នាយករដ្ឋមន្ត្រីវៀតណាម៖ បន្តអនុវត្តប្រកបដោយប្រសិទ្ធភាពនូវការផ្លាស់ថ្មីក្នុងវិស័យអប់រំ និងបណ្តុះបណ្តាល

សន្និសីទនេះត្រូវបានរៀបចំឡើងក្នុងទម្រង់ផ្ទាល់នៅទីក្រុងហាណូយ និងតាមប្រព័ន្ធអុីនធឺណែត នៅទីក្រុងខេត្ដទាំង ៦៣ ដោយមានការចូលរួមពីថ្នាក់ដឹកនាំបក្ស និងរដ្ឋ រួមទាំងតំណាងក្រសួង ស្ថាប័នមជ្ឈិម អ្នកជំនាញ គ្រូបង្រៀន និងតំណាងគ្រឹះស្ថានអប់រំផងដែរ។

លោកនាយករដ្ឋមន្ត្រី Pham Minh Chinh ថ្លែងក្នុងសន្និសីទ (រូបថត៖ vnanet.vn)

ក្រោមប្រធានបទ "សាមគ្គីភាព វិន័យ ភាពច្នៃប្រឌិត ផ្លាស់ថ្មីកាន់តែស៊ីជម្រៅ លើកកំពស់គុណភាពអប់រំ និងបណ្តុះបណ្តាល" ក្នុងឆ្នាំសិក្សា ២០២៣-២០២៤ វិស័យអប់រំ និងបណ្តុះបណ្តាលបានជម្នះការលំបាក និងសម្រេចបានភារកិច្ចដែលបានដាក់ចេញ។

លោកនាយករដ្ឋមន្ត្រីបានកត់សម្គាល់ និងកោតសរសើរចំពោះការចូលរួមនៃប្រព័ន្ធនយោបាយទាំងមូល និងការគាំទ្ររបស់ប្រជាពលរដ្ឋនៅទូទាំងប្រទេស ជាពិសេសការខិតខំប្រឹងប្រែងនៃវិស័យអប់រំ និងបណ្តុះបណ្តាលក្នុងការអនុវត្តសេចក្ដីសម្រេចចិត្ដលេខ 29-NQ/TW ចុះថ្ងៃទី ៤ ខែវិច្ឆិកា ឆ្នាំ ២០២៣ ស្តីពីការផ្លាស់ថ្មីក្នុងវិស័យអប់រំ និងបណ្តុះបណ្តាល​ និងសម្រេចបាននូវលទ្ធផលសំខាន់ៗជាច្រើន។

លោកនាយករដ្ឋមន្ត្រី Pham Minh Chinh អញ្ជើញចូលរួមសន្និសីទបូកសរុបលទ្ធផលឆ្នាំសិក្សា ២០២៣-២០២៤ និងដាក់ទិសដៅសម្រាប់ឆ្នាំសិក្សា ២០២៤-២០២៥ (រូបថត៖ vnanet.vn)

ថ្លែងមតិក្នុងសន្និសីទ លោកនាយករដ្ឋមន្ត្រី Pham Minh Chinh បានស្នើឱ្យវិស័យអប់រំ និងបណ្តុះបណ្តាលរៀបចំ និងអនុវត្តប្រកបដោយប្រសិទ្ធភាពនូវបាវចនា៖ “ប្រកាន់យកសិស្ស និស្សិតជាមជ្ឈភាព; គ្រូបង្រៀនគឺជាកម្លាំងចលករ; សាលាដើរតួនាទីជាជើងទម្រ; គ្រួសារគឺជាទីពឹងបង្អែក; សង្គមជាគ្រឹះស្ថាន”។

លោកនាយករដ្ឋមន្ត្រីបានស្នើឲ្យវិស័យអប់រំ និងបណ្តុះបណ្តាល ក្រសួង ស្ថាប័ន និងមូលដ្ឋាន អនុវត្តការងារសំខាន់ៗ ទន្ទឹមនឹងនេះ ត្រៀមរៀបចំយ៉ាងហ្មត់ចត់សម្រាប់ឆ្នាំសិក្សាថ្មី  និងរៀបចំពិធីបើកបវេសនកាលនៅថ្ងៃទី ៥ ខែកញ្ញា បានល្អ។ ព្រមទាំងផ្តោតលើការរៀបចំ និងអនុវត្តសេចក្តីសន្និដ្ឋានលេខ 91-KL/TW នៃការិយាល័យនយោបាយ ចុះថ្ងៃទី ១២ ខែសីហា ឆ្នាំ ២០២៤ស្តីពីការអនុវត្តការផ្លាស់ថ្មីក្នុងវិស័យអប់រំ និងបណ្តុះបណ្តាល ធានាឲ្យបាននូវប្រសិទ្ធភាពជាក់ស្តែង។ បន្តពិនិត្យ កែសម្រួល និងបំពេញបន្ថែមទាន់ពេលនូវច្បាប់ យន្ដការ និងគោលនយោបាយស្តីពីការផ្លាស់ថ្មីក្នុងវិស័យអប់រំ និងបណ្តុះបណ្តាល លើកកម្ពស់ប្រសិទ្ធភាពក្នុងការគ្រប់គ្រងរបស់រដ្ឋលើវិស័យអប់រំ រួមទាំងការបូកសរុបការងារ និងវាយតម្លៃលើការអនុវត្តការផ្លាស់ថ្មីនៃកម្មវិធីសិក្សា និងសៀវភៅសិក្សា។ល៕

បកប្រែដោយ Pham Diep