សហគមន៍វៀតណាមនៅនូវែលសេឡង់លើកតម្កើង និងផ្សព្វផ្សាយអត្តសញ្ញាណវប្បធម៌ជាតិ

ដើម្បីអបអរសាទរខួបលើកទី ៥០ នៃការបង្កើតទំនាក់ទំនងការទូតរវាងវៀតណាម និងនូវែលសេឡង់ ស្ថានទូតវៀតណាមប្រចាំនៅនូវែលសេឡង់បានសម្របសម្រួលជាមួយសមាគមនិស្សិតវៀតណាមនៅទីក្រុង Wellington (VSAW) ដើម្បីរៀបចំព្រឹត្តិការណ៍ទិវាវៀតណាមឆ្នាំ ២០២៥ នៅថ្ងៃទី ១៥ ខែវិច្ឆិកា នៅរដ្ឋធានី។ នៅក្នុងសុន្ទរកថាបើករបស់ លោក Phan Minh Giang ឯកអគ្គរដ្ឋទូតវៀតណាមប្រចាំនៅនូវែលសេឡង់ បានបញ្ជាក់ថា ទិវាវៀតណាមគឺជាឱកាសមួយសម្រាប់សហគមន៍វៀតណាមនៅនូវែលសេឡង់ដើម្បីជួបជុំ និងភ្ជាប់ទំនាក់ទំនង លើកតម្កើង និងផ្សព្វផ្សាយអត្តសញ្ញាណវប្បធម៌វៀតណាម ហើយក្នុងពេលជាមួយគ្នានេះរួមចំណែកដល់ការបង្កើនការយល់ដឹងគ្នាទៅវិញទៅមក និងបើកឱកាសសហប្រតិបត្តិការរវាងប្រទេសទាំងពីរ។

ការសម្តែងមួយនៅក្នុងទិវាវៀតណាមឆ្នាំ២០២៥ នៅរដ្ឋធានី Wellington ប្រទេសនូវែលសេឡង់ (រូបថត៖ ទីភ្នាក់ងារសារព័ត៌មានវៀតណាម)

ទិវាវៀតណាម ឆ្នាំ២០២៥ ក្រោមប្រធានបទ “The Rising Line” រួមមានការសម្តែងប្រពៃណី និងទំនើបជាច្រើន ដែលបានបង្ហាញពីសារនៃប្រទេសវៀតណាមដែលមានសន្តិភាព ឯករាជ្យ ស្វ័យភាព ច្នៃប្រឌិត រីកចម្រើនយ៉ាងឆាប់រហ័ស និងប្រកបដោយចីរភាពនៅក្នុងយុគសម័យថ្មី។ លើសពីនេះ ក៏មានពិធីបិទ និងប្រគល់រង្វាន់នៃការប្រកួត “Quiz Challenge” ដើម្បីស្វែងយល់អំពីទំនាក់ទំនងរយៈពេល ៥០ ឆ្នាំរវាងប្រទេសទាំងពីរ។

ក្នុងក្របខ័ណ្ឌនៃកម្មវិធី ប្រតិភូ និងភ្ញៀវបានពិសារម្ហូបអាហារវៀតណាម ព្រមទាំងបានទៅទស្សនាការតាំងពិព័រណ៍រូបថតដែលណែនាំអំពីទំនាក់ទំនងទ្វេភាគីរយៈពេល ៥០ ឆ្នាំរវាងវៀតណាម និងនូវែលសេឡង់ ក៏ដូចជាអំពីទឹកដី និងមនុស្សវៀតណាមផងដែរ៕

បកប្រែដោយ Thanh Cong