លោក Rumen Radev ប្រធានាធិបតីប៊ុលហ្គារី ជួបសំណេះសំណាលជាមួយមិត្តភក្តិវៀតណាមដែលធ្លាប់សិក្សា និងធ្វើការនៅប៊ុលហ្គារី

ថ្លែងមតិក្នុងជំនួបនេះ លោកប្រធានាធិបតី Rumen Radev បានអបអរសាទរចំពោះសមិទ្ធិផលដែលប្រទេស និងប្រជាជនវៀតណាមសម្រេចបានក្នុងកិច្ចការផ្លាស់ថ្មី និងអភិវឌ្ឍន៍សេដ្ឋកិច្ចសង្គម។ វៀតណាមជាប្រទេសកម្រមានដែលមានកំណើនសេដ្ឋកិច្ចលឿនបំផុតនៅលើពិភពលោក។ ការអភិវឌ្ឍគួរឲ្យចាប់អារម្មណ៍នោះ គឺអាស្រ័យលើការរួមវិភាគទានរបស់ប្រជាជនវៀតណាម ដោយចំណេះដឹង ជំនាញ និងបទពិសោធន៍ដែលទទួលបានក្នុងអំឡុងពេលធ្វើការ រស់នៅ និងសិក្សានៅប៊ុលហ្គារី។

លោកប្រធានាធិបតី Rumen Radev បំពាក់ផ្លាកសញ្ញាកិត្តិយសពីប្រធានាធិបតីនៃសាធារណរដ្ឋប៊ុលហ្គារី ដល់សមាគមមិត្តភាពវៀតណាម-ប៊ុលហ្គារី

លោកប្រធានាធិបតី Rumen Radev បានមានប្រសាសន៍ថា ដំណើរទស្សនកិច្ចរបស់លោកធ្វើឡើងក្នុងបរិបទដែលប្រទេសទាំងពីរកំពុងឆ្ពោះទៅរកការរំលឹកខួបលើកទី ៧៥ នៃការបង្កើតទំនាក់ទំនងការទូត (ថ្ងៃទី ៨ ខែកុម្ភៈ ឆ្នាំ ១៩៥០ / ថ្ងៃទី៨ ខែកុម្ភៈ ឆ្នាំ ២០២៥) ដោយទំនាក់ទំនងសហប្រតិបត្តិការមានការអភិវឌ្ឍន៍ដោយឥតឈប់ឈរ។ ប្រទេសទាំងពីរមានសក្ដានុពលខ្លាំងសម្រាប់កិច្ចសហប្រតិបត្តិការលើវិស័យមួយចំនួនដែលភាគីទាំងពីរមានការយកចិត្តទុកដាក់ដូចគ្នាដូចជា ពាណិជ្ជកម្ម វិនិយោគ ថាមពល បច្ចេកទេស សេវាកម្មសំណង់ បច្ចេកវិទ្យាព័ត៌មាន ទេសចរណ៍ កសិកម្ម និងឱសថ។ល។

ប្រតិភូទាំងឡាយនៅក្នុងជំនួប

លោកប្រធានាធិបតី Rumen Radev ក៏បានមានប្រសាសន៍ដែរថា ប្រទេសប៊ុលហ្គារី និងវៀតណាមមានប្រពៃណីល្អក្នុងវិស័យអប់រំ និងសម្តែងនូវសេចក្តីរីករាយដែលប្រទេសទាំងពីរនឹងចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើវិស័យអប់រំក្នុងក្របខ័ណ្ឌនៃដំណើរទស្សនកិច្ចនេះ ដើម្បីបន្តអភិវឌ្ឍវិស័យកិច្ចសហប្រតិបត្តិការប្រពៃណីនេះ។

ក្នុងឱកាសនេះ លោកប្រធានាធិបតី Rumen Radev បានបំពាក់ផ្លាកសញ្ញាកិត្តិយសពីប្រធានាធិបតីនៃសាធារណរដ្ឋប៊ុលហ្គារី ដល់សមាគមមិត្តភាពវៀតណាម-ប៊ុលហ្គារី៕

បកប្រែដោយ Huyen Trang