លោកស្រី Valentina Matvienko បានអះអាងថា វៀតណាមគឺជាដៃគូធំបំផុត និងគួរឲ្យទុកចិត្តបំផុតរបស់រុស្ស៊ីនៅអាស៊ីអាគ្នេយ៍។ លោកស្រី Valentina Matvienko ក៏វាយតំលៃខ្ពស់ចំពោះការអភិវឌ្ឍជាវិជ្ជមានក្នុងទំនាក់ទំនងសហប្រតិបត្តិការលើវិស័យជាច្រើនរវាងប្រទេសទាំងពីរនាពេលថ្មីៗនេះ ហើយចាត់ទុកថា ការដែលប្រទេសទាំងពីរបង្កើនការផ្លាស់ប្តូរគណៈប្រតិភូលើគ្រប់លំដាប់ថ្នាក់ និងគ្រប់បណ្តាញគឺជាឱកាសល្អសម្រាប់ការផ្លាស់ប្តូរវិធានការដើម្បីជំរុញទំនាក់ទំនង និងអនុវត្តកិច្ចព្រមព្រៀងសហប្រតិបត្តិការរវាងប្រទេសទាំងពីរ។

leftcenterrightdel
លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីការបរទេស ជួបជាមួយលោកស្រី Valentina Matvienko ប្រធានក្រុមប្រឹក្សាសហព័ន្ធ (ព្រឹទ្ធសភា) នៃសភាសហព័ន្ធរុស្ស៉ី (រូបថត៖ vov.vn)

លោក Bui Thanh Son បានអះអាងថា កិច្ចសហប្រតិបត្តិការរវាងសភានៃប្រទេសទាំងពីរមានតួនាទីសំខាន់ក្នុងទំនាក់ទំនងភាពជាដៃគូយុទ្ធសាស្ត្រលើគ្រប់វិស័យរវាងវៀតណាម និងសហព័ន្ធរុស្ស៊ី។ លោកឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសវៀតណាម សង្ឃឹមថា ក្រុមប្រឹក្សាសហព័ន្ធ នឹងបន្តសហការយ៉ាងជិតស្និទ្ធជាមួយរដ្ឋសភាវៀតណាម ក្នុងការត្រួតពិនិត្យ និងជំរុញការអនុវត្តប្រកបដោយប្រសិទ្ធភាពនូវកិច្ចព្រមព្រៀងសហប្រតិបត្តិការដែលសម្រេចបានរវាងថ្នាក់ដឹកនាំជាន់ខ្ពស់ និងរដ្ឋាភិបាលនៃប្រទេសទាំងពីរ។ លោកស្នើឲ្យក្រុមប្រឹក្សាសហព័ន្ធបន្តដើរតួនាទីជាស្ពានជួយខេត្តក្រុងវៀតណាម ក្នុងការបង្កើតទំនាក់ទំនងសហប្រតិបត្តិការជាមួយមូលដ្ឋាន​នានា​នៃ​រុស្ស៊ី ហើយអនុវត្តកិច្ចសហប្រតិបត្តិការតាមកិច្ចព្រមព្រៀងដែលបានចុះហត្ថលេខា។

*នាថ្ងៃដដែល លោក Bui Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានជួបសន្ទនាជាមួយលោក Alexey Overchuk ឧបនាយករដ្ឋមន្ត្រីនៃសហព័ន្ធរុស្ស៊ី។

ឧបនាយករដ្ឋមន្ត្រីទាំងពីរបានពិភាក្សាលើកិច្ចសហប្រតិបត្តិការទ្វេភាគី ជាពិសេសលើវិស័យសេដ្ឋកិច្ច ពាណិជ្ជកម្ម និងការវិនិយោគ។ លោក Bui Thanh Son បានស្នើឲ្យភាគីរុស្ស៊ីបង្កើនកូតានាំចេញអង្កររបស់វៀតណាម និងស្វែងរកទិសដៅវិនិយោគថ្មី ដើម្បីបង្កើតលក្ខខណ្ឌអំណោយផលសម្រាប់គម្រោងវិនិយោគរបស់ធុរកិច្ចនៃប្រទេសទាំងពីរ បង្កើនការតភ្ជាប់ផ្លូវអាកាស ជំរុញទេសចរណ៍ សម្រួលដល់ការធ្វើដំណើររបស់ប្រជាជន និងជំនួបប្រាស្រ័យរវាងប្រជាជននិងប្រជាជន៕

បកប្រែដោយ Thuy Anh