លើកកម្ពស់កិច្ចសហប្រតិបត្តិការប្រកបដោយចីរភាពរវាងសហភាពអឺរ៉ុប និងវៀតណាម

ជាមួយនឹងសារ "កិច្ចសហប្រតិបត្តិការវិនិយោគឆ្ពោះទៅរកអនាគតប្រកបដោយចីរភាព" វេទិកានេះជាស្ពានតភ្ជាប់ដើម្បីសម្រេចបាននូវកិច្ចខិតខំប្រឹងប្រែងដើម្បីពង្រឹងកិច្ចសហប្រតិបត្តិការសេដ្ឋកិច្ច និងវិនិយោគរវាងសហភាពអឺរ៉ុប និងវៀតណាម ក្នុងបរិបទនៃទំនាក់ទំនងទ្វេភាគីដែលត្រូវបានដំឡើងទៅជាភាពជាដៃគូយុទ្ធសាស្ត្រលើគ្រប់ជ្រុងជ្រោយនាពេលថ្មីៗនេះ។

វេទិកាធុរកិច្ច និងវិនិយោគសហភាពអឺរ៉ុប-វៀតណាម - យុទ្ធសាស្ត្រច្រកសកល នឹងប្រព្រឹត្តទៅនៅថ្ងៃទី ២៤ ខែមីនា នៅទីក្រុងហាណូយ (រូបថត៖ baotintuc.vn)

វេទិកានេះត្រូវបានគេរំពឹងថានឹងប្រមូលផ្តុំប្រតិភូ និងអ្នកជំនាញចំនួន ៥០០ នាក់ រួមទាំងតំណាងមកពីសហភាពអឺរ៉ុប បណ្តាស្ថាប័នរបស់រដ្ឋាភិបាលវៀតណាម អង្គភាពអាជីវកម្មឈានមុខគេរបស់អឺរ៉ុប និងវៀតណាម និងស្ថាប័នហិរញ្ញវត្ថុអន្តរជាតិ។ ជាពិសេស ព្រឹត្តិការណ៍នេះនឹងមានការចូលរួមពីលោក Jozef Síkela ឧត្តមស្នងការសហភាពអឺរ៉ុបអំពីភាពជាដៃគូអន្តរជាតិក្នុងក្របខ័ណ្ឌបំពេញទស្សនកិច្ចផ្លូវការនៅប្រទេសវៀតណាម និងលោកស្រី Nicola Beer អនុប្រធានធនាគារវិនិយោគអឺរ៉ុប (EIB)។

កម្មវិធីនេះនឹងរួមមានសម័យប្រជុំពេញអង្គ និងការពិភាក្សាស៊ីជម្រៅ ដោយបង្កើតបណ្តាញទំនាក់ទំនងសម្រាប់អ្នកតាក់តែងគោលនយោបាយ ថ្នាក់ដឹកនាំសហគ្រាស និងអ្នកជំនាញ។ នេះគឺជាឱកាសមួយសម្រាប់គ្រប់ភាគីទាំងអស់ស្វែងយល់ពីឱកាសវិនិយោគ និងទទួលបានព័ត៌មានថ្មីៗអំពីគោលនយោបាយថ្មីៗ។

ការពិភាក្សានឹងផ្តោតលើវិស័យសំខាន់ៗដែលដើរតួជា "កម្លាំងចលករ" សម្រាប់ការអភិវឌ្ឍប្រកបដោយចីរភាពរបស់វៀតណាម រួមមាន៖ ការដឹកជញ្ជូនប្រកបដោយចីរភាព ការធ្វើបរិវត្តកម្មថាមពល ការតភ្ជាប់ហេដ្ឋារចនាសម្ព័ន្ធ ការធ្វើបរិវត្តកម្មបៃតង និងឌីជីថល និងស្តង់ដារបរិស្ថាន សង្គម និងអភិបាលកិច្ចសហគ្រាស (ESG) ក្នុងប្រតិបត្តិការវិនិយោគ និងធ្វើអាជីវកម្ម។

ដោយចែករំលែកអំពីព្រឹត្តិការណ៍នេះ លោក Julien Guerrier ឯកអគ្គរដ្ឋទូតសហភាពអឺរ៉ុបប្រចាំប្រទេសវៀតណាម បានបញ្ជាក់ថា "យុទ្ធសាស្ត្រច្រកសកលគឺជាសក្ខីភាពនៃការប្តេជ្ញាចិត្តរបស់សហភាពអឺរ៉ុបក្នុងការកសាងទំនាក់ទំនងភាពជាដៃគូប្រកបដោយចីរភាពទូទាំងពិភពលោក។ នៅប្រទេសវៀតណាម យើងផ្តល់អាទិភាពដល់ការគាំទ្រការធ្វើបរិវត្តកម្មបៃតង ការធ្វើបរិវត្តកម្មឌីជីថល ការលើកកម្ពស់ការតភ្ជាប់ និងនវានុវត្តន៍។ ការរួមបញ្ចូលគ្នានេះមិនត្រឹមតែនាំមកនូវផលប្រយោជន៍សេដ្ឋកិច្ចទ្វេភាគីប៉ុណ្ណោះទេ ថែមទាំងរួមចំណែកដល់គោលដៅនៃកំណើនប្រកបដោយចីរភាពក្នុងរយៈពេលវែងផងដែរ"៕

បកប្រែដោយ Duy Hoan