។ ភាគី EU នឹងជូនដំណឹងក្នុងពេលឆាប់ៗនេះអំពីការបញ្ជូនគណៈប្រតិភូទៅចូលរួមពិធីចុះហត្ថលេខាលើអនុសញ្ញាដែលវៀតណាមធ្វើជាម្ចាស់ផ្ទះ៕

បកប្រែដោយ Huyen Trang