ជំរុញកិច្ចសហប្រតិបត្តិការលើវិស័យបណ្តុះបណ្តាលវិជ្ជាជីវៈរវាងអង់គ្លេស និងវៀតណាម
កប.អនឡាញ - នាថ្ងៃទី ២១ ខែកុម្ភៈ ស្ថានទូតអង់គ្លេសប្រចាំវៀតណាមបានសហការជាមួយក្រសួងការងារ យុទ្ធជនពិការ និងសង្គមកិច្ចវៀតណាម រៀបចំសិក្ខាសាលាស្តីពី “ការជំរុញកិច្ចសហប្រតិបត្តិការលើវិស័យបណ្តុះបណ្តាលវិជ្ជាជីវៈ រវាងវៀតណាម និងចក្រភពអង់គ្លេស” និងពិធីចុះហត្ថលេខាលើអនុស្សារណៈនៃការយោគយល់គ្នារវាងអគ្គនាយកដ្ឋានបណ្តុះបណ្តាលវិជ្ជាជីវៈ និងសមាគមគណនេយ្យករដែលមានសញ្ញាប័ត្រ (ACCA)។
នេះគឺជាសកម្មភាពជាផ្លូវការដំបូងក្នុងបំណងអនុវត្តអនុស្សរណៈនៃការយោគយល់គ្នាលើវិស័យបណ្តុះបណ្តាលវិជ្ជាជីវៈ ឆ្នាំ២០២២ រវាងរដ្ឋាភិបាលទាំងពីរក្នុងឱកាសរំលឹកខួបលើកទី ៥០ នៃការបង្កើតទំនាក់ទំនងការទូតរវាងវៀតណាម និងចក្រភពអង់គ្លេស។
សិក្ខាសាលានេះគឺជាឱកាសសម្រាប់ដៃគូ និងសាលាបណ្តុះបណ្តាលវិជ្ជាជីវៈរបស់អង់គ្លេសចែករំលែកប្រៀបខ្លាំង និងអាទិភាពសម្រាប់កិច្ចសហប្រតិបត្តិការជាមួយវៀតណាម ហើយភាគីទាំងពីរបានឯកភាពលើសកម្មភាព និងអាទិភាពសម្រាប់កិច្ចសហប្រតិបត្តិការនាពេលខាងមុខ។ នាពេលខាងមុខ ភាគីទាំងពីរនឹងផ្តោតលើការគាំទ្រគោលនយោបាយកម្រិតម៉ាក្រូ តាមរយៈការចែករំលែកបទពិសោធន៍ក្នុងវិស័យបណ្តុះបណ្តាលវិជ្ជាជីវៈរបស់អង់គ្លេស ជម្រុញការចូលរួមរបស់សហគ្រាសក្នុងវិស័យបណ្តុះបណ្តាលវិជ្ជាជីវៈ និងពង្រីកបច្ចេកវិទ្យាឌីជីថលក្នុងការបណ្តុះបណ្តាលតាមអ៊ីនធឺណិត អភិវឌ្ឍជំនាញពាក់ព័ន្ធនឹងបដិវត្តន៍ឧស្សាហកម្មទី៤ អភិវឌ្ឍសកម្មភាពធានាគុណភាព និងពិនិត្យ បញ្ជាក់គុណភាពបណ្តុះបណ្តាលវិជ្ជាជីវៈ ជួយគាំទ្រការអភិវឌ្ឍកម្មវិធីបង្រៀនជាភាសាអង់គ្លេស ហើយជំរុញកិច្ចសហប្រតិបត្តិការរវាងសាលាបណ្តុះបណ្តាលវិជ្ជាជីវៈ នៃប្រទេសទាំងពីរ៕
បកប្រែដោយ Thanh Cong