វៀតណាម និងសហរដ្ឋអាមេរិកបន្តការចរចាបច្ចេកទេសលើកិច្ចព្រមព្រៀងពាណិជ្ជកម្មបដិការដោយយុត្តិធម៌ និងមានតុល្យភាព

បន្ទាប់ពីវគ្គចរចាថ្នាក់រដ្ឋមន្ត្រីនៅថ្ងៃទី១០ ខែវិច្ឆិកា និងថ្ងៃទី១២ ខែវិច្ឆិកា លោក Nguyen Sinh Nhat Tan អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម អនុប្រធានគណៈប្រតិភូចរចាវៀតណាម បានជួបពិភាក្សាការងារជាមួយលោក Rick Switzer អនុប្រធានតំណាងពាណិជ្ជកម្មសហរដ្ឋអាមេរិក ដើម្បីចាប់ផ្តើមវគ្គចរចាបច្ចេកទេស។

លោក Nguyen Sinh Nhat Tan អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម អនុប្រធានគណៈប្រតិភូចរចាវៀតណាម ជួបពិភាក្សាការងារជាមួយលោក Rick Switzer អនុប្រធានតំណាងពាណិជ្ជកម្មសហរដ្ឋអាមេរិក (រូបថត៖ chinhphu.vn)

នៅក្នុងកិច្ចពិភាក្សា ភាគីទាំងពីរបានផ្តោតលើការពិភាក្សាអំពីទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ក៏ដូចជាការឯកភាពលើខ្លឹមសារមួយចំនួនសម្រាប់ក្រុមចរចាបច្ចេកទេសនៃភាគីទាំងពីរ ខិតខំដោះស្រាយដើម្បីធានាបាននូវលទ្ធផលល្អបំផុត។ នេះត្រូវបានចាត់ទុកថាជាជំហានបន្ទាប់ដ៏សំខាន់មួយ ពីព្រោះវាកំណត់ទិសដៅសម្រាប់ក្រុមបច្ចេកទេសនៅក្នុងវគ្គចរចាលើកនេះ ដែលបង្ហាញពីការប្តេជ្ញាចិត្តរបស់ភាគីទាំងពីរក្នុងការជំរុញកិច្ចសហប្រតិបត្តិការពាណិជ្ជកម្មដែលមានស្ថិរភាព តុល្យភាព យុត្តិធម៌ និងប្រកបដោយចីរភាព។

លោក Rick Switzer អនុប្រធានតំណាងពាណិជ្ជកម្មសហរដ្ឋអាមេរិក បានទទួលស្គាល់ជំហានវិជ្ជមានក្នុងគោលនយោបាយពាណិជ្ជកម្ម កំណែទម្រង់ស្ថាប័ន និងការប្តេជ្ញាចិត្តធ្វើសមាហរណកម្មអន្តរជាតិរបស់វៀតណាម ក៏ដូចជាលទ្ធផលនៃការចរចាជុំថ្មីៗនេះ ព្រមទាំងអះអាងថា កិច្ចសហប្រតិបត្តិការយ៉ាងជិតស្និទ្ធរវាងភាគីទាំងពីរនឹងបង្កើតលក្ខខណ្ឌអំណោយផលសម្រាប់ដំណើរការចរចា។

បន្ទាប់ពីកិច្ចពិភាក្សា គណៈប្រតិភូចរចារបស់ប្រទេសទាំងពីរបានចាប់ផ្តើមអនុវត្តការងារនៅក្នុងក្រុមនីមួយៗ ដើម្បីចរចាខ្លឹមសារតាមផែនការដែលបានកំណត់ទុកជាមុន៕

បកប្រែដោយ Huyen Trang