សៀវភៅជាង ១,២០០ ក្បាលរបស់វៀតណាមត្រូវបានតាំងបង្ហាញនៅឯពិព័រណ៍សៀវភៅ Frankfurt ឆ្នាំ២០២៥

ក្នុងពិព័រណ៍នេះ លោក Phan Tam អនុរដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម បានចាត់ទុកថា ពិព័រណ៍សៀវភៅ Frankfurt គឺជានិមិត្តរូបនៃភាពច្នៃប្រឌិត កិច្ចសន្ទនា និងកិច្ចសហប្រតិបត្តិការវប្បធម៌។ ទន្ទឹមនឹងនោះ លោក Phan Tam បានសម្តែងនូវក្តីប្រាថ្នាចង់ផ្សព្វផ្សាយសៀវភៅវៀតណាមជូនដល់អ្នកអាននៅលើទូទាំងពិភពលោក។

ប្រតិភូជាតិ និងអន្តរជាតិទៅទស្សនាពិព័រណ៍តាំងបង្ហាញសៀវភៅរបស់វៀតណាមនៅឯពិព័រណ៍សៀវភៅ Frankfurt 2025

លោក Phan Tam បានឲ្យដឹងថា ឆ្នាំនេះ គ្រឹះស្ថានបោះពុម្ព និងអង្គការវប្បធម៌វៀតណាមជាង ២០ បានចូលរួមពិព័រណ៍សៀវភៅ ដោយតាំងបង្ហាញសៀវភៅជាង ១,២០០ ក្បាលលើវិស័យជាច្រើន តាំងពីអក្សរសិល៍្ប ប្រវត្តិសាស្ត្រ វប្បធម៌ កុមារ រហូតដល់វិទ្យាសាស្ត្រ និងការបោះពុម្ពឌីជីថល។

តាមរយៈពិព័រណ៍សៀវភៅ Frankfurt វៀតណាមសង្ឃឹមថានឹងជំរុញកិច្ចសហប្រតិបត្តិការលើការបោះពុម្ព ការបកប្រែ ពង្រីកការវិនិយោគលើការបោះពុម្ពឌីជីថល សៀវភៅអេឡិចត្រូនិក សៀវភៅជាសំឡេង... ដើម្បីឲ្យផ្សព្វផ្សាយអំពីវៀតណាមដល់អ្នកអាននៅគ្រប់ទីកន្លែង ក្នុងបំណងជួយវៀតណាមក្លាយជាដៃគូច្នៃប្រឌិត ស្វាហាប់ និងគួរឲ្យទុកចិត្តក្នុងសហគមន៍បោះពុម្ពសកល៕

បកប្រែដោយ Thuy Anh