ជំរុញទំនាក់ទំនងមិត្តភាពជាប្រពៃណី និងពង្រីកកិច្ចសហប្រតិបត្តិការរវាងវៀតណាម និងអាមេនី

ជំរុញកិច្ចសហប្រតិបត្តិការទ្វេភាគីលើគ្រប់ជ្រុងជ្រោយរវាងវៀតណាម និងអាមេនី

ក្នុងជំនួបនេះ លោក Vahagn Khachaturyan ប្រធានាធិបតីអាមេនី វាយតំលៃខ្ពស់ចំពោះដំណើរទស្សនកិច្ចផ្លូវការរបស់លោក Tran Thanh Man ប្រធានរដ្ឋសភាវៀតណាមនៅអាមេនី ព្រមទាំងអះអាងថា ដំណើរទស្សនកិច្ចលើកដំបូងរបស់ថ្នាក់ដឹកនាំជាន់ខ្ពស់​វៀតណាមទៅកាន់អាមេនី ចាប់តាំងពីប្រទេសទាំងពីរបានបង្កើតទំនាក់ទំនងការទូតជាព្រឹត្តិការណ៍សំខាន់ក្នុងការជំរុញទំនាក់ទំនងមិត្តភាពជាប្រពៃណី និងពង្រីកកិច្ចសហប្រតិបត្តិការរវាងវៀតណាម និងអាមេនី។

លោក Tran Thanh Man ប្រធានរដ្ឋសភាវៀតណាម បានសង្កត់ធ្ងន់ថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងមិត្តភាព​ជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយជាមួយអាមេនី ព្រមទាំងមានបំណងចង់ជំរុញ និងពង្រឹងទំនុកចិត្តខាងនយោបាយ កិច្ចសហប្រតិបត្តិការទ្វេភាគីគ្រប់ជ្រុងជ្រោយ និងយូរអង្វែង ដើម្បីផលប្រយោជន៍រួមរបស់ប្រជាជននៃប្រទេសទាំងពីរ ដើម្បីសន្តិភាព ស្ថិរភាព និងអភិវឌ្ឍន៍ក្នុងតំបន់ និងពិភពលោក។

លោក Tran Thanh Man ប្រធានរដ្ឋសភាវៀតណាម  និងលោក Vahagn Khachaturyan ប្រធានាធិបតីអាមេនី

រីឯខ្លួនវិញ ប្រធានាធិបតីអាមេនី បានសង្កត់ធ្ងន់ថា ដោយមានមូលដ្ឋានគ្រឹះនៃទំនាក់ទំនង ប្រពៃណីនិងមិត្តភាពដ៏រឹងមាំ ហើយជា​មួយនឹងគោលដៅអភិវឌ្ឍន៍ប្រទេសដ៏រឹងមាំនៃភាគីទាំងពីរ ប្រទេសទាំងពីរនឹងបន្តពង្រីកកិច្ចសហប្រតិបត្តិការលើវិស័យជាច្រើន ជាពិសេស​លើវិស័យសេដ្ឋកិច្ច សុខាភិបាល ទេសចរណ៍ ហេដ្ឋារចនាសម្ព័ន្ធ និងតភ្ជាប់លើការដឹកជញ្ជូន ដើម្បីធានាឲ្យបាននូវការតភ្ជាប់ប្រកប​ដោយរលូនរវាងបណ្ដាខឿនសេដ្ឋកិច្ច ពង្រីកសក្តានុពលរបស់ភាគីនីមួយៗ និងបំពេញតម្រូវការអភិវឌ្ឍន៍របស់ភាគីទាំងពីរ។

ក្នុងបរិយាកាសស្និទ្ធស្នាល ថ្នាក់ដឹកនាំទាំងពីរមានក្ដីរីករាយចំពោះការអភិវឌ្ឍជាវិជ្ជមាននៃទំនាក់ទំនងវៀតណាម និងអាមេនីលើវិស័យជាច្រើន និង​កត់សម្គាល់ការថែរក្សាការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេសថ្នាក់ខ្ពស់ដែលបានអនុវត្តយ៉ាងសកម្ម និងមានប្រសិទ្ធភាព។

មេដឹកនាំទាំងពីរបានឯកភាពថា ចម្ងាយភូមិសាស្ត្រមិនមែនជាឧបសគ្គសម្រាប់កិច្ចសហប្រតិបត្តិការទ្វេភាគីនោះទេ។ អាស្រ័យហេតុនេះ មេដឹកនាំទាំងពីរបានឯកភាពថា រដ្ឋសភា រដ្ឋាភិបាល និងទីភ្នាក់ងារនៃប្រទេសទាំងពីរនឹងសម្របសម្រួល បង្កើតក្របខ័ណ្ឌច្បាប់ និងលក្ខខណ្ឌអំណោយផលសម្រាប់អាជីវកម្មនៃប្រទេសទាំងពីរតភ្ជាប់ដោយផ្ទាល់ និងស្វែងរកឱកាសកិច្ចសហប្រតិបត្តិការនិងវិនិយោគ បង្កើនការផ្លាស់ប្តូរព័ត៌មានអំពីគោលនយោបាយនិងទីផ្សារ ព្រមទាំងស្រាវជ្រាវនិងដោះស្រាយការលំបាកសម្រាប់អាជីវកម្មនៃប្រទេសទាំងពីរវិនិយោគចូលក្នុងទីផ្សារគ្នាទៅវិញទៅមក។ ទន្ទឹមនឹងនោះ ជំរុញកិច្ចសហប្រតិបត្តិការលើវិស័យថ្មីៗជាច្រើន ដូចជាការតភ្ជាប់អាកាសចរណ៍ វិទ្យាសាស្ត្រ និងបច្ចេកវិទ្យា នវានុវត្តន៍ ការធ្វើបរិវត្ដកម្មឌីជីថល បញ្ញាសិប្បនិមិត្ត (AI) និងការផ្លាស់ប្តូរបៃតង...

