សហគ្រាសវៀតណាមស្វែងរកស្វែងរកដៃគូ ពង្រីកទីផ្សារនៅបារាំង

វេទិកា​សេដ្ឋកិច្ច​កសិកម្ម​វៀត​ណាម​-​បារាំង​បាន​បើក​នា​ថ្ងៃ​ទី​១០​តុលា​នៅ​ទីក្រុង​ប៉ារីស​ប្រទេស​បារាំង។

លោក Paul Le អនុប្រធានសម្ព័ន្ធ​ក្រុមហ៊ុន Central Retail ទទួលបន្ទុកជំរុញពាណិជ្ជកម្ម បានសង្កត់ធ្ងន់ថា សម្ព័ន្ធក្រុមហ៊ុន Central Retail  មានបំណងចង់អភិវឌ្ឍជាមួយវៀតណាម (រូបថត៖ Anh Tuan/VOV-Paris)

ព្រឹត្តិការណ៍នេះត្រូវបានសហការរៀបចំដោយសម្ព័ន្ធ​ក្រុមហ៊ុន​ Central Retail Vietnam សមាគមធុរកិច្ចបារាំង និងក្រសួងឧស្សាហកម្ម និងពាណិជ្ជកម្មវៀតណាម។ នេះជាលើកទីមួយហើយដែលវេទិកានេះត្រូវបានប្រារព្ធឡើង ដោយប្រមូលផ្តុំតំណាងសមាគមធុរកិច្ច អ្នកលក់រាយបារាំង និងសហគ្រាសវៀតណាមជិត ៤០។

សហគ្រាសវៀតណាមធ្វើពាណិជ្ជកម្មលើផលិតផលកសិកម្ម វាយនភ័ណ្ឌ និងសិប្បកម្ម។ ធុរកិច្ចវៀតណាមមកប្រទេសបារាំងដើម្បីណែនាំផលិតផល ស្វែងរកដៃគូដើម្បីធ្វើពិពិធកម្មទីផ្សារនាំចេញ និងពង្រីកកិច្ចសហប្រតិបត្តិការជាមួយបារាំង និងសហភាពអឺរ៉ុប។

វេទិកានេះបានទាក់ទាញចំណាប់អារម្មណ៍របស់ធុរកិច្ចបារាំងជាច្រើន និងមិត្តអន្តរជាតិ (រូបថត៖ Anh Tuan/VOV-Paris)

ក្នុងក្របខ័ណ្ឌនៃវេទិកាសេដ្ឋកិច្ចវៀតណាម - បារាំង តំណាងរដ្ឋាភិបាល និងធុរកិច្ចនៃប្រទេសទាំងពីរបានចែករំលែកអំពីសក្ដានុពលនៃកិច្ចសហប្រតិបត្តិការរវាងភាគីទាំងពីរ និងបានបើកសម័យប្រជុំតភ្ជាប់​អាជីវកម្ម (B2B)។ ក្នុងឱកាសនេះសម្ព័ន្ធក្រុម​ហ៊ុន​ Central Retail Vietnam និង Verger de la Blottiere (សហករណ៍ដាំដុះ និងនាំចេញផ្លែប៉ោមឈានមុខគេមួយនៅប្រទេសបារាំង) បានចុះហត្ថលេខាលើអនុស្សរណៈយោគយល់គ្នា (MOU) ដើម្បីសិក្សា និងពិចារណាលទ្ធភាពនៃកិច្ចសហប្រតិបត្តិការក្នុងការនាំយកផលិតផលផ្លែប៉ោមបារាំងគុណភាពខ្ពស់ទៅកាន់ទីផ្សារវៀតណាម៕

បកប្រែដោយ Thanh Cong