ក្នុងក្របខ័ណ្ឌនៃកិច្ចប្រជុំ មន្ត្រីជាន់ខ្ពស់មកពីប្រទេសអាស៊ានទាំង១០ ទីម័រខាងកើត និងដៃគូចិន ជប៉ុន កូរ៉េខាងត្បូង អាមេរិក ឥណ្ឌា អូស្ត្រាលី នូវែលហ្សេឡង់ និងរុស្ស៊ីបានពិភាក្សា និងត្រួតពិនិត្យយ៉ាងហ្មត់ចត់អំពីផែនការសម្រាប់កិច្ចប្រជុំកំពូលអាស៊ានលើកទី៤៧ និងកិច្ចប្រជុំកំពូលពាក់ព័ន្ធ ជាពិសេសរបៀបវារៈ និងបញ្ជីឯកសារជាង ៨០ ដែលរំពឹងថានឹងដាក់ជូនថ្នាក់ដឹកនាំ។ អាស្រ័យហេតុនេះ ក្រោមប្រធានបទ “បរិយាប័ន្ន និងនិរន្តរភាព” របស់អាស៊ាន ឆ្នាំ ២០២៥ ថ្នាក់ដឹកនាំទាំងឡាយនឹងចូលរួមសកម្មភាពជិត ៤០ ដោយពិភាក្សាអំពីបញ្ហាយុទ្ធសាស្ត្រជាច្រើន ដើម្បីជំរុញកិច្ចសហប្រតិបត្តិការក្នុងតំបន់ ចាប់ពីនយោបាយ សន្តិសុខ រហូតដល់សេដ្ឋកិច្ច ការវិនិយោគ ការតភ្ជាប់ វប្បធម៌ សង្គម បរិវត្តកម្មឌីជីថល នវានុវត្តន៍ សន្តិសុខថាមពល សន្តិសុខស្បៀងអាហារ ការអប់រំ... ដោយមានគោលដៅកសាងអាស៊ានបរិយាប័ន្ន និរន្តរភាព និងផ្តោតលើប្រជាជន។ កិច្ចប្រជុំ SOM អាស៊ានក៏បានពិភាក្សាអំពីដំណើរការ និងនីតិវិធីសម្រាប់ការរៀបចំសម្រាប់ការបញ្ចូលប្រទេសទីម័រខាងកើតជាសមាជិកទី ១១ របស់អាស៊ាននៅខែតុលា ឆ្នាំ២០២៥។

leftcenterrightdel
មន្ត្រីជាន់ខ្ពស់មកពីប្រទេសអាស៊ានទាំង១០ ចូលរួមកិច្ចប្រជុំ (រូបថត៖ ក្រសួងការបរទេស)

នៅកិច្ចប្រជុំ SOM ASEAN+3 ដៃគូចិន ជប៉ុន និងកូរ៉េខាងត្បូងបានលើកឡើងវិធានការជាច្រើនដើម្បីពង្រឹងកិច្ចសហប្រតិបត្តិការជាមួយអាស៊ានលើវិស័យសេដ្ឋកិច្ច ហិរញ្ញវត្ថុ រូបិយប័ណ្ណ សន្តិសុខថាមពល សន្តិសុខស្បៀង ការអភិវឌ្ឍប្រកបដោយចីរភាព។ល។

នៅកិច្ចប្រជុំ SOM EAS ប្រទេសទាំងឡាយបានសង្កត់ធ្ងន់ថា EAS បន្តអះអាងនូវតួនាទីរបស់ខ្លួនជាវេទិកានាំមុខរបស់ថ្នាក់ដឹកនាំដើម្បីពិភាក្សាអំពីបញ្ហានយោបាយ-សន្តិសុខ និងយុទ្ធសាស្ត្រក្នុងតំបន់ ព្រមទាំងឯកភាពផ្តោតលើការជំរុញកិច្ចសហប្រតិបត្តិការលើវិស័យសេដ្ឋកិច្ចឌីជីថលបរិយាប័ន្ន ថាមពល ការពារ និងប្រយុទ្ធប្រឆាំងនឹងឧក្រិដ្ឋកម្មឆ្លងដែន បង្ការ និងឆ្លើយតបទៅនឹងគ្រោះមហន្តរាយធម្មជាតិ និងកិច្ចសហប្រតិបត្តិការវប្បធម៌។

leftcenterrightdel
លោក Dang Hoang Giang អនុរដ្ឋមន្ត្រីក្រសួងការបរទេស ប្រធាន SOM អាស៊ានវៀតណាម ចូលរួមកិច្ចប្រជុំ (រូបថត៖ ក្រសួងការបរទេស)

នៅក្នុងកិច្ចប្រជុំទាំងឡាយ លោក Dang Hoang Giang ប្រធាន SOM អាស៊ានវៀតណាម បានអះអាងថា វៀតណាមនឹងសម្របសម្រួលយ៉ាងជិតស្និទ្ធជាមួយប្រធានអាស៊ានឆ្នាំ ២០២៥ ម៉ាឡេស៊ី បណ្តាប្រទេសសមាជិកអាស៊ាន និងដៃគូនានា ដើម្បីរួមចំណែកដល់ជោគជ័យនៃកិច្ចប្រជុំកំពូលអាស៊ានលើកទី ៤៧ និងកិច្ចប្រជុំកំពូលពាក់ព័ន្ធក្នុងខែតុលា។

* ក្នុងឱកាសនៃកិច្ចប្រជុំ SOM អាស៊ាន អាស៊ាន+៣ និង EAS លោក Dang Hoang Giang អនុរដ្ឋមន្ត្រី បានមានជំនួបទ្វេភាគីជាមួយប្រធាន SOM បណ្តាប្រទេសអាស៊ាន និងដៃគូនានា ដើម្បីពិភាក្សាអំពីបញ្ហាដែលភាគីទាំងឡាយមានការយកចិត្តទុកដាក់ដូចគ្នា ក្នុងកិច្ចសហប្រតិបត្តិការទ្វេភាគី ក៏ដូចជាពង្រឹងការសម្របសម្រួលនៅវេទិកាពហុភាគី៕

បកប្រែដោយ Huyen Trang