អ្នកជំនាញសេដ្ឋកិច្ច៖ «វៀតណាមកំពុងឈានចូលវដ្តកំណើនថ្មីមួយជាមួយនឹងការផ្លាស់ប្តូរសំខាន់ៗ»

«នៅក្នុងបរិបទនៃពិភពលោកដែលមានការប្រែប្រួលខ្លាំង វៀតណាមបន្តអភិវឌ្ឍយ៉ាងខ្លាំង ហើយកំពុងឈានចូលវដ្តកំណើនថ្មីមួយជាមួយនឹងការផ្លាស់ប្តូរសំខាន់ៗ»។ នេះគឺជាការវាយតម្លៃរបស់លោក Michael Kokalari អ្នកជំនាញសេដ្ឋកិច្ចនៃមូលនិធិវិនិយោគ VinaCapital។

លោក Michael Kokalari   អ្នកជំនាញសេដ្ឋកិច្ចនៃក្រុមហ៊ុនគ្រប់គ្រងមូលនិធិ VinaCapital (រូបថត៖ diendandoanhnghiep.vn)

លោក Michael Kokalari ព្យាករណ៍ថា ផលិតផលក្នុងស្រុកសរុប (GDP) របស់វៀតណាមនៅឆ្នាំ ២០២៥ អាចសម្រេចបានអត្រាកំណើនគួរឱ្យចាប់អារម្មណ៍ប្រហែល ៧.៥% ហើយអាចឈានដល់ ៨% នៅឆ្នាំនេះ។ យោងតាមលោក Michael Kokalari ការនាំចេញ និងទេសចរណ៍គឺជាកត្តាជំរុញចម្បងដែលរក្សាកំណើនផលិតផលក្នុងស្រុកសរុបខ្ពស់។ លោកបានកត់សម្គាល់ថា គោលនយោបាយពន្ធរបស់សហរដ្ឋអាមេរិកមិនសូវប៉ះពាល់ដល់ការនាំចេញរបស់វៀតណាមទៅកាន់សហរដ្ឋអាមេរិកទេ ហើយការនាំចេញទៅកាន់ទីផ្សារនេះត្រូវបានគេប៉ាន់ប្រមាណថានឹងកើនឡើងជិត ៣០% នៅក្នុងឆ្នាំ ២០២៥ ដោយសារតែការចំណាយដ៏ខ្លាំងក្លាជាបន្តបន្ទាប់របស់អតិថិជនអាមេរិកដែលមានប្រាក់ចំណូលខ្ពស់។

លើសពីនេះ ការងើបឡើងវិញនៃវិស័យទេសចរណ៍អន្តរជាតិ ជាពិសេសពីប្រទេសចិន រួមចំណែកប្រហែល ១ ភាគរយដល់ផលិតផលក្នុងស្រុកសរុប (GDP)។ លោក Michael Kokalari ព្យាករណ៍ថា ផលិតផលក្នុងស្រុកសរុបរបស់វៀតណាមនៅឆ្នាំ ២០២៦ មានសក្តានុពលសម្រាប់កំណើនកាន់តែខ្លាំងក្លា ខណៈដែលកត្តាផ្ទៃក្នុងឈានដល់កម្រិតកំពូល។ អ្វីដែលគួរឱ្យចាប់អារម្មណ៍នោះគឺកម្លាំងចលករពីកំណែទម្រង់ និងការវិនិយោគ ព្រោះឆ្នាំ ២០២៦ នឹងជាឆ្នាំដែលទទួលបានផលប្រយោជន៍ពីគោលនយោបាយផ្លាស់ប្តូរថ្មី ២.០ និងគម្រោងហេដ្ឋារចនាសម្ព័ន្ធសំខាន់ៗ។

ក្រៅពីកត្តាទាំងនេះ អ្នកជំនាញសេដ្ឋកិច្ចនៃ VinaCapital ក៏បានសរសើរយ៉ាងខ្លាំងចំពោះសេចក្តីសម្រេចចិត្តសំខាន់ៗរបស់វៀតណាម រួមទាំងការបង្កើតឱកាសសម្រាប់វិស័យឯកជន កិច្ចខិតខំប្រឹងប្រែងបង្រួមក្បាលម៉ាស៊ីន និងការលុបបំបាត់ឧបសគ្គនៅក្នុងទីផ្សារអចលនទ្រព្យ។ លើសពីនេះ បច្ចេកវិទ្យា និងបញ្ញាសិប្បនិម្មិត (AI) ក៏អាចក្លាយជាកត្តាជំរុញកំណើនថ្មីសម្រាប់វៀតណាមផងដែរ៕

បកប្រែដោយ Duy Hoan