នាវាសន្តិភាព មកដល់ប្រទេសវៀតណាមក្នុងឱកាសខួបលើកទី ៥០ នៃការបង្រួបបង្រួមជាតិ

កម្មវិធីផ្លាស់ប្តូរវប្បធម៌ "បន្តសរសេររឿងសន្តិភាព" បានប្រព្រឹត្តទៅក្នុងឱកាសខួបលើកទី ៥០ នៃទិវារំដោះភាគខាងត្បូង និងបង្រួបបង្រួមប្រទេសជាតិ (ថ្ងៃទី៣០ ខែមេសា ឆ្នាំ១៩៧៥ / ថ្ងៃទី៣០ ខែមេសា ឆ្នាំ២០២៥)។

បទចម្រៀង Hello Vietnam ត្រូវបានច្រៀង ដោយភ្ញៀវជប៉ុន វៀតណាម និងអន្តរជាតិ ក្នុងកម្មវិធីពិសេសមួយនៅលើនាវាពិសេស–Peace Boat ដែលបានដាក់ឱ្យដំណើរការតាំងពីឆ្នាំ ១៩៨៣ មកម៉្លេះក្នុងគោលបំណងលើកកម្ពស់សន្តិភាព សិទ្ធិមនុស្ស និងការអភិវឌ្ឍប្រកបដោយចីរភាព។

នាវាសន្តិភាព ចូលចតនៅកំពង់ផែ Ha Long នាព្រឹកថ្ងៃទី ៣០ ខែមេសា (រូបថត៖ vovworld.vn)

ដំណើរនៅឆ្នាំ ២០២៥ បានចាប់ផ្ដើមនៅទីក្រុង Yokohama (ប្រទេសជប៉ុន) ហើយគោលដៅទី៤ គឺទីក្រុង Ha Long (វៀតណាម)។

លោក Yoshioka Tatsuya សហស្ថាបនិក និងជានាយកប្រតិបត្តិនៃនាវាសន្តិភាព (Peace Boat) បានសម្តែងនូវការកោតសរសើរចំពោះប្រវត្តិនៃការតស៊ូដើម្បីឯករាជ្យជាតិ ស្មារតីតស៊ូយ៉ាងក្លាហាន និងភាពឧស្សាហ៍ព្យាយាមរបស់ប្រជាជនវៀតណាម។ លោកចាត់ទុកថា នេះគឺជាឱកាសសម្រាប់ភាគីទាំងពីរដើម្បីចែករំលែកទស្សនៈ និងឆ្ពោះទៅរកពិភពលោកសន្តិភាព និងគ្មានអាវុធនុយក្លេអ៊ែរ។

"សន្តិភាព គឺជាអ្វីដែលស្រស់ស្អាតបំផុត!" គឺជាអារម្មណ៍រួមរបស់អ្នកចូលរួមព្រឹត្តិការណ៍ទាំងអស់ បន្ទាប់ពីទៅទស្សនានៅទីក្រុង Ha Long៕

បកប្រែដោយ Thuy Anh