An Giang ចុះហត្ថលេខាជាមួយខេត្តតាកែវលើការរុករក និងធ្វើមាតុភូមិនិវត្តន៍អដ្ឋិធាតុយុទ្ធជនពលី

លោក Le Trung Ho និង លោក ស៊ុត ខុន ចុះហត្ថលេខាលើអនុស្សរណៈនៃកិច្ចសហប្រតិបត្តិការ

ថ្លែងក្នុងពិធីនេះ លោក ស៊ុត ខុន បានស្វាគមន៍យ៉ាងកក់ក្តៅចំពោះគណៈប្រតិភូខេត្ត An Giang ដែលអញ្ជើញចូលរួមក្នុងពិធីចុះហត្ថលេខានេះ។ ជាមួយគ្នានេះ លោកបានវាយតម្លៃខ្ពស់ចំពោះកិច្ចសហប្រតិបត្តិការរវាងខេត្តតាកែវ និងខេត្ត An Giang ក្នុងការស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា នៅខេត្តតាកែវ សម្រេចបានលទ្ធផលជាច្រើន។

ប្រមុខគណៈប្រតិភូទាំងពីរអញ្ជើញជាអធិបតីក្នុងពិធីចុះហត្ថលេខា និងប្រគល់អំណោយ បង្ហាញពីសាមគ្គីភាព និងកិច្ចសហប្រតិបត្តិការ

លោក ស៊ុត ខុន នឹងបន្តបង្កើនការគាំទ្រខេត្ត An Giang ក្នុងការស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជិវិតក្នុងសម័យសង្គ្រាមនៅកម្ពុជា។

លោក ស៊ុត ខុន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនវៀតណាម ដែលបានជួយកម្ពុជាក្នុងសម័យសង្គ្រាម។ ជូនពរទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា-វៀតណាមនិយាយរួម និងខេត្តតាកែវ និងខេត្ត An Giang និយាយដោយឡែក កាន់តែមាននិរន្តរភាព និងរឹងមាំថែមទៀត។

ប្រគល់ថវិកាឧបត្ថម្ភដល់គណៈកម្មការជំនាញខេត្តតាកែវ

មានប្រសាសន៍ក្នុងពិធី លោក Le Trung Ho បានចែករំលែកថា ការរុករក ប្រមូល និងធ្វើមាតុភូមិនិវត្តន៍អដ្ឋិធាតុយុទ្ធជនពលីមានអត្ថន័យជ្រាលជ្រៅ បង្ហាញអំពីសីលធម៌ “ផឹកទឹកឱ្យនឹកដល់ប្រភព ជ្រកម្លប់ឱ្យនឹកដល់អ្នកដាំ” របស់ប្រជាជនវៀតណាម។

ចាប់តាំងពីការអនុវត្តកិច្ចព្រមព្រៀងរវាងរដ្ឋាភិបាលវៀតណាម និងរាជរដ្ឋាភិបាលនៃព្រះរាជាណាចក្រកម្ពុជា ដែលបានចុះហត្ថលេខានៅថ្ងៃទី ២៨ ខែសីហា ឆ្នាំ ២០០០ នៅរាជធានីភ្នំពេញ រហូតមកដល់ពេលនេះ ក្រុមចំនួន ២ ដែលស្វែងរក និងប្រមូលអដ្ឋិធាតុយុទ្ធជនពលីនៃខេត្ត An Giang បានរុករក និងប្រមូលអដ្ឋិធាតុយុទ្ធជនចំនួន ៤.២៨៦ អដ្ឋិធាតុនៅក្នុងខេត្តចំនួន ៦ នៃព្រះរាជាណាចក្រកម្ពុជា។

នៅឯខេត្តតាកែវ ក្រុម K93 នៃបញ្ជាការដ្ឋានយោធាខេត្ត An Giang បានរុករក និងប្រមូលអដ្ឋិធាតុយុទ្ធជនពលីចំនួន ៨៣៤ ដែលក្នុងនោះ អដ្ឋិធាតុយុទ្ធជនចំនួន ១៥ ត្រូវបានប្រមូលនៅរដូវប្រាំង ឆ្នាំ ២០២៤ - ២០២៥។

លោកអនុប្រធានគណៈកម្មាធិការប្រជាជនខេត្ត An Giang បានថ្លែងអំណរគុណចំពោះការសម្របសម្រួល និងជំនួយរបស់ថ្នាក់ដឹកនាំគ្រប់លំដាប់ថ្នាក់ អាជ្ញាធរ គណៈកម្មាធិការជំនាញ កងកម្លាំងប្រដាប់អាវុធ និងប្រជាជនខេត្តតាកែវ ក្នុងការផ្តល់ព័ត៌មាន ណែនាំ ការពារ និងជួយដល់ក្រុមរុករក និងប្រមូលអដ្ឋិធាតុយុទ្ធជនពលី។

ខេត្ត An Giang សង្ឃឹមថា ថ្នាក់ដឹកនាំខេត្ត គណៈកម្មាធិការជំនាញ និងប្រជាជនខេត្តតាកែវ នឹងបន្តយកចិត្តទុកដាក់ សម្របសម្រួល គាំទ្រ និងបង្កលក្ខណៈងាយស្រួលដល់ក្រុម K93 ដើម្បីបន្តបេសកកម្មរុករក និងប្រមូលអដ្ឋិធាតុយុទ្ធជនពលីក្នុងខេត្តឱ្យទទួលបានលទ្ធផលល្អបំផុត៕

បកប្រែដោយ Duy Hoan