វៀតណាមមានបំណងចង់រួមចំណែកយ៉ាងច្រើនក្នុងកិច្ចខិតខំប្រឹងប្រែងផ្សះផ្សាក្រោយជម្លោះ ហើយត្រៀមខ្លួនជាស្រេចចែករំលែកបទពិសោធន៍ និងលើកកំពស់តួនាទីរបស់វៀតណាមក្នុងការកសាងសន្តិភាពប្រកបដោយចីរភាព។ នេះត្រូវបានបញ្ជាក់ដោយលោកឯកអគ្គរដ្ឋទូត Do Hung Viet ប្រធានស្ថានបេសកកម្មអចិន្ត្រៃយ៍វៀតណាមប្រចាំនៅអង្គការសហប្រជាជាតិ នាថ្ងៃទី៣ កក្កដា នៅពេលចូលជួបសម្តែងការគួរសមជាមួយ លោក Philemon Yang ប្រធានសម័យប្រជុំលើកទី ៧៩ នៃមហាសន្និបាតអង្គការសហប្រជាជាតិ នៅទីស្នាក់ការអង្គការសហប្រជាជាតិ (UN) នៅទីក្រុងញូវយ៉ក សហរដ្ឋអាមេរិក។

leftcenterrightdel
លោកឯកអគ្គរដ្ឋទូត Do Hung Viet (ឆ្វេង) ក្នុងជំនួបជាមួយ លោក Philemon Yang ប្រធានមហាសន្និបាតអង្គការសហប្រជាជាតិលើកទី៧៩  (រូបថត៖ TTXVN)

លោកឯកអគ្គរដ្ឋទូត Do Hung Viet ក៏បានវាយតម្លៃខ្ពស់ចំពោះប្រធានបទ “ឯកភាពក្នុងភាពចម្រុះ” នៃមហាសន្និបាតអង្គការសហប្រជាជាតិ លើកទី៧៩។ ទន្ទឹមនឹងនោះ លោកបានសង្កត់ធ្ងន់ថា ការសន្ទនា និងការគោរពគ្នាទៅវិញទៅមក គឺជាមូលដ្ឋានគ្រឹះសម្រាប់ការថែរក្សាសន្តិភាព និងសន្តិសុខអន្តរជាតិ ក៏ដូចជាការលើកកម្ពស់កិច្ចសហប្រតិបត្តិការសម្រាប់ការអភិវឌ្ឍប្រកបដោយចីរភាព។

លោក Philemon Yang ប្រធានមហាសន្និបាត បានស្វាគមន៍ចំពោះសមិទ្ធិផលរបស់វៀតណាមក្នុងការអភិវឌ្ឍន៍ និងកិច្ចការបរទេស ក៏ដូចជាតួនាទីកាន់តែសំខាន់របស់ខ្លួននៅអង្គការសហប្រជាជាតិ។ ជាពិសេសបានវាយតម្លៃខ្ពស់ចំពោះគោលជំហរ និងការប្តេជ្ញាចិត្តរបស់វៀតណាមចំពោះពហុភាគីនិយម ច្បាប់អន្តរជាតិ និងធម្មនុញ្ញអង្គការសហប្រជាជាតិ។ ប្រធានមហាសន្និបាតបានជូនពរលោកឯកអគ្គរដ្ឋទូត Do Hung Viet មានអាណត្តិការងារប្រកបដោយជោគជ័យ រួមចំណែកបន្តលើកកំពស់រូបភាព និងតួនាទីអន្តរជាតិ របស់វៀតណាម ទន្ទឹមនឹងនោះ រួមចំណែកប្រកបដោយប្រសិទ្ធភាពក្នុងការជំរុញកិច្ចសហប្រតិបត្តិការ និងកិច្ចសន្ទនារវាងរដ្ឋសមាជិកអង្គការសហប្រជាជាតិ។

គួររំលឹកថា ចាប់ពីថ្ងៃទី ៣០ ខែមិថុនា ដល់ថ្ងៃទី ៣ ខែកក្កដា លោកឯកអគ្គរដ្ឋទូត Do Hung Viet បានជួបជាមួយថ្នាក់ដឹកនាំអង្គការសហប្រជាជាតិ បន្ទាប់ពីប្រគល់លិខិតផ្ទេរសិទ្ធិ។ ក្នុងជំនួបទាំងនេះ លោកឯកអគ្គរដ្ឋទូត Do Hung Viet បានអះអាងជាថ្មីនូវការប្តេជ្ញាចិត្តយ៉ាងមុតមាំរបស់វៀតណាមចំពោះរបៀបវារៈរបស់អង្គការសហប្រជាជាតិ ជាពិសេសដំណើរការ និងគំនិតផ្តួចផ្តើមដើម្បីឆ្លើយតបទៅនឹងបញ្ហាប្រឈមសកល។

បកប្រែដោយ Duy Hoan