វៀតណាមបញ្ចប់អាណត្តិរបស់ខ្លួននៅក្រុមប្រឹក្សាប្រតិបត្តិអង្គការ UNESCO ដំណាក់កាល ២០២១-២០២៥ ដោយជោគជ័យ

នេះគឺជាកិច្ចប្រជុំដ៏សំខាន់មួយដើម្បីតែងតាំងមុខតំណែងជាអ្នកដឹកនាំសំខាន់ៗរបស់អង្គការ UNESCO ដូចជាអគ្គនាយកអង្គការ UNESCO សម្រាប់អាណត្តិ ២០២៥-២០២៩ និងប្រធាននៃមហាសន្និបាតរបស់អង្គការ UNESCO លើកទី៤៣។ ចូលរួមកិច្ចប្រជុំ គណៈប្រតិភូវៀតណាមដឹកនាំដោយលោក Ngo Le Van អនុរដ្ឋមន្ត្រីក្រសួងការបរទេស បានជួបពិភាក្សាការងារជាមួយថ្នាក់ដឹកនាំបច្ចុប្បន្ន និងអនាគតរបស់អង្គការ UNESCO រួមមាន៖ លោកស្រី Audrey Azoulay អគ្គនាយកបច្ចុប្បន្ន លោក Khaled El-Enany អគ្គនាយកដែលត្រូវបានតែងតាំង  លោក Xing Qu អគ្គនាយករង និងថ្នាក់ដឹកនាំស្ថាប័នជាច្រើននៃអង្គការ UNESCO និងប្រធានគណៈប្រតិភូនៃប្រទេសនានាប្រចាំអង្គការ UNESCO។

លោក Ngo Le Van អនុរដ្ឋមន្ត្រីក្រសួងការបរទេស ថ្លែងសុន្ទរកថាបើកកិច្ចប្រជុំពេញអង្គនៃសម័យប្រជុំលើកទី ២២២ នៃក្រុមប្រឹក្សាប្រតិបត្តិអង្គការ UNESCO (រូបថត៖ nhandan.vn)

ក្នុងជំនួបធ្វើការទាំងឡាយ ថ្នាក់ដឹកនាំអង្គការ UNESCO និងប្រធានគណៈប្រតិភូនៃប្រទេសនានា បានចាត់ទុកវៀតណាមជាដៃគូយុទ្ធសាស្ត្រ និងគួរឱ្យទុកចិត្តរបស់អង្គការ UNESCO ព្រមទាំងវាយតំលៃខ្ពស់ចំពោះវៀតណាម ដែលបានអនុវត្តដោយជោគជ័យនូវតួនាទីជាសមាជិកក្រុមប្រឹក្សាប្រតិបត្តិអង្គការ UNESCO ដំណាក់កាល ២០២១-២០២៥ និងបន្តជាសមាជិកសកម្ម រួមចំណែកប្រកបដោយការទទួលខុសត្រូវ សំខាន់ និងមានប្រសិទ្ធភាពចំពោះកិច្ចសហប្រតិបត្តិការរួមក្នុងយន្តការប្រតិបត្តិការសំខាន់ៗផ្សេងទៀត ហើយសង្ឃឹមថា វៀតណាមនឹងបន្តចែករំលែកជាមួយប្រទេសនានាអំពីគោលនយោបាយវប្បធម៌ អប់រំ និងបទពិសោធន៍ក្នុងការអភិរក្សបេតិកភណ្ឌជាមួយនឹងការអភិវឌ្ឍប្រកបដោយចីរភាព៕

បកប្រែដោយ Thanh Cong