មេដឹកនាំទាំងពីរបានឯកភាពលើសារៈសំខាន់នៃការជំរុញកិច្ចសហប្រតិបត្តិការលើវិស័យការពារជាតិ សន្តិសុខ ការអប់រំ-បណ្តុះបណ្តាល វប្បធម៌ កីឡា ការផ្លាស់ប្តូរប្រជាជននិងប្រជាជន និងទេសចរណ៍រវាងប្រទេសទាំងពីរ។ លោក Tran Thanh Man ប្រធានរដ្ឋសភាវៀតណាម បានស្នើអាមេនីជួយគាំទ្របណ្តុះបណ្តាលធនធានមនុស្សសម្រាប់វៀតណាមលើវិស័យដូចជា បច្ចេកវិទ្យាខ្ពស់ បង្កើនការផ្លាស់ប្តូរនិស្សិតដើម្បីរៀនសូត្រពីគ្នាទៅវិញទៅមក និងចែករំលែកបទពិសោធន៍ និងសហប្រតិបត្ដិការនិងអភិវឌ្ឍរួម។

ពិភាក្សាអំពីកិច្ចសហប្រតិបត្តិការពហុភាគី និងក្នុងតំបន់ លោក Tran Thanh Man ប្រធានរដ្ឋសភាវៀតណាម និងលោក Vahagn Khachaturyan ប្រធានាធិបតីអាមេនី បានឯកភាពថា ប្រទេសទាំងពីរនឹងបន្តសម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមកនៅវេទិកាពហុភាគី។

លោកប្រធានរដ្ឋសភាវៀតណាម បានអះអាងថា វៀតណាមត្រៀមខ្លួនជាស្រេចដើម្បីគាំទ្រការតភ្ជាប់អាមេនីជាមួយអាស៊ាន ទន្ទឹមនឹងនោះ លោកប្រធានរដ្ឋសភាវៀតណាម បានស្នើឲ្យអាមេនីគាំទ្រគោលជំហរបស់រអាស៊ាន និងវៀតណាមលើបញ្ហាសមុទ្រខាងកើត ដោះស្រាយជម្លោះដោយសន្តិវិធី ដោយឈរលើមូលដ្ឋានច្បាប់អន្តរជាតិ ធម្មនុញ្ញអង្គការសហប្រជាជាតិ និងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS)។

រដ្ឋសភាវៀតណាម និងរដ្ឋសភាអាមេនីចុះហត្ថលេខាលើកិច្ចព្រមព្រៀងសហប្រតិបត្តិការ

គួររំលឹកថា នាព្រឹកថ្ងៃទី៣ ខែមេសា នៅទីស្នាក់ការរដ្ឋសភាអាមេនី ក្នុងទីក្រុង Yerevan លោក Alen Simonyan ប្រធានរដ្ឋសភាអាមេនី បានអញ្ជើញជាអធិបតីក្នុងពិធីទទួលស្វាគមន៍ លោក Tran Thanh Man ប្រធានរដ្ឋសភាវៀតណាម និងគណៈប្រតិភូជាន់ខ្ពស់នៃរដ្ឋសភាវៀតណាមមកបំពេញទស្សនកិច្ចជាផ្លូវការនៅអាមេនី។ ភ្លាមៗបន្ទាប់ពីពិធីទទួលស្វាគមន៍ ប្រធានរដ្ឋសភាទាំងពីរបានជួបពិភាក្សាជាមួយគ្នា។

លោក Tran Thanh Man ប្រធានរដ្ឋសភាវៀតណាម ពិភាក្សាការងារជាមួយលោក Alen Simonyan ប្រធានរដ្ឋសភាអាមេនី

