លោក Vu Ba No ជួយប្រជាជនចេះអាន និងសរសេរបានយ៉ាងស្ទាត់

បញ្ចប់ការសិក្សាពីមហាវិទ្យាល័យ Son La ជំនាញគរុកោសល្យអក្សរសាស្ត្រក្នុងឆ្នាំ ២០១៧ លោក Vu Ba No តែងតែមានប្រាថ្នាចង់ក្លាយជាគ្រូបង្រៀននៅស្រុកកំណើតរបស់ខ្លួន។ នៅពេលដឹងពីសេចក្តីជូនដំណឹងរបស់គណៈកម្មការគ្រប់គ្រងគម្រោងលេខ ១៧៤ អង្គភាពសេដ្ឋកិច្ច-ការពារជាតិលេខ ៣២៦ ស្តីពីការជ្រើសរើសសមាជិកនៃក្រុមបញ្ញវ័ន្តវ័យក្មេងស្ម័គ្រចិត្ត ឱ្យចុះធ្វើការនៅតំបន់សេដ្ឋកិច្ច-ការពារជាតិ Song Ma នោះ លោក Vu Ba No បានដាក់ពាក្យសុំចូលរួម ហើយត្រូវបានជ្រើសរើស។ នៅដើមឆ្នាំ ២០២២ អង្គភាពសេដ្ឋកិច្ច-ការពារជាតិលេខ ៣២៦ មានគោលនយោបាយសម្របសម្រួលបើកថ្នាក់រៀនដើម្បីលុបបំបាត់អនក្ខរភាពជូនប្រជាជននៅភូមិ Huoi Men ឃុំ Muong Lan ស្រុក Sop Cop ។ ក្នុងនាមជាជនជាតិ Mong ដែលចេះភាសា​ជនជាតិខ្លួនឯងយ៉ាងស្ទាត់នោះ លោក Vu Ba No ត្រូវបានជ្រើសរើសជាគ្រូបង្រៀន។

Vu Ba No (កណ្តាល) ផ្លាស់ប្តូរបទពិសោធន៍ក្នុងការបង្រៀនភាសារ Mong ជាមួយសមាជិកនៃក្រុមបញ្ញវន្តវ័យក្មេងស្ម័គ្រចិត្ត

តាមរយៈការសំណេះសំណាលជាមួយ លោក Vu Ba No យើងយល់អំពីការលំបាករបស់គាត់ក្នុងការបង្រៀនអក្សរជូនប្រជាជននៅ Huoi Men ។ លោក Vu Ba No បាននិយាយថា “Huoi Men គឺជាភូមិដ៏លំបាកពិសេសមួយនៅក្នុងឃុំ Muong Lan។ នៅទីនេះមិនមានបណ្តាញអគ្គិសនីជាតិទេ គ្មានសេវាទូរស័ព្ទ ហើយជារឿយៗមានការខ្វះខាតទឹកប្រើប្រាស់ទៀត។ ថ្នាក់រៀនត្រូវប្រើពន្លឺដោយ​អំពូលអគ្គិសនីពីប្រភពពន្លឺព្រះអាទិត្យ។ តុមួយខ្ពស់ មួយទាប ​សិស្សមកថ្នាក់រៀនពេលខ្លះគ្រប់ ពេលខ្លះខ្វះច្រើន ដោយសារប្រជាជនមកផ្ទះយឺតពីធ្វើការស្រែចំការ មិនទៅរៀន»។ ឆ្លងកាត់ការលំបាកនោះ សេចក្តីរីករាយបំផុតរបស់លោក Vu Ba No ថា បន្ទាប់ពីបង្រៀនជិត ៨ ខែនៅភូមិ Huoi Men មានសិស្សចំនួន ២២ នាក់បានចេះអាន និងសរសេរយ៉ាងស្ទាត់។

លោកវរសេនីយ៍ឯកបំរុង Tran Quoc Viet អនុប្រធានគណៈកម្មការគ្រប់គ្រងគម្រោងលេខ ១៧៤ នៃអង្គភាពសេដ្ឋកិច្ច-ការពារជាតិលេខ៣២៦ បាននិយាយថា “សមាជិក ៣០ នាក់ នៃក្រុមបញ្ញវន្តវ័យក្មេងស្ម័គ្រចិត្ត អង្គភាពសេដ្ឋកិច្ច-ការពារជាតិលេខ ៣២៦ ដែលបានចុះ​ធ្វើ​ការ​នៅ​មូលដ្ឋាន​នាពេលថ្មីៗនេះ គឺជាជនរួម​ជាតិ​នៅក្នុងតំបន់គម្រោង។ ពួកគេចេះភាសា និងយល់ពីទំនៀមទម្លាប់ក្នុងស្រុក។ ក្នុងរយៈពេលកន្លងមក គណៈកម្មការគ្រប់គ្រងគម្រោងលេខ ១៧៤ អង្គភាពសេដ្ឋកិច្ច-ការពារជាតិលេខ ៣២៦ បានសហការ​ការយ៉ាងជិតស្និទ្ធជាមួយមន្ទីរអប់រំ និងបណ្តុះបណ្តាលស្រុក Sop Cop  គណៈកម្មាធិការបក្ស និងអាជ្ញាធរមូលដ្ឋានក្នុងតំបន់គម្រោង បើកថ្នាក់រៀនលុបបំបាត់អនក្ខរកម្ម ព្រមទាំងប្រគល់ភារកិច្ចដល់សមាជិកនៃក្រុមបញ្ញវន្តវ័យក្មេងស្ម័គ្រចិត្ត ដោយមានវិធីសាស្រ្តគរុកោសល្យល្អ និងចេះភាសារបស់ជនរួម​​ជាតិ ឲ្យមក​ធ្វើជាគ្រូបង្រៀង។ តាមរយៈថ្នាក់រៀន អង្គភាពសេដ្ឋកិច្ច-ការពារជាតិលេខ ៣២៦ មានបំណងចង់រួមចំណែកដល់មូលដ្ឋានក្នុងការអប់រំ លើកកម្ពស់បញ្ញារបស់ប្រជាជន ជួយប្រជាជនឱ្យ​ស្រូបយកគំរូ និងគម្រោងនានា​របស់អង្គភាព បានកាន់តែប្រសើរឡើង ឆ្ពោះទៅរកការអភិវឌ្ឍន៍សេដ្ឋកិច្ច ​និង​មានជីវភាពរស់នៅដោយស្ថិរភាព”។

បកប្រែដោយ Duy Hoan