លោក To Lam អគ្គលេខាបក្សកុម្មុយនិស្តវៀតណាម អញ្ជើញចូលរួមពិធីគោរពវិញ្ញាណក្ខន្ធលោក Khamtay Siphandone

ក្នុងឱកាសនេះ លោក To Lam អគ្គលេខាបក្ស ក៏បានមានជំនួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ និងលោក Sonexay Siphandone នាយករដ្ឋមន្ត្រីឡាវផងដែរ។

ក្នុងនាមបក្ស រដ្ឋ និងប្រជាជនវៀតណាម លោក To Lam អគ្គលេខាបក្ស បានសម្តែងនូវក្តីទុក្ខសោកចំពោះមរណភាពរបស់លោក Khamtay Siphandone និងសូមចូលរួមរំលែកទុក្ខយ៉ាងក្រៀមក្រំបំផុតចំពោះថ្នាក់ដឹកនាំជាន់ខ្ពស់ឡាវ ប្រជាជនឡាវទាំងអស់ និងក្រុមគ្រួសារលោក Khamtay Siphandone។ លោក To Lam អគ្គលេខាបក្ស បានសង្កត់ធ្ងន់ថា លោក Khamtay Siphandone មិនត្រឹមតែជាមេដឹកនាំឆ្នើមជំនាន់ដំបូងៗក្នុងការកសាងឡើងចលនាបដិវត្តន៍ឡាវ ដឹកនាំបដិវត្តន៍ប្រជាធិបតេយ្យជាតិកាលពីមុន និងបុព្វហេតុការពារ និងអភិវឌ្ឍន៍ប្រទេសជាតិក្រោយមក និងជាមេដឹកនាំត្រួសត្រាយផ្លូវក្នុងការអនុវត្តគោលនយោបាយផ្លាស់ថ្មីគ្រប់ជ្រុងជ្រោយរបស់បក្សបដិវត្តន៍ឡាវប៉ុណ្ណោះទេ ថែមទាំងលោកជាមិត្តភក្តិដ៏ល្អ ស្មោះស ជាសមមិត្តដ៏ជិតស្និទ្ធរបស់វៀតណាម រហូតក្នុងការតស៊ូដើម្បីការពារមាតុភូមិ និងកសាងប្រទេសរបស់ប្រទេសជាតិទាំងពីរ។ មរណភាពរបស់លោកគឺជាការបាត់បង់ដ៏ធំធេងចំពោះបក្ស រដ្ឋ និងប្រជាជនឡាវ និងវៀតណាម។

លោក To Lam អគ្គលេខាបក្ស ដឹកនាំគណៈប្រតិភូថ្នាក់ដឹកនាំជាន់ខ្ពស់នៃបក្ស និងរដ្ឋវៀតណាមអញ្ជើញចូលរួមពិធីគោរពវិញ្ញាណក្ខន្ធលោក Khamtay Siphandone

លោក To Lam អគ្គលេខាបក្ស បានសង្កត់ធ្ងន់ថា ដើម្បីផ្តល់កិត្តិយស និងកត់សម្គាល់ចំពោះការរួមចំណែកដ៏ធំធេងរបស់លោក Khamtay Siphandone ក្នុងការពង្រឹង និងពង្រីកទំនាក់ទំនងវៀតណាម-ឡាវ ដ៏ជិតស្និទ្ធ យូរអង្វែង បក្ស និងរដ្ឋវៀតណាមបានសម្រេចរៀបចំពិធីកាន់ទុក្ខថ្នាក់ជាតិ។

លោក To Lam អគ្គលេខាបក្ស ជួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ

ថ្នាក់ដឹកនាំជាន់ខ្ពស់ឡាវបានថ្លែងអំណរគុណយ៉ាងស្មោះស្ម័គ្រចំពោះបក្ស រដ្ឋ និងប្រជាជនវៀតណាម ចំពោះការចូលរួមរំលែកទុក្ខចំពោះមរណភាពរបស់លោក Khamtay Siphandone ហើយបានសម្តែងនូវក្តីរំភើបចិត្តចំពោះការដែលលោក To Lam អគ្គលេខាបក្ស បានដឹកនាំគណៈប្រតិភូថ្នាក់ដឹកនាំជាន់ខ្ពស់វៀតណាមទៅចូលរួមពិធីគោរពវិញ្ញាណក្ខន្ធ ហើយថា វៀតណាមបានសម្រេចចិត្តរៀបចំពិធីកាន់ទុក្ខថ្នាក់ជាតិដើម្បីគោរពវិញ្ញាណក្ខន្ធលោក Khamtay Siphandone បង្ហាញពីប្រពៃណីមហាអស្ចារ្យ និងចំណងសាមគ្គីពិសេស ស្មោះស ស្អិតរមួតរវាងប្រទេសទាំងពីរ ក៏ដូចជាទឹកចិត្តផ្ទាល់ខ្លួនរបស់លោក To Lam អគ្គលេខាបក្ស និងថ្នាក់ដឹកនាំវៀតណាម។

លោក To Lam អគ្គលេខាបក្ស ជួបជាមួយលោក Sonexay Siphandone នាយករដ្ឋមន្ត្រីឡាវ

នៅក្នុងជំនួបទាំងនេះ ភាគីទាំងពីរបានវាយតម្លៃខ្ពស់ចំពោះវឌ្ឍនភាពវិជ្ជមានក្នុងទំនាក់ទំនងទ្វេភាគី ព្រមទាំងបានយល់ព្រមផ្លាស់ប្តូរគណៈប្រតិភូជាទៀងទាត់នៅគ្រប់កម្រិត ជាពិសេសថ្នាក់ខ្ពស់។ ភាគីទាំងពីរប្តេជ្ញាចិត្តបន្តសម្របសម្រួលការអនុវត្តប្រកបដោយប្រសិទ្ធភាពនូវរាល់កិច្ចព្រមព្រៀងដែលសម្រេចបាន ហើយអះអាងថា វៀតណាម និងឡាវ ចាំបាច់ប្រកៀកស្មាគ្នា គាំទ្រ និងជួយគ្នាទៅវិញទៅមកឱ្យអស់ពីសមត្ថភាព ដើម្បីពង្រឹងទំនាក់ទំនងមិត្តភាពពិសេសរវាងបក្សទាំងពីរ រដ្ឋទាំងពីរ និងប្រជាជនទាំងពីរឱ្យស្ថិតស្ថិរ ស្រស់បំព្រងជានិច្ច៕

បកប្រែដោយ Minh Trung