នៅកិច្ចពិភាក្សានេះ ប្រធានរដ្ឋសភាទាំងពីរបានវាយតម្លៃថា ក្នុងរយៈពេលកន្លងមក ទំនាក់ទំនងវៀតណាម និងអាមេនីមានការអភិវឌ្ឍន៍វិជ្ជមានលើវិស័យជាច្រើន ហើយបញ្ជាក់ថា ភាគីទាំងពីរនៅមានសក្ដានុពលជាច្រើន ដើម្បីជំរុញនិងលើកកំពស់ប្រសិទ្ធភាពនៃកិច្ចសហប្រតិបត្តិការលើគ្រប់វិស័យ ដើម្បីផលប្រយោជន៍របស់ប្រជាជននៃប្រទេសទាំងពីរ ដើម្បីសន្តិភាព កិច្ចសហប្រតិបត្តិការនិងការអភិវឌ្ឍក្នុងតំបន់និងពិភពលោក។ អាស្រ័យហេតុនេះ ប្រធានរដ្ឋសភាទាំងពីរបានឯកភាពបង្កើនការផ្លាស់ប្តូរគណៈប្រតិភូ ជាពិសេសថ្នាក់ខ្ពស់ ដើម្បីពង្រឹងទំនុកចិត្តខាងនយោបាយ និងបង្កើតមូលដ្ឋានគ្រឹះសម្រាប់ជំរុញកិច្ចសហប្រតិបត្តិការលើវិស័យផ្សេងៗទៀត។

ដោយអះអាងថា ប្រទេសទាំងពីរនៅមានសក្ដានុពលជាច្រើនដើម្បីជំរុញកិច្ចសហប្រតិបត្តិការលើវិស័យវប្បធម៌ ទេសចរណ៍ អប់រំ-បណ្តុះបណ្តាល គមនាគមន៍ និងដឹកជញ្ជូន កិច្ចសហប្រតិបត្តិការរវាងមូលដ្ឋាននានា និងការផ្លាស់ប្តូរប្រជាជននិងប្រជាជន អាស្រ័យហេតុនេះប្រធានរដ្ឋសភាទាំងពីរបានឯកភាពពង្រឹងកិច្ចសហប្រតិបត្តិការរវាងមូលដ្ឋាននានាននៃប្រទេសទាំងពីរដើម្បីពង្រីកសក្តានុពលនៃមូលដ្ឋាននានា រួមចំណែកដល់កិច្ចសហប្រតិបត្តិការរវាងប្រទេសទាំងពីរនិយាយរួម។

ទាក់ទងនឹងកិច្ចសហប្រតិបត្តិការនៅវេទិកាអន្តរជាតិនិងតំបន់ ប្រធានរដ្ឋសភាទាំងពីរបានឯកភាពបន្តរក្សាជំនួប កិច្ចពិគ្រោះយោបល់ សម្របសម្រួល និងគាំទ្រគ្នាទៅវិញទៅមកនៅវេទិកាសភាពហុភាគី និងបញ្ហាតំបន់ និងពិភពលោក ដូចជាសហភាពអន្តរសភា (IPU) និងមហាសន្និបាតអន្តរសភានៃប្រជាជាតិអាស៊ីអាគ្នេយ៍ (AIPA) និងសហភាពសភា ហ្វ្រង់កូហ្វូនី (APF)។

ប្រធានរដ្ឋសភានៃប្រទេសទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការរវាងរដ្ឋសភាជាតិវៀតណាម និងអាមេនី

ក្នុងនាមជាសមាជិកសកម្មរបស់អាស៊ាន និង AIPA ប្រធានរដ្ឋសភាវៀតណាម បានអះអាងថា វៀតណាមត្រៀមខ្លួនជាស្រេចដើម្បីធ្វើជាស្ពានតភ្ជាប់សម្រាប់អាមេនីពង្រីកកិច្ចសហប្រតិបត្តិការជាមួយអាស៊ាន-AIPA និងសភាសមាជិកដទៃទៀត។ លោក Tran Thanh Man ប្រធានរដ្ឋសភាវៀតណាម ក៏បានស្នើភាគីទាំងពីរបន្តសម្របសម្រួលប្រកបដោយប្រសិទ្ធភាពនៅវេទិកាតំបន់ ហើយគាំទ្រគោលជំហររបស់អាស៊ាននិងវៀតណាមលើបញ្ហាសមុទ្រខាងកើត និងដោះស្រាយជម្លោះដោយសន្តិវិធី ដោយឈរលើមូលដ្ឋានច្បាប់អន្តរជាតិ ធម្មនុញ្ញអង្គការសហប្រជាជាតិ និង UNCLOS ឆ្នាំ ១៩៨២។

បន្ទាប់ពីកិច្ចពិភាក្សា ប្រធានរដ្ឋសភានៃប្រទេសទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការរវាងរដ្ឋសភាជាតិវៀតណាម និងអាមេនី។ ការចុះហត្ថលេខាលើកិច្ចព្រមព្រៀងសហប្រតិបត្តិការនឹងបង្កើតក្របខ័ណ្ឌច្បាប់សម្រាប់ពង្រឹងបន្ថែមទៀតនូវទំនាក់ទំនងរវាងស្ថាប័ននីតិប្បញ្ញត្តិទាំងពីរនាពេលខាងមុខ។

* ក្នុងក្របខ័ណ្ឌនៃដំណើរទស្សនកិច្ចនេះ នាព្រឹកថ្ងៃទី៣ ខែមេសា លោក Tran Thanh Man ប្រធានរដ្ឋសភាវៀតណាម បានទទួលជួបជាមួយលោក Hasmik Hakobyan ប្រធានក្រុមសមាជិកសភាមិត្តភាពអាមេនី-វៀតណាម៕

បកប្រែដោយ Pham Diep