លោកនាយករដ្ឋមន្ត្រី Pham Minh Chinh អញ្ជើញចូលរួមកម្មវិធីសិល្បៈ "Con Dao - បទភ្លេងនៃឆន្ទៈវៀតណាម"

ថ្លែងក្នុងកម្មវិធីនេះ លោក Pham Minh Chinh នាយករដ្ឋមន្ត្រីវៀតណាម បានសំដែងការដឹងគុណយ៉ាងជ្រាលជ្រៅ និងចងចាំជានិច្ចចំពោះយុទ្ធជនបដិវត្តន៍ និងជនរួមជាតិដែលរងការចាប់ដាក់គុក និងធ្វើទារុណកម្មដោយសត្រូវ ក៏ដូចជាស្មារតីតស៊ូ ការលះបង់គ្រប់យ៉ាង មិនចេះចុះញមរបស់យុទ្ធជនដើម្បីឯករាជ្យ សេរីភាព សន្តិភាព បង្រួបបង្រួមជាតិ និងសុភមង្គលរបស់ប្រជាជន។

លោក Pham Minh Chinh នាយករដ្ឋមន្ត្រីវៀតណាម និងប្រតិភូចូលរួមកម្មវិធី

រំលឹកឡើងវិញនូវប្រវត្តិសាស្ត្រ លោកនាយករដ្ឋមន្ត្រីវៀតណាមបានសង្កត់ធ្ងន់ថា ស្រុក Con Dao បានក្លាយទៅជាតំបន់ប្រវត្តិសាស្ត្រដ៏ពិសិដ្ឋ ដែលជានិមិត្តរូបដ៏ស្រស់ស្អាតនៃស្មារតីប្រយុទ្ធវីរភាពបដិវត្តន៍ និងស្មារតីស្នេហាជាតិរបស់ប្រជាជាតិ​វៀតណាម ហើយជា “សាលាបដិវត្តន៍ពិសេសដ៏អស្ចារ្យ” ដែលបានរួមចំណែកលត់ដំ បណ្តុះបណ្តាលថ្នាក់ដឹកនាំជាច្រើនរបស់បក្ស និងរដ្ឋ ក្នុងសង្គ្រាមតស៊ូដើម្បីសង្គ្រោះជាតិ កសាង និងអភិវឌ្ឍប្រទេសជាតិ​។

លោកនាយករដ្ឋមន្ត្រី Pham Minh Chinh អញ្ជើញចូលរួមកម្មវិធីសិល្បៈក្រោមប្រធានបទ "Con Dao - បទភ្លេងនៃឆន្ទៈវៀតណាម"

រំលឹកឡើងវិញនូវការអភិវឌ្ឍដ៏អស្ចារ្យរបស់ស្រុក Con Dao ក្រោយរយៈពេល ៥០ ឆ្នាំនៃការរំដោះ លោកនាយករដ្ឋមន្ត្រីវៀតណាម បានអះអាងថា Con Dao ធ្លាប់ជា "ឋាននរកនៅលើផែនដី" "គុកឃុំឃាំងឃោឃៅ" ឥឡូវនេះត្រូវបានពិភពលោកចាត់ទុកថាជា "ឋានសួគ៌ទេសចរណ៍" ជាទីតាំងសម្រាប់ការស្វែងយល់អំពីប្រវត្តិសាស្ត្រ ជំនឿខាងវិញ្ញាណ និងអេគូឡូស៊ីសមុទ្រ។ ការអភិវឌ្ឍរបស់ Con Dao មិនត្រឹមតែផ្លាស់ប្តូររូបរាងទីតាំងប្រវត្តិសាស្ត្រប៉ុណ្ណោះទេ ថែមទាំងរួមចំណែកជាវិជ្ជមានដល់សមិទ្ធផលរួមរបស់ខេត្ត Ba Ria - Vung Tau ព្រមទាំងបញ្ជាក់ពីកិត្យានុភាពជាខេត្តនាំមុខគេក្នុងវិស័យសេដ្ឋកិច្ចនៅតំបន់ភាគអាគ្នេយ៍ និងដើរតួនាទីយ៉ាងសំខាន់ក្នុងការអភិវឌ្ឍរបស់ប្រទេសជាតិ។

លោកនាយករដ្ឋមន្ត្រីវៀតណាម បានសង្កត់ធ្ងន់ថា ខួបលើកទី ៥០ នៃថ្ងៃរំដោះ Con Dao គឺជាព្រឹត្តិការណ៍ដ៏មានអត្ថន័យពិសេស បំផុសស្មារតីស្នេហាជាតិ ក្ដីមោទនភាពអំពីប្រវត្តិសាស្ត្រវីរភាព និងសំដែងការដឹងគុណចំពោះការរួមចំណែករបស់មនុស្សជំនាន់មុន ដើម្បីឃើញច្បាស់ពីការទទួលខុសត្រូវចំពោះប្រទេសជាតិ ខិតខំបង្កើតសមិទ្ធផលថ្មី នាំប្រទេសជាតិឲ្យកាន់តែអភិវឌ្ឍក្នុងយុគសម័យថ្មី៕

បកប្រែដោយ Thanh Cong