បណ្តុះអក្សរ បង្ហោះសុបិន្តសម្រាប់ជនជាតិ Pa Co

ដើម្បីជួយឱ្យបងប្អូនជនជាតិចេះអក្សរ និងលើកកម្ពស់ការយល់ដឹង ចាប់ពីដើមឆ្នាំ ២០២៣ មក ប៉ុស្តិ៍ការពារព្រំដែន Thanh បានសម្របសម្រួលជាមួយសមាគមសម្ព័ន្ធនារី និងសាលារៀនក្នុងឃុំព្រំដែនទាំងបីគឺ Thanh, Xy, និង Lia ដើម្បីបើកថ្នាក់លុបបំបាត់អនក្ខរកម្មជាច្រើន។ អ្នកចូលរួមក្នុងថ្នាក់ភាគច្រើនជាស្ត្រីជនជាតិភាគតិច Pa Co វ័យពី ២០ ទៅ ៥០ ឆ្នាំ - ដោយសារតែជួបការលំបាកនិងទំនៀមទម្លាប់ហួសសម័យ មិនអាចកាន់ប៊ិចឬទៅសាលារៀនបានទេ។

មកទល់បច្ចុប្បន្ននេះ ថ្នាក់បង្រៀនផ្ទាល់ដោយកម្មាភិបាលប៉ុស្តិ៍ការពារព្រំដែន Thanh ក្នុងឃុំ Thanh, Xy, និង Lia មានសិក្ខាកាមចូលរួមជិត១០០ នាក់។

ថ្នាក់លប់បំបាត់អនក្ខរកម្មមួយដែលរៀបចំដោយប៉ុស្តិ៍ការពារព្រំដែន Thanh នៅសាលាបឋមសិក្សា និងអនុវិទ្យាល័យ A Xing ឃុំ Lia (ស្រុក Huong Hoa ខេត្ត Quang Tri) នៅខែតុលា ឆ្នាំ ២០២៤

យោងតាមលោកវរសេនីយ៍ត្រី Nguyen Van Chinh អ្នកនយោបាយនៃប៉ុស្តិ៍ការពារព្រំដែន Thanh ដំបូងឡើយ នៅពេលដែលត្រូវបានលើកទឹកចិត្តឱ្យចូលរៀនមនុស្សជាច្រើននៅតែមានភាពរអែង។ ពួកគេខ្លាចកាន់ប៊ិច ខ្លាចមិនអាចរៀនបាន។ ប៉ុន្តែដោយមានក្តីអំណាត់ព្យាយាម និងការយកចិត្តទុកដាក់ពីកម្មាភិបាលនៃកងទ័ពការពារព្រំដែន និងគ្រូបង្រៀននៃសាលានានា បានដាស់តឿនទំនុកចិត្ត និងការប្តេជ្ញាចិត្តរបស់ប្រជាជនបន្តិចម្តងៗ។ ស្ត្រីដែលមិនចេះអក្សរ ហើយពីមុនគ្រាន់តែធ្វើស្រែចំការប៉ុណ្ណោះ តាមរយៈវគ្គសិក្សាឥឡូវនេះ បានចេះអាន ចេះសរសេរ បង្កើនការយល់ដឹងពីសង្គមបន្តិចម្តងៗ។ល។

កម្មាភិបាល និងយុទ្ធជននៃកងទ័ពការពារព្រំដែនមិនត្រឹមតែបង្រៀនអក្សរប៉ុណ្ណោះទេ ថែមទាំងរួមបញ្ចូលការបង្រៀន និងផ្សព្វផ្សាយអំពីប្រពៃណីប្រវត្តិសាស្ត្ររបស់ជនជាតិ និងមូលដ្ឋាន និងចំណេះដឹងផ្នែកច្បាប់ដែលមានប្រយោជន៍ និងជាក់ស្តែង ដោយហេតុនោះជួយឱ្យបងប្អូនជនជាតិកាន់តែមានមោទនភាពចំពោះមាតុភូមិ និងប្រទេសជាតិ ពង្រឹងសាមគ្គីភាព មនោសញ្ចេតនា និងបង្កើនការទទួលខុសត្រូវចំពោះសហគមន៍។

