ឱកាសសហប្រតិបត្តិការ​ជាច្រើនក្នុងពិព័រណ៍ពាណិជ្ជកម្មវៀតណាម-ចិន លើកទី២៣

ពិព័រណ៍មានស្តង់ជាង ៦០០ ដែលទាក់ទាញអង្គភាពអាជីវកម្ម និងសហករណ៍មកពី ៤៦ ខេត្ត-ក្រុងរបស់វៀតណាម និងជាង ១៥០ សហគ្រាសធុនធំ និងតូច មកពីប្រទេសចិន រួមទាំងប្រទេសមួយចំនួនទៀត។

ពិព័រណ៍នេះទាក់ទាញភ្ញៀវទេសចរ និងប្រជាជនយ៉ាងច្រើនកុះករ (រូប​ថត៖ vov.vn)

លោក Nguyen Van Bac ប្រធានមន្ទីរឧស្សាហកម្ម និងពាណិជ្ជកម្មខេត្ត Son La បានឲ្យដឹងថា នៅពិព័រណ៍លើកនេះ ខេត្ត Son La បាននាំមកកសិផលជាច្រើន ក្នុងនោះមានកសិផលសំខាន់ពីរគឺកាហ្វេ និងតែ ដែលមានការនាំចេញខ្លាំង ជាពិសេសនៅទីផ្សារអាស៊ីប្រពៃណី រួមទាំងប្រទេសចិនផងដែរ។ លោក Nguyen Van Bac ឲ្យដឹងថា "យើងនាំផលិតផលទាំងនេះក្នុងបំណងចង់បញ្ជាក់ម៉ាកយីហោរបស់យើង បន្តតភ្ជាប់ពាណិជ្ជកម្មដើម្បីពង្រីកទីផ្សារ និងស្វែងរកឱកាសដើម្បីបង្កើនតម្លៃផលិតផលនៅពេលនាំចេញ"។

យោងតាមលោកស្រី Nguyen Hoang Van អគ្គនាយិកានៃសហករណ៍ប្រព័ន្ធអេកូឡូស៊ីផលិតកម្ម និងប្រើប្រាស់ប្រកបដោយនិរន្តរភាពនៃខេត្ត Binh Thuan ឲ្យដឹងថា ក្រៅពីផលិតផលពិសេសដូចជាសំបុក​ត្រចៀកកាំ ខេត្ត Binh Thuan បាននាំយកផ្លែស្រកានាគសាច់ពណ៌លឿង ស និងក្រហម ដ៏ឆ្ងាញ់បំផុត រួមជាមួយនឹងផលិតផលពីផ្លែស្រកានាគ ដូចជាស្រា នំ និងតែ មកកាន់ពិព័រណ៍នេះផងដែរ។ បច្ចុប្បន្ននេះ ៨៥% នៃផ្លែស្រកានាគរបស់ Binh Thuan កំពុងត្រូវបាននាំចេញទៅកាន់ប្រទេសចិន ។

ស្តង់ទំនិញរបស់ប្រទេសហ្គាណា ជាប្រទេសមួយក្នុងចំណោមប្រទេស និងដែនដីចំនួនប្រាំបីផ្សេងទៀតដែលចូលរួមក្នុងពិព័រណ៍នេះ (រូប​ថត៖ vov.vn)

នៅឯពិព័រណ៌នេះក៏​មានសកម្មភាពជាក់ស្តែងជាច្រើនដូចជា សន្និសីទ​ពាណិជ្ជកម្មរវាង​សហគ្រាសនាំចូលផលិតផលកសិកម្ម រុក្ខាប្រមាញ់ និងនេសាទ មកពីប្រទេសចិន និងវៀតណាម សន្និសីទអភិវឌ្ឍន៍សេវាកម្ម Logictics និងកិច្ចពិភាក្សាសហប្រតិបត្តិការសេដ្ឋកិច្ច និងពាណិជ្ជកម្មរវាង Lao Cai និង Yunnan (ប្រទេសចិន)។

អនុស្សរណៈនៃការយោគយល់ និងកិច្ចព្រមព្រៀងសហប្រតិបត្តិការជាច្រើនត្រូវបានចុះហត្ថលេខានៅឯពិព័រណ៍ (រូប​ថត៖ vov.vn)

តាមរយៈសកម្មភាពនៅក្នុងពិព័រណ៍នេះ អនុស្សរណៈនៃការយោគយល់ និងកិច្ចព្រមព្រៀងសហប្រតិបត្តិការជាច្រើនត្រូវបានចុះហត្ថលេខា ដោយ​បើកឱកាសថ្មីៗជាច្រើន និងទិសដៅអភិវឌ្ឍន៍នាពេលអនាគត។ ចំពោះសកម្មភាពផ្សព្វផ្សាយពាណិជ្ជកម្ម សហគ្រាសវៀតណាម និងចិនចំនួន ៤២ គូ បានឈានដល់កិច្ចព្រមព្រៀងសហប្រតិបត្តិការអាជីវកម្ម; កិច្ចសន្យាចំនួន ១៦ គូរវាងអង្គភាពអាជីវកម្មនៃភាគីទាំងពីរក៏ត្រូវបានចុះហត្ថលេខាតាមរយៈអនុស្សរណៈនៃការយោគយល់គ្នាផងដែរ។

យោងតាមលោក Tran Thanh Hai អនុប្រធាននាយកដ្ឋាននាំចូល-នាំចេញ-ក្រសួងឧស្សាហកម្ម និងពាណិជ្ជកម្មវៀតណាម ការរក្សាការរៀបចំពិព័រណ៍ឡើងវិញបន្ទាប់ពី Covid-19 ក៏អះអាងនូវការខិតខំប្រឹងប្រែងរបស់ខេត្ត Lao Cai និង Yunnan ដោយផ្អែកលើចំណងមិត្តភាពយូរអង្វែង។ ហើយជាការពិតបង្ហាញថា ពិព័រណ៌ទាក់ទាញប្រជាពលរដ្ឋ និងភ្ញៀវទេសចរយ៉ាងច្រើនកុះករមកចូលរួម រួមចំណែកជំរុញការប្រើប្រាស់ និងទេសចរណ៍ ផ្សព្វផ្សាយរូបភាពនៃខេត្តជាប់ព្រំដែននៃប្រទេសទាំងពីរ៕

បកប្រែដោយ Duy Hoan