ទីក្រុងចំនួនបីរបស់វៀតណាមត្រូវបានដាក់បញ្ចូលក្នុងបញ្ជីគោលដៅទេសចរណ៍គួរឲ្យចាប់អារម្មណ៍ជាងគេនៅអាស៊ីអាគ្នេយ៍
កប.អនឡាញ - ទស្សនាវដ្ដី Travel & Leisure ប្រចាំតំបន់អាស៊ីអាគ្នេយ៍ ទើបតែប្រកាសពានរង្វាន់ Asia's Best Awards 2022 ក្នុងបំណងផ្តល់យោបល់អំពីគោលដៅ រមណីយដ្ឋាន ភោជនីយដ្ឋាន... ក្នុងតំបន់។
បញ្ជីនេះត្រូវបានបោះឆ្នោតពីអ្នកអានជុំវិញពិភពលោកចាប់ពីខែមករា ដល់ខែមេសា ឆ្នាំនេះ។ ទីក្រុង Da Nang ទីក្រុងហាណូយ និងទីក្រុងហូជីមិញ គឺជាគោលដៅទេសចរណ៍ចំនួនបីរបស់ប្រទេសវៀតណាម ដែលបានទទួលពានរង្វាន់ Asia's Best Awards 2022 នៃទស្សនាវដ្ដី Travel & Leisure។
|
|
ទីក្រុងហាណូយជាគោលដៅពេញនិយមនៅអាស៊ីអាគ្នេយ៍សម្រាប់ភ្ញៀវទេសចរអន្តរជាតិ (រូបថត៖ Unsplash) |
ក្នុងបញ្ជីគោលដៅឈានមុខទាំង១០ ទីក្រុង Da Nang ជាប់ចំណាត់ថ្នាក់លេខ៣ ទីក្រុងហាណូយជាប់ចំណាត់ថ្នាក់លេខ៥ និងទីក្រុងហូជីមិញជាប់ចំណាត់ថ្នាក់លេខ៨។ ទីក្រុងបាងកក រាជធានីថៃ ជាប់ចំណាត់ថ្នាក់លេខ១។ ទស្សនាវដ្ដី Travel & Leisure បានវាយតម្លៃថា "វៀតណាមកាន់តែអភិវឌ្ឍពីមួយថ្ងៃទៅមួយថ្ងៃ។ ឥឡូវនេះ ភ្ញៀវទេសចរបរទេសមិនចាំបាច់ធ្វើចត្តាឡីសក្ត័ និងធ្វើតេស្តរក COVID-19 ទេ"។
Travel & Leisure គឺជាទស្សនាវដ្តីទេសចរណ៍ឈានមុខគេរបស់ពិភពលោក ដែលមានទីស្នាក់ការនៅទីក្រុងញូវយ៉ក (សហរដ្ឋអាមេរិក) និងមានអ្នកអានច្រើនជាង ១៦ លាននាក់ក្នុងមួយខែ៕
បកប្រែដោយ Thuy Anh