លោក To Lam អគ្គលេខាបក្ស និងជាប្រធានរដ្ឋវៀតណាមចុះត្រួតពិនិត្យការងារបង្ការ និងគ្រប់គ្រងទឹកជំនន់នៅខេត្ត Tuyen Quang និងខេត្ដ Phu Tho

នៅតាមមូលដ្ឋាន ក្នុងនាមថ្នាក់ដឹកនាំបក្ស និងរដ្ឋ អគ្គលេខាបក្ស និងជាប្រធានរដ្ឋ To Lam បានផ្ញើសាររំលែកទុក្ខយ៉ាងក្រៀមក្រំចំពោះគ្រួសារដែលមានសាច់ញាតិបាត់ខ្លួនដោយសារខ្យល់ព្យុះ និងទឹកជំនន់។ លោក To Lam បានបញ្ជាក់ថា ក្នុងប៉ុន្មានថ្ងៃថ្មីៗនេះ បក្ស រដ្ឋ គណៈកម្មាធិការបក្ស អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ និងប្រជាជនទូទាំងប្រទេស បានអនុវត្តយ៉ាងខ្លាំងក្លា និងស៊ីសង្វាក់គ្នានូវរាល់ដំណោះស្រាយជាច្រើន ដើម្បីកាត់បន្ថយការខូចខាតដែលបណ្តាលមកពីព្យុះ និងទឹកជំនន់ គ្រោះធម្មជាតិ។ លោក To Lam បានកោតសរសើរ និងវាយតម្លៃខ្ពស់ចំពោះលទ្ធផលល្អៗក្នុងការដឹកនាំ ណែនាំ តម្រង់ទិស និងអនុវត្តវិធានការបង្ការ ទប់ទល់ និងជំនះពុះពារលើផលវិបាកដោយព្យុះលេខ ៣ របស់បក្ស រដ្ឋាភិបាល ប្រជាជន និងកងកម្លាំងប្រដាប់អាវុធខេត្ត Phu Tho...

លោក To Lam អគ្គលេខាបក្ស និងជាប្រធានរដ្ឋ ចុះត្រួតពិនិត្យទីតាំងងាយកើតមានគ្រោះបាក់ច្រាំងទន្លេ Lo ឃុំ Truong Sinh ស្រុក Son Duong ខេត្ត Tuyen Quang

ទាក់ទិននឹងទិសដៅនាពេលខាងមុខ ដោយយល់ស្របជាមួយទិសដៅដែលបានលើកឡើងដោយគណៈកម្មាធិការបក្សខេត្ត Tuyen Quang និងខេត្ដ Phu Tho លោក To Lam បានសង្កត់ធ្ងន់ថា មិនត្រឹមតែខេត្ដ Tuyen Quang និងខេត្ដ Phu Tho ប៉ុណ្ណោះទេ ថែមទាំងខេត្តភាគខាងជើងទាំងអស់ដែលរងផលប៉ះពាល់ដោយព្យុះត្រូវកំណត់ថា "ការជួយសង្គ្រោះប្រជាជនគឺជាអាទិភាពខ្ពស់បំផុត" "កងកម្លាំងប្រដាប់អាវុធគឺជាកម្លាំងស្នូល" ដើម្បីធ្វើសមកាលកម្ម និងដាក់ពង្រាយវិធានការទាំងអស់ចាប់ពីការការពាររហូតដល់ការសង្គ្រោះគ្រោះមហន្តរាយ។

លោក To Lam អគ្គលេខាបក្ស និងជាប្រធានរដ្ឋ លើកទឹកចិត្ត និងជូនអំណោយដល់កងកម្លាំងដែលកំពុងបំពេញភារកិច្ចនៅតំបន់ទឹកជន់លិចនៅតាមច្រាំងទន្លេ Lo ឃុំ Truong Sinh ស្រុក Son Duong ខេត្ត Tuyen Quang

លោកអគ្គលេខាបក្ស និងជាប្រធានរដ្ឋ បានស្នើឱ្យដាក់ពង្រាយកម្លាំង និងវិធានការដើម្បីស្តារឡើងវិញនូវភាពប្រក្រតីនៃជីវភាពសង្គម ផលិតកម្មនិងអាជីវកម្ម។ គណៈកម្មាធិការមជ្ឈិមនៃរណសិរ្សមាតុភូមិវៀតណាម ក្រសួង ស្ថាប័ន និងមូលដ្ឋានបន្តចលនាឱ្យរាល់ស្ថាប័ន អង្គការ អាជីវកម្ម បុគ្គល និងសង្គមទាំងមូល លើកកម្ពស់ប្រពៃណីស្នេហាជាតិ ចេះជួយគ្នាទៅវិញទៅមក និងបរិច្ចាគ ផ្តល់ជំនួយជាសម្ភារៈនិងស្មារតីដល់គ្រួសារ និងប្រជាជនដែលរងទុក្ខលំបាក និងរងផលប៉ះពាល់ដោយគ្រោះមហន្តរាយធម្មជាតិ។

លោក To Lam អគ្គលេខាបក្ស និងជាប្រធានរដ្ឋ បានចុះពិនិត្យការងារធ្វើឱ្យប្រសើរឡើងនូវទីតាំងៗមួយចំនួននៅកន្លែងងាយ​រងគ្រោះបាក់ច្រាំងតាមដងទន្លេ Lo ឃុំ Truong Sinh ស្រុក Son Duong ខេត្ត Tuyen Quang។ លោក To Lam អគ្គលេខាបក្ស និងជាប្រធានរដ្ឋបានលើកទឹកចិត្ត និងផ្តល់អំណោយដល់កងកម្លាំងដែលកំពុងបំពេញកាតព្វកិច្ច ហើយនិងចុះសួរសុខទុក្ខជូនអំណោយដល់ប្រជាជននៅស្រុក Son Duong និងផ្ញើអំណោយជូនខេត្ត Phu Tho៕

បកប្រែដោយ Minh Trung