លិខិតរបស់រដ្ឋមន្ត្រីក្រសួងការពារប្រទេសផ្ញើជូននាយទាហាន និងយោធិនជំនាញ ដែលចូលរួមជម្នះផលវិបាកនៃគ្រោះរញ្ជួយដីនៅមីយ៉ាន់ម៉ា

សូមគោរពជូនចំពោះនាយទាហាន យោធិនជំនាញដែលចូលរួមជម្នះផលវិបាកនៃការរញ្ជួយដីនៅប្រទេសមីយ៉ាន់ម៉ា។

សមមិត្តទាំងអស់ជាទីមេត្រី!

នៅព្រឹកថ្ងៃទី២៨ ខែមីនា ឆ្នាំ២០២៥ ការរញ្ជួយដីដ៏ខ្លាំងមួយបានកើតឡើងក្នុងប្រទេសមីយ៉ាន់ម៉ា ដែលបានបង្កការបាត់បង់យ៉ាងធ្ងន់ធ្ងរដល់មនុស្ស និងទ្រព្យសម្បត្តិ។ យោងតាមស្ថិតិមកទល់ពេលនេះ មនុស្សជាង ៣ ពាន់នាក់បានស្លាប់ និងរាប់ម៉ឺននាក់បានរងផលប៉ះពាល់។ រដ្ឋាភិបាលមីយ៉ាន់ម៉ាបានអំពាវនាវដល់សហគមន៍អន្តរជាតិឲ្យជួយសង្គ្រោះ និងជម្នះផលវិបាក។

ដោយលើកតម្កើងប្រពៃណីនៃការស្រឡាញ់រាប់អាន ការជួយគាំទ្រគ្នាទៅវិញទៅមក ក្រោមស្មារតី “វៀតណាមជាមិត្ត ជាដៃគូជឿទុកចិត្ត និងជាសមាជិកសកម្ម និងការទទួលខុសត្រូវរបស់សហគមន៍អន្តរជាតិ ឆ្លើយតបទៅនឹងការអំពាវនាវរបស់រដ្ឋាភិបាលមីយ៉ាន់ម៉ា និងអនុវត្តតាមការដឹកនាំរបស់លេខាប្រចាំការនៃគណៈលេខាមជ្ឈិមបក្ស នាយករដ្ឋមន្ត្រី គណៈកម្មាធិការបក្សយោធាមជ្ឈិមនោះ  ក្រសួងការពារប្រទេសវៀតណាមបានសម្រេចចិត្តចាត់បញ្ជូននាយទាហាន និងយោធិនជំនាញចំនួន ៨០ នាក់ រួមទាំងសម្ភារៈបរិក្ខារ ទៅជួយគាំទ្រមីយ៉ាន់ម៉ាជម្នះផលវិបាកនៃគ្រោះរញ្ជួយដី។

លោកនាយឧត្តមសេនីយ៍ Phan Van Giang សមាជិកការិយាល័យនយោបាយ អនុលេខាគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេសវៀតណាម

ទោះបីជាបេសកកម្មត្រូវបានអនុវត្តក្នុងរយៈពេលដ៏ខ្លី ហើយប្រឈមមុខនឹងអាកាសធាតុដ៏អាក្រក់ និងគ្រោះថ្នាក់ដោយសាររំញ័រនៅតែកើតឡើងជាបន្តបន្ទាប់ រួមទាំងការលំបាកខាងសម្ភារៈបរិក្ខារ ការហូបចុក ការស្នាក់នៅ ក៏ដោយ ក៏ប៉ុន្តែដោយមានភាពក្លាហាន បទពិសោធន៍ សមត្ថភាព និងការតាំងចិត្តខ្ពស់នោះ សមមិត្តទាំងអស់មិនខ្លាចការលំបាក ប្រណាំងប្រជែងនឹងពេលវេលា ខិតខំប្រឹងប្រែងអស់ពីកម្លាំងកាយចិត្ត ប្រើគ្រប់មធ្សោយបាយទាំងអស់ ដើម្បីសហការស្វែងរក និងជួយសង្គ្រោះជនរងគ្រោះជាច្រើននាក់ចេញពីគំនរបាក់បែក ប្រគល់ជូនអាជ្ញាធរមូលដ្ឋាននៃប្រទេសមីយ៉ាន់ម៉ា។ សកម្មភាពនោះរបស់សមមិត្តទាំងអស់បានបង្ហាញយ៉ាងស៊ីជម្រៅនូវស្មារតីអន្តរជាតិដ៏ថ្លៃថ្នូ ប្រពៃណីដ៏ល្អរបស់ប្រទេសជាតិ និភាពថ្លៃថ្នូរបស់ “កងទ័ពលោកអ៊ំហូ។

គណៈកម្មាធិការបក្សយោធាមជ្ឈិម ក្រសួងការពារប្រទេស ទទួលស្គាល់ កោតសរសើរ និងវាយតម្លៃខ្ពស់ចំពោះស្មារតីទទួលខុសត្រូវ ការខិតខំប្រឹងប្រែង និងលទ្ធផល​របស់សមមិត្តទាំងអស់។ ភារកិច្ចនៅប៉ុន្មាន​ថ្ងៃខាងមុខនៅតែធ្ងន់ លំបាក និងគ្រោះថ្នាក់។ ខ្ញុំសង្ឃឹមថាសមមិត្តទាំងអស់នឹងបន្តខិតខំប្រឹងប្រែង​ ប្តេជ្ញាចិត្តខ្ពស់​ ជួយជនរងគ្រោះបានច្រើន​ថែមទៀត។ រដ្ឋាភិបាល និងប្រជាជនមីយ៉ាន់ម៉ាកំពុងទន្ទឹងរង់ចាំជំនួយរបស់សមមិត្តទាំងអស់។ ប្រទេសជាតិ​ និងកងទ័ពប្រជាជនវៀតណាម តែងតែមានមោទនភាព និងរួមដំណើរនៅជាមួយសមមិត្តទាំងអស់។

សូមជូនពរសមមិត្តទាំងអស់មានសុខភាពល្អ សុភមង្គល សុវត្ថិភាព និងទទួល​បាន​ជោគជ័យលើគ្រប់​ភារកិច្ច។

នាយឧត្តមសេនីយ៍ PHAN VAN GIANG

បកប្រែដោយ Duy Hoan