បង្កើនកិច្ចសហប្រតិបត្តិការផ្នែកហិរញ្ញវត្ថុ និងរូបិយវត្ថុរវាងវៀតណាម និងកាហ្សាក់ស្ថាន

ក្នុងដំណើរទស្សនកិច្ចការងារនៅកាហ្សាក់ស្ថាន នាថ្ងៃទី៣ ខែកុម្ភៈ លោក Nguyen Hoa Binh ឧបនាយករដ្ឋមន្ត្រី និងគណៈប្រតិភូវៀតណាម  បានជួបពិភាក្សាការងារជាមួយ លោក Timur Suleimenov ទេសាភិបាលធនាគារកណ្តាលកាហ្សាក់ស្ថាន។

លោក Nguyen Hoa Binh ឧបនាយករដ្ឋមន្ត្រី និងលោក Timur Suleimenov ទេសាភិបាលធនាគារកណ្តាលកាហ្សាក់ស្ថាន (រូបថត៖ VGP)

នៅក្នុងជំនួប លោក Timur Suleimenov បានសង្កត់ធ្ងន់ថា ទំនាក់ទំនងមិត្តភាពជាប្រពៃណីរវាងប្រទេសទាំងពីរកាន់តែរីកចម្រើនលើគ្រប់វិស័យ ជាពិសេសចាប់តាំងពីប្រទេសទាំងពីរបង្កើតទំនាក់ទំនងភាពជាដៃគូយុទ្ធសាស្ត្រ។ លោកក៏បានកត់សម្គាល់ផងដែរថា វៀតណាមមានឱកាសអំណោយផលក្នុងការអភិវឌ្ឍមជ្ឈមណ្ឌលហិរញ្ញវត្ថុ ដោយសារតែសេដ្ឋកិច្ចវៀតណាមកំពុងអភិវឌ្ឍយ៉ាងខ្លាំងក្លា និងមានទំនាក់ទំនងជាមួយស្ថាប័នហិរញ្ញវត្ថុអន្តរជាតិជាច្រើន។

ជាមួយគ្នានេះ លោក Nguyen Hoa Binh បានណែនាំធនាគាររដ្ឋវៀតណាមឲ្យសម្របសម្រួលជាមួយធនាគារកណ្តាលកាហ្សាក់ស្ថានដើម្បីជំរុញការចុះហត្ថលេខាលើអនុស្សរណៈយោគយល់គ្នាថ្មី (MOU) ស្តីពីកិច្ចសហប្រតិបត្តិការរវាងធនាគារទាំងពីរ ដោយពង្រីកកិច្ចសហប្រតិបត្តិការទៅលើបញ្ហាថ្មីៗ ដែលពីមុនមិនធ្លាប់មាននៅក្នុងក្របខ័ណ្ឌនៃអនុស្សរណៈយោគយល់គ្នាចាស់ ដែលបានចុះហត្ថលេខារវាងធនាគារទាំងពីរក្នុងឆ្នាំ ២០១២ ដូចជា ហិរញ្ញវត្ថុបច្ចេកវិទ្យា និងមជ្ឈមណ្ឌលហិរញ្ញវត្ថុអន្តរជាតិជាដើម។

ក្នុងឱកាសនេះផងដែរ លោកឧបនាយករដ្ឋមន្ត្រីបានជួបសំណេះសំណាលជាមួយកម្មាភិបាលនិងបុគ្គលិកនៃស្ថានទូតវៀតណាមប្រចាំកាហ្សាក់ស្ថាន។

បកប្រែដោយ Duy Hoan