ថ្វីត្បិតតែឆ្នាំនេះមានអាយុជាង ៤០ ឆ្នាំក៏ដោយ ក៏អ្នកស្រី Ho Thi Bay នៅភូមិ A Ho ឃុំ Thanh នៅតែចង់រៀន។ អ្នកស្រី Bay បានចែករំលែកថា៖ «អាស្រ័យដោយមានក្តីស្រឡាញ់ជក់ចិត្តរបស់លោកគ្រូ អ្នកគ្រូ និងកម្មាភិបាលនៃប៉ុស្តិ៍ការពារព្រំដែន Thanh ដែលបានជួយយើងខ្ញុំរៀនបានអក្សរ។ ខ្ញុំនឹងខិតខំសិក្សា។ ការចេះអក្សរនឹងផ្តល់ឱកាសឱ្យទទួលបានចំណេះដឹងជាច្រើន ដើម្បីជួយគ្រួសារអភិវឌ្ឍសេដ្ឋកិច្ច និងធ្វើជាគំរូដល់កូន ចៅឱ្យធ្វើតាម»។

ទន្ទឹមនឹងនោះ ប៉ុស្តិ៍ការពារព្រំដែន Thanh ក៏បានអនុវត្តប្រកបដោយប្រសិទ្ធភាពនូវកម្មវិធីឧបត្ថម្ភអប់រំផ្សេងៗទៀតដូចជា៖ “ជួយឧបត្ថម្ភកុមារទៅសាលារៀន”  ទម្រង់ “កូនធម៌នៃកងទ័ពការពារព្រំដែន”  ...  បរិចាគប្រាក់បៀវត្សរ៍ដើម្បីជួយឧបត្ថម្ភថ្លៃសិក្សា ទិញសៀវភៅ កង់... ជួយសិស្សបន្តដំណើរសិក្សារបស់ពួកគេ។ លោកវរសេនីយ៍ឯក Ho Phu Vinh អនុប្រធាននយោបាយនៃកងទ័ពការព្រំដែនខេត្ត Quang Tri បានឲ្យដឹងថា៖ “ការអប់រំគឺជាមធ្យោបាយប្រកបដោយនិរន្តរភាពបំផុតដើម្បីផ្លាស់ប្តូរជីវភាពរស់នៅរបស់ប្រជាជននៅតំបន់ព្រំដែន។ នៅពេលដែលប្រជាជនចេះអក្សរ និងមានចំណេះដឹង ពួកគេនឹងមានភាពជឿជាក់ និងខិតខំប្រឹងប្រែងបន្ថែមទៀតក្នុងការអភិវឌ្ឍន៍សេដ្ឋកិច្ច និងកសាងស្រុកកំណើតរបស់ពួកគេ។ ដូច្នេះ ក្នុងរយៈពេល ៥ ឆ្នាំកន្លងទៅ កងកម្លាំងការពារព្រំដែនខេត្ត Quang Tri បានបើកថ្នាក់លុបបំបាត់អនក្ខរកម្នចំនួន ៩ ដល់សិក្ខាកាមជិត ៣០០ នាក់; លើកទឹកចិត្តសិស្សដែលចោលរៀនជិត ៧០០ នាក់ឱ្យត្រឡប់ទៅសាលាវិញ…”។

ថ្នាក់រៀនរៀបចំដោយប៉ុស្តិ៍ការពារព្រំដែន Thanh សហការជាមួយអាជ្ញាធរមូលដ្ឋាន និងសាលារៀនដើម្បីលុបបំបាត់អនក្ខរកម្ននៅតំបន់ព្រំដែននៃស្រុក Huong Hoa មិនត្រឹមតែរួមចំណែកផ្លាស់ប្តូរជីវភាពរស់នៅរបស់ជនជាតិ Pa Co នៅទីនេះប៉ុណ្ណោះទេ ថែមទាំងរីកសាយភាយស្មារតីសង្វាតរៀន និងឆន្ទៈក្នុងការខិតខំសម្រាប់សហគមន៍ទាំងមូលទៀតផង។  នេះក៏ជារបៀបដែលកងទ័ពការពារព្រំដែនកសាងប្រៀបប្រយុទ្ធដោយមានការគាំទ្រពីប្រជាជនរួមចំណែកការពារយ៉ាងរឹងមាំនូវអធិបតេយ្យភាពព្រំដែននៃមាតុភូមិ៕

បកប្រែដោយ Huyen Trang