ជំរុញទំនាក់ទំនងវៀតណាម-សហរដ្ឋអាមេរិក ឱ្យកាន់តែអភិវឌ្ឍប្រកបដោយស្ថិរភាព និងជាក់ស្តែង

នៅក្នុងពិធីនេះ លោកអគ្គលេខាបក្ស ប្រធានរដ្ឋ To Lam បានពិនិត្យឡើងវិញនូវប្រវត្តិនៃទំនាក់ទំនងវៀតណាម-សហរដ្ឋអាមេរិក ហើយចាត់ទុកថា នេះគឺជាគំរូក្នុងទំនាក់ទំនងអន្តរជាតិនៃការផ្សះផ្សារ និងកសាងទំនាក់ទំនងក្រោយសង្គ្រាមឡើងវិញ។ លោកអគ្គលេខាបក្ស ប្រធានរដ្ឋ To Lam បានមានប្រសាសន៍ថា៖ “កាលពី ៣០ ឆ្នាំមុន ប្រហែលជាមនុស្សដែលមានសុទិដ្ឋិនិយមបំផុត ក៏មិនអាចនឹកស្មានថា វៀតណាមនិងសហរដ្ឋអាមេរិកអាចជំនះពុះពារលើការឈឺចាប់នៃសង្គ្រាម ដើម្បីកសាងនិងអភិវឌ្ឍទំនាក់ទំនងដ៏រឹងមាំ និងវិជ្ជមានដូចបច្ចុប្បន្ននេះឡើយ។ យើងបានឃើញការរីកចម្រើនដ៏ខ្លាំងក្លាដែលមិនធ្លាប់មានពីមុនមក គេប្តូរអតីតសត្រូវមកជាមិត្ត បន្ទាប់មកជាដៃគូគ្រប់ជ្រុងជ្រោយក្នុងឆ្នាំ ២០១៣។ បន្ទាប់ពីរយៈពេល ១០ ឆ្នាំនៃការអនុវត្តភាពជាដៃគូគ្រប់ជ្រុងជ្រោយ ប្រទេសទាំងពីរសម្រេចបាននូវវឌ្ឍនភាពសំខាន់ៗជាច្រើនក្នុងការបង្កើនការយល់ដឹងគ្នាទៅវិញទៅមក កសាងទំនុកចិត្ត និងជំរុញកិច្ចសហប្រតិបត្តិការលើគ្រប់វិស័យ”។

លោកអគ្គលេខាបក្ស ប្រធានរដ្ឋ To Lam និងលោកជំទាវ រួមជាមួយប្រតិភូនានា ចូលរួមពិធីរំលឹកខួបមួយឆ្នាំ នៃការដំឡើងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ វៀតណាម-សហរដ្ឋអាមេរិក (រូបថត៖ vnanet.vn)

ឆ្ពោះទៅរកការរំលឹកខួបលើកទី ៣០ នៃការបង្កើតទំនាក់ទំនងការទូត វៀតណាម-សហរដ្ឋអាមេរិក (១៩៩៥-២០២៥) នៅឆ្នាំ២០២៥ លោកអគ្គលេខាបក្ស ប្រធានរដ្ឋ To Lam បានស្នើឲ្យភាគីទាំងពីរបន្តពង្រឹងការសម្របសម្រួលយ៉ាងជិតស្និទ្ធ ដើម្បីអនុវត្តសេចក្តីថ្លែងការណ៍រួម វៀតណាម-សហរដ្ឋអាមេរិក កាលពីឆ្នាំមុន ប្រកបដោយប្រសិទ្ធភាព។ លោកអគ្គលេខាបក្ស ប្រធានរដ្ឋ To Lam បានសង្កត់ធ្ងន់ថា កិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ គឺជាវិស័យសំខាន់ និងកម្លាំងចលករនៃទំនាក់ទំនងរបស់ប្រទេសទាំងពីរ ហើយទន្ទឹមនឹងនោះ លោកបានសម្តែងនូវគោលបំណងចង់ជំរុញកិច្ចសហប្រតិបត្តិការវិទ្យាសាស្ត្រ-បច្ចេកវិទ្យា ដែលជាវិស័យឈានមុខគេរបស់ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ ឡើងកម្រិតកម្ពស់ថ្មីមួយ។

ថ្លែងក្នុងព្រឹត្តិការណ៍នេះ លោក John Kerry អតីតរដ្ឋមន្ត្រីការបរទេសសហរដ្ឋអាមេរិក បានសង្កត់ធ្ងន់ថា អាស្រ័យដោយកិច្ចខិតខំប្រឹងប្រែងរបស់ថ្នាក់ដឹកនាំ និងប្រជាជននៃភាគីទាំងពីរ នាពេលបច្ចុប្បន្ននេះ វៀតណាម និងសហរដ្ឋអាមេរិកមិនត្រឹមតែរកឃើញរូបមន្តដើម្បីលើកកម្ពស់ការផ្សះផ្សារប៉ុណ្ណោះទេ ថែមទាំងរួមគ្នាបង្កើតឱកាសដែលមនុស្សជំនាន់មុននឹកស្មានមិនដល់សម្រាប់យុវជនជំនាន់ក្រោយនៃប្រទេសទាំងពីរ។ ទន្ទឹមនឹងនោះ ព្រឹទ្ធសមាជិក Dan Sullivan បានអះអាងថា ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-សហរដ្ឋអាមេរិក ទទួលបានការគាំទ្ររបស់គណបក្សនយោបាយចំនួនពីរនៅសហរដ្ឋអាមេរិក ដោយមានសក្ដានុពលអភិវឌ្ឍន៍យ៉ាងធំធេង និងការរួមចំណែកជាវិជ្ជមានដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងនៅលើពិភពលោក។

នាព្រឹកថ្ងៃទី២៣ ខែកញ្ញា (តាមម៉ោងក្នុងតំបន់) លោកអគ្គលេខាបក្ស ប្រធានរដ្ឋ To Lam បានទៅទស្សនា និងថ្លែងសុន្ទរកថានៅសាកលវិទ្យាល័យ Columbia។

លោកអគ្គលេខាបក្ស ប្រធានរដ្ឋ To Lam ថ្លែងសុន្ទរកថានៅសាកលវិទ្យាល័យ Columbia

ក្នុងបរិបទនៃស្ថានការណ៍ពិភពលោកប្រែប្រួលយ៉ាងឆាប់រហ័ស លោកអគ្គលេខាបក្ស ប្រធានរដ្ឋ To Lam បានអះអាងថា ក្រោមការដឹកនាំរបស់បក្សកុម្មុយនិស្ត វៀតណាមប្រកាន់ខ្ជាប់នូវគោលនយោបាយការបរទេសឯករាជ្យ ម្ចាស់ការ ការធ្វើពហុភាវូបនីយកម្ម និងពិពិធកម្ម ជាមិត្ត និងដៃគូដែលអាចទុកចិត្តបាន និងជាសមាជិកយ៉ាងសកម្ម និងមានការទទួលខុសត្រូវនៃសហគមន៍អន្តរជាតិ។

ស្តីពីទំនាក់ទំនង វៀតណាម-សហរដ្ឋអាមេរិក លោកអគ្គលេខាបក្ស ប្រធានរដ្ឋ To Lam បានអះអាងថា ដើម្បីឲ្យទំនាក់ទំនងរវាងប្រទេសទាំងពីរឈានចូលទំព័រថ្មី និងអភិវឌ្ឍយ៉ាងល្អដូចសព្វថ្ងៃនេះ កត្តាសំខាន់បំផុតគឺប្រពៃណីនៃមនុស្សធម៌ និងសេចក្តីត្រាប្រណីរបស់ប្រជាជនវៀតណាម គឺជាការដឹកនាំដ៏ប៉ិនប្រសប់របស់បក្សកុម្មុយនិស្តវៀតណាម ជាមួយនឹងចក្ខុវិស័យ បញ្ញា ការប្ដេជ្ញាចិត្ត និងសេចក្តីក្លាហាន ដើម្បីនាំប្រទេសវៀតណាមធ្វើសមាហរណកម្មទៅក្នុងលំហូរអន្តរជាតិ។ ក្រៅពីនោះ យើងត្រូវតែលើកឡើងអំពីមិត្តភ័ក្តិ និងដៃគូអាមេរិកជាច្រើន ជាពិសេសការគាំទ្រយ៉ាងខ្លាំងនៃគណបក្សនយោបាយចំនួនពីរនៅសហរដ្ឋអាមេរិកសម្រាប់ទំនាក់ទំនងវៀតណាម-សហរដ្ឋអាមេរិក។

ដោយសង្កត់ធ្ងន់លើបាវចនារបស់វៀតណាម នោះគឺទុកអតីតកាលនៅមួយឡែក ឆ្ពោះទៅរកអនាគត លោកអគ្គលេខាបក្ស ប្រធានរដ្ឋ To Lam បានសង្ឃឹមថា ជាមួយនឹងវិធីសាស្រ្តដែលលើកតម្កើងសាមគ្គីភាពអន្តរជាតិ ឆ្ពោះទៅអនាគត ក៏ដូចជាជោគជ័យនៃទំនាក់ទំនងវៀតណាម-សហរដ្ឋអាមេរិក ពិភពលោកនឹងប្រែក្លាយភាពមិនអាចទៅរួចទៅជាអាចធ្វើទៅបាន បន្តកសាងអរិយធម៌រីកចម្រើនប្រកបដោយនិរន្តរភាពសម្រាប់មនុស្សជាតិទាំងអស់។ល។

* នាព្រឹកថ្ងៃទី២៣ ខែកញ្ញាដដែល តាមម៉ោងក្នុងស្រុក លោកអគ្គលេខាបក្ស ប្រធានរដ្ឋ To Lam បានទទួលជួបអ្នកជំនាញ និងអ្នកប្រាជ្ញមួយចំនួនអំពីវៀតណាមផងដែរ។

គួរបញ្ជាក់ថា នាថ្ងៃទី ២២ ខែកញ្ញា លោកអគ្គលេខាបក្ស ប្រធានរដ្ឋ To Lam បានចូលរួមកិច្ចពិភាក្សាក្រោមប្រធានបទ “ពង្រឹងកិច្ចសហប្រតិបត្តិការ វៀតណាម-សហរដ្ឋអាមេរិក ក្នុងការអភិវឌ្ឍឧស្សាហកម្ម semiconductor និងបញ្ញាសិប្បនិម្មិត”; ទទួលជួប និងពិភាក្សាជាមួយថ្នាក់ដឹកនាំបក្សកុម្មុយនិស្ត អង្គការឆ្វេងនិយម និងមិត្តភក្តិសហរដ្ឋអាមេរិកនៅទីក្រុងញូវយ៉ក ព្រមទាំងទទួលជួបលោក Brendan Nelson ប្រធានសាជីវកម្ម Boeing សកល៕

បកប្រែដោយ Huyen Trang