ទីក្រុងហូជីមិញត្រៀមខ្លួនជាស្រេចដើម្បីជំរុញកិច្ចសហប្រតិបត្តិការជាមួយមូលដ្ឋាននានារបស់អ៊ីតាលី

ទីក្រុងហូជីមិញមានបំណងជំរុញទំនាក់ទំនងមិត្តភាព និងកិច្ចសហប្រតិបត្តិការជាមួយទីក្រុងនានារបស់អ៊ីតាលីដូចជា៖ Torino, Genoa និង Milan ក្នុងវិស័យទេសចរណ៍ ការអភិរក្សបេតិកភណ្ឌ ការអភិវឌ្ឍកំពង់ផែ ការផលិតថាមពលកកើតឡើងវិញ ការអភិវឌ្ឍហេដ្ឋារចនាសម្ព័ន្ធ និងការឆ្លើយតបនឹងការប្រែប្រួលអាកាសធាតុ។

លោក Vo Van Hoan អនុប្រធានគណៈកម្មាធិការប្រជាជនទីក្រុងហូជីមិញ មានប្រសាសន៍អបអរសាទរក្នុងឱកាសរំលឹកខួបលើកទី ៧៩ នៃទិវាបុណ្យឯករាជជាតិអ៊ីតាលី (រូបថត៖ vnanet.vn)

មានប្រសាសន៍ក្នុងពិធីរំលឹកខួបលើកទី ៧៩ នៃទិវាបុណ្យឯករាជជាតិអ៊ីតាលី (ថ្ងៃទី ២ ខែមិថុនា ឆ្នាំ១៩៤៦ / ថ្ងៃទី ២ ខែមិថុនា ឆ្នាំ២០២៥) ដែលរៀបចំដោយស្ថានអគ្គកុងស៊ុលអ៊ីតាលីប្រចាំទីក្រុងហូជីមិញ នាយប់ថ្ងៃទី ២ ខែមិថុនា លោក Vo Van Hoan អនុប្រធានគណៈកម្មាធិការប្រជាជនទីក្រុងហូជីមិញបានមានប្រសាសន៍ថា នាពេលខាងមុខ បន្ទាប់ពីច្របាច់បញ្ចូលខេត្ត Binh Duong និងខេត្ត Ba Ria - Vung Tau មាត្រដ្ឋាននៃទីក្រុងហូជីមិញថ្មីនឹងពង្រីកយ៉ាងខ្លាំងដែរ និងមានសក្តានុពលកាន់តែច្រើនក្នុងការអភិវឌ្ឍទីក្រុង ឧស្សាហកម្ម logistics និងកំពង់ផែសមុទ្រ បង្កើតមូលដ្ឋានគ្រឹះដ៏រឹងមាំដើម្បីជំរុញការតភ្ជាប់ក្នុងតំបន់ និងការធ្វើសមាហរណកម្មអន្តរជាតិ។ ទីក្រុងហូជីមិញថ្មីនឹងមានលក្ខខណ្ឌអំណោយផលជាច្រើន ដើម្បីជំរុញកិច្ចសហប្រតិបត្តិការជាមួយដៃគូអន្តរជាតិ រួមទាំងមូលដ្ឋាន និងអង្គភាពអាជីវកម្មអ៊ីតាលីផងដែរ។

លោក Vo Van Hoan (ស្តាំ) អនុប្រធានគណៈកម្មាធិការប្រជាជនទីក្រុងហូជីមិញ និងលោក Enrico Padula (ឆ្វេង) អគ្គកុងស៊ុលអ៊ីតាលីប្រចាំនៅទីក្រុងហូជីមិញ អបអរសាទរខួបលើកទី ៧៩ នៃទិវាបុណ្យឯករាជជាតិអ៊ីតាលី (រូបថត៖ vnanet.vn)

រីឯលោក Enrico Padula អគ្គកុងស៊ុលអ៊ីតាលីប្រចាំនៅទីក្រុងហូជីមិញបានចែករំលែកថា នាពេលខាងមុខ ស្ថានអគ្គកុងស៊ុលអ៊ីតាលីប្រចាំនៅទីក្រុងហូជីមិញនឹងបន្តជួយឧបត្ថម្ភសកម្មភាពរបស់អង្គភាពអាជីវកម្មអ៊ីតាលីនៅវៀតណាមលើវិស័យដែលជាប្រៀបខ្លាំង ដូចជា គ្រឿងម៉ាស៊ីន ឱសថ អេឡិចត្រូនិច លំហអាកាស ម៉ូដ និងម្ហូបអាហារ៕

បកប្រែដោយ Huyen Trang