បណ្តាប្រទេសអាស៊ានពិភាក្សាអំពីដំណោះស្រាយ "ស្តារការរៀនសូត្រ និងកសាងប្រព័ន្ធអប់រំឡើងវិញ"
កប.អនឡាញ - នារសៀលថ្ងៃទី១៦ ខែមីនា បន្ទាប់ពីទទួលតំណែងជាប្រធានបណ្តាញអប់រំអាស៊ានអាណត្តិ ២០២២-២០២៣ ក្រសួងអប់រំ និងបណ្តុះបណ្តាលវៀតណាម សហការជាមួយ Cambridge Partnership for Education និងលេខាធិការដ្ឋានអាស៊ាន បានរៀបចំកិច្ចប្រជុំតាមប្រព័ន្ធវីដេអូ ដើម្បីពិភាក្សាអំពីដំណោះស្រាយ "ស្តារការរៀនសូត្រ និងកសាងប្រព័ន្ធអប់រំឡើងវិញ"។
ថ្លែងនៅក្នុងពិធីបើកកិច្ចប្រជុំ រដ្ឋមន្ត្រីក្រសួងអប់រំ និងបណ្តុះបណ្តាលវៀតណាម លោក Nguyen Kim Son បានសង្កត់ធ្ងន់ថា កិច្ចប្រជុំនេះនឹងជាឱកាសសម្រាប់បណ្តាប្រទេសអាស៊ានផ្លាស់ប្តូរ និងចែករំលែកបទពិសោធន៍អំពីដំណើរការស្តារវិស័យអប់រំឡើងវិញ នៃប្រទេសនីមួយៗ និងសហគមន៍ទាំងមូល។
|
|
រដ្ឋមន្ត្រីក្រសួងអប់រំ និងបណ្តុះបណ្តាលវៀតណាម លោក Nguyen Kim Son ចូលរួមកិច្ចប្រជុំតាមប្រព័ន្ធវីដេអូ (រូបថត៖ vov.vn) |
ទន្ទឹមនឹងនោះ លោកក៏សម្តែងនូវការជឿជាក់ថា ការចែករំលែកនៅក្នុងកិច្ចប្រជុំនេះនឹងរួមចំណែកដ៏មានប្រយោជន៍ដល់បណ្តាប្រទេសក្នុងតំបន់ និងភាគីពាក់ព័ន្ធក្នុងការរៀបចំគោលនយោបាយ និងជំរុញគំនិតផ្តួចផ្តើមនានាដើម្បីជំនះពុះពារ និងកាត់បន្ថយផលប៉ះពាល់នៃជំងឺរាតត្បាត កូវីដ-១៩ លើប្រព័ន្ធអប់រំ។
នៅក្នុងកិច្ចប្រជុំ រដ្ឋមន្ត្រីអប់រំអាស៊ានទាំងឡាយ បានពិភាក្សាអំពីការស្តារការរៀនសូត្រ និងកសាងប្រព័ន្ធអប់រំឡើងវិញ ដោយមានប្រធានបទសំខាន់ៗចំនួនបី៖ កង្វះនៃចំណេះដឹង និងការលើកកម្ពស់ការរៀនសូត្រ ការអភិក្រមការអប់រំ និងការកសាងប្រព័ន្ធអប់រំដោយពឹងផ្អែកលើខ្លួនឯង៕
បកប្រែដោយ Huyen Trang