វៀតណាមជំរុញទេសចរណ៍ និងការវិនិយោគនៅប្រទេសចិន
កប.អនឡាញ - វេទិកាជំរុញទេសចរណ៍ និងការវិនិយោគវៀតណាម-ចិន ដែលរៀបចំដោយស្ថានទូតវៀតណាមប្រចាំនៅប្រទេសចិន មជ្ឈមណ្ឌលចិន-អាស៊ាន និងសភាពាណិជ្ជកម្មចិន សម្រាប់ឧស្សាហកម្មមេកានិច និងអគ្គិសនីរបស់ចិន បានប្រព្រឹត្តទៅនារសៀលថ្ងៃទី២១ ខែកញ្ញា នៅទីក្រុងប៉េកាំង។ ប្រតិភូប្រហែល ២៥០ នាក់មកពីប្រទេសទាំងពីរ រួមទាំងធុរកិច្ចឈានមុខជាច្រើនរបស់ចិន និងធុរកិច្ចមកពីខេត្ត Nghe An ខេត្ត Quang Tri និង Tay Ninh របស់វៀតណាមបានចូលរួមវេទិកានេះ។
ថ្លែងមតិនៅវេទិកានេះ លោក Pham Thanh Binh ឯកអគ្គរដ្ឋទូតវៀតណាមប្រចាំនៅចិន បានសង្កត់ធ្ងន់ថា កិច្ចសហប្រតិបត្តិការសេដ្ឋកិច្ច និងការវិនិយោគរវាងវៀតណាម និងចិននាពេលកន្លងមកនេះ ទទួលបានលទ្ធផលគួរឲ្យចាប់អារម្មណ៍ និងក្លាយទៅជាចំណុចភ្លឺដ៏សំខាន់ក្នុងទំនាក់ទំនងរវាងប្រទេសទាំងពីរ។
    |
 |
|
លោក Pham Thanh Binh ឯកអគ្គរដ្ឋទូត ថ្លែងសុន្ទរកថាបើកវេទិកា (រូបថត៖ vov.vn) |
លោកឯកអគ្គរដ្ឋទូតបានអះអាងថា សក្ដានុពលសម្រាប់កិច្ចសហប្រតិបត្តិការវិនិយោគ និងទេសចរណ៍រវាងប្រទេសទាំងពីរនៅតែមានច្រើនណាស់។ ទាក់ទិននឹងការវិនិយោគ វៀតណាមលើកទឹកចិត្តធុរកិច្ចចិនពង្រីកកិច្ចសហប្រតិបត្តិការ និងបង្កើនការវិនិយោគលើវិស័យដូចជា នវានុវត្តន៍ កំណើនបៃតង ការធ្វើបរិវត្តកម្មឌីជីថល ថាមពលកកើតឡើងវិញ ទីក្រុងឆ្លាតវៃ ការអប់រំ។ល។ ចំពោះវិស័យទេសចរណ៍ វៀតណាមតែងតែស្វាគមន៍ភ្ញៀវទេសចរចិនមកទស្សនានៅវៀតណាម ទស្សនាទេសភាពដ៏ស្រស់ស្អាត ស្វែងយល់អំពីប្រពៃណីប្រវត្តិសាស្ត្រ និងវប្បធម៌ដ៏យូរអង្វែង ភាពរួសរាយរាក់ទាក់របស់ប្រជាជន និងសុវត្ថិភាពនៃប្រទេសជាតិ។
ខាងភាគីចិន លោក Shi Zhongjun អគ្គលេខាធិការនៃមជ្ឈមណ្ឌលចិន-អាស៊ាន បានវាយតម្លៃថា កិច្ចសហប្រតិបត្តិការចិន-វៀតណាម ដើរតួនាទីជាគំរូ និងរួមចំណែកក្នុងការជម្រុញកិច្ចសហប្រតិបត្តិការចិន-អាស៊ាន។ យោងតាមលោក Shi Zhongjun ភាគីទាំងពីរចាំបាច់ត្រូវទាញយកសក្តានុពលពីកិច្ចសហប្រតិបត្តិការលើវិស័យទេសចរណ៍ និងការវិនិយោគ រួមចំណែកជាវិជ្ជមានក្នុងការជំរុញដំណើរការទំនើបកម្មនៃភាគីទាំងពីរ និងក្នុងតំបន់។
នៅក្នុងវេទិកានេះ កម្មាភិបាល និងធុរកិច្ចវៀតណាមបានបង្ហាញអំពីបរិយាកាសវិនិយោគ ធុរកិច្ច និងទេសចរណ៍នៅមូលដ្ឋាន ព្រមទាំងផ្លាស់ប្តូរ និងឆ្លើយសំណួររបស់ប្រតិភូចិន៕
បកប្រែដោយ Thuy